ସ୍ୱଚ୍ଛ ସର୍ବେକ୍ଷଣରେ ସାରା ରାଜ୍ୟରେ ଏକ ନମ୍ବର, ଜଟଣୀ ପୌର ପରିଷଦର ସ୍ୱାୟତ୍ତ ଶାସନ ଦିବସ ପାଳିତ

ଜଟଣୀ : 31/8/2022 ଜଟଣୀ ପୌର ପରିଷଦ ସ୍ଥାନୀୟ ଟାଉନ ହଲ ଠାରେ ସ୍ୱାୟତ୍ତ ଶାସନ ଦିବସ ପାଳନ କରିଛି |ପୌର ପରିଷଦ ଗଠନ କୁ 50 ବର୍ଷ ପୁରିଥିବା ବେଳେ ପବିତ୍ର ଗଣେଶ ଚତୁର୍ଥୀ ଅବସରରେ ଏହି କାର୍ଯ୍ୟକ୍ରମ ବହୁ ଆଡମ୍ବର ରେ ପାଳନ କରାଯାଇଛି |ଖୋର୍ଦ୍ଧା ଜିଲ୍ଲାପାଳ ଏସ. କେ. ଚକ୍ରବର୍ତ୍ତୀ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଭୁବନେଶ୍ୱର ଡିସିପି ସମ୍ମାନିତ ଅତିଥି ଭାବେ ଯୋଗ ଦେଇଥିଲେ |ପୌର ନିର୍ବାହୀ ଅଧିକାରୀ ଜଟଣୀ ପୌର ପରିଷଦ ର ସଫଳତା ଉପରେ ବକ୍ତବ୍ୟ ରଖିଥିଲେ |ସ୍ୱଚ୍ଛ ସର୍ବେକ୍ଷଣରେ ଜଟଣୀ ପୌର ପରିଷଦ ସାରା ରାଜ୍ୟରେ ଏକ ନମ୍ବର ସ୍ଥାନ ଅକ୍ତିଆର କରିଥିବା ବେଳେ ସର୍ବ ଭାରତୀୟ ସ୍ତରରେ 6 ନମ୍ବର ସ୍ଥାନରେ ରହିଛି |ସେହିଭଳି ରାଜ୍ୟ ସରକାର ଙ୍କର ମୁକ୍ତା ଯୋଜନା ହେଉ ଅଥବା ବିଜୁ ଆଦର୍ଶ କଲୋନୀ ର ଉନ୍ନତି କରଣ ସବୁଥିରେ ଆଗୁଆ ରହିଛି ଜଟଣୀ ପୌର ପରିଷଦ |ଭୁପୃଷ୍ଠ ଜଳକୁ ଉପଯୋଗ, ରାତ୍ରିକାଳୀନ ସଫେଇ, ସହର ସୌନ୍ଦର୍ଯ୍ୟ କରଣ ସବୁଥିରେ ପୌର ପରିଷଦ ଉଲ୍ଲେଖନୀୟ ଦକ୍ଷତା ଦେଖାଇଛି | ଅନ୍ୟ ପଟରେ ମହିଳା ସଶକ୍ତି କରଣରେ ମଧ୍ୟ ଜଟଣୀ ପୌର ପରିଷଦ ଖୁବ ସଫଳତା ହାସଲ କରିଛି |ବହୁ ସଂଖ୍ୟାରେ ସ୍ୱୟଂ ସହାୟକ ମହିଳା ଗୋଷ୍ଠୀ ମାନ ତିଆରି କରି ସେମାନଙ୍କୁ ସ୍ୱାବଲମ୍ବୀ କରିବା ସହ ଆର୍ଥିକ ସ୍ତରରେ ସୁଧାର ଆଣିପାରିଛି |

ଏହି କାର୍ଯ୍ୟକ୍ରମ ରେ ଖୋର୍ଦ୍ଧା ଜିଲ୍ଲା ପ୍ରକଳ୍ପ ନିର୍ଦ୍ଧେଶକ ଦିଗନ୍ତ ରାଉତରାୟ ମଧ୍ୟ ପୌର ପରିଷଦର ସଫଳତା କୁ ନେଇ ଖୁବ ପ୍ରଶଂସା କରିଥିଲେ |ଗତକାଲି ଜଟଣୀ କାଉନସିଲ ଏକାଦଶ ଏବଂ ଜଟଣୀ ସାମ୍ବାଦିକ ଏକାଦଶ ମଧ୍ୟରେ ହୋଇଥିବା କ୍ରିକେଟ ମ୍ୟାଚରେ ବିଜୟୀ ହୋଇଥିବା ସାମ୍ବାଦିକ ଏକାଦଶ ଙ୍କୁ ଜିଲ୍ଲାପାଳ ଟ୍ରଫି ପ୍ରଦାନ କରିଥିଲେ |

ପୌର ଅଧକ୍ଷ ଅନନ୍ତ ବେହେରା, ନିର୍ବାହୀ ଅଧିକାରୀ ଦିଲୀପ ମହାନ୍ତି, ଉପାଧ୍ୟକ୍ଷା ଆରତୀ ରାଉତ, ଏସିପି ରଜତ ରାୟ, ଜଟଣୀ ଥାନାଧିକାରୀ ସୌମ୍ୟ କାନ୍ତ ବଳିୟାରସିଂ, ପୌର ପରିଷଦର ସମସ୍ତ କାଉନସିଲର ଏବଂ ଅନ୍ୟମାନେ ଉପସ୍ଥିତ ଥିଲେ |ତେବେ ଏକାସାଙ୍ଗରେ ପୌର ପରିଷଦର 50 ବର୍ଷ ପୂର୍ତ୍ତି, ଗଣେଶ ଚତୁର୍ଥୀ ଏବଂ ସ୍ୱାୟତ୍ତ ଶାସନ ଦିବସ ପଡୁଥିବାରୁ ଜଟଣୀ ପୌର ପରିଷଦ ଅଞ୍ଚଳ ମହା ଆଡମ୍ବରରେ ଏସବୁର ଆୟୋଜନ କରିଥିଲା |