ଚା କୋଟି ଓଡ଼ିଆଙ୍କ ଆରାଧ୍ୟ ପ୍ରଭୁ ଜଗନ୍ନାଥଙ୍କୁ ତୁଚ୍ଛା ରାଜନୀତି ପାଇଁ ଅପମାନିତ କରିବାର ଅଧିକାର ବିଜେପି ନେତାଙ୍କୁ କିଏ ଦେଲା – କଂଗ୍ରେସ

ଭୁବନେଶ୍ୱର ତା. ୨୨.୫- ପୁରୀ ସଂସଦୀୟ କ୍ଷେତ୍ରର ବିଜେପି ପ୍ରାର୍ଥୀ ସମ୍ବିତ ପାତ୍ରଙ୍କ ବୟାନ
“ମୋଦୀଙ୍କ ଭକ୍ତ ଜଗନ୍ନାଥ” ସନାତନ ଧର୍ମର ପ୍ରତିଟି ବ୍ୟକ୍ତିଙ୍କୁ ଆଘାତ ଓ ବ୍ୟଥିତ କରିଛି । କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ବୟାନ “ମୋଦୀଙ୍କ ପାଇଁ କୋଣାର୍କ ବିଶ୍ୱପ୍ରସିଦ୍ଧ ହେଲା” ମଧ୍ୟ ସମାନ ଢ଼ଙ୍ଗରେ ଓଡ଼ିଶାବାସୀଙ୍କୁ ବ୍ୟଥିତ କରିଛି । ପ୍ରଥମେ ଭଗବାନ ଶ୍ରୀରାମଙ୍କ ପ୍ରତିକୃତିକୁ ବିଭିନ୍ନ ପ୍ରଚାରପତ୍ର ଏବଂ ବିଜେପି ଅଫିସିଆଲ ସୋସିଆଲ ମିଡିଆ ଆକାଉଂଟରେ ଛୋଟ ଦେଖାଇ ମୋଦୀଙ୍କୁ ବଡ଼ ଦେଖାଇବା ପରେ ଜଗତର ନାଥ ଜଗନ୍ନାଥଙ୍କୁ ଅପମାନିତ କରିବା ଏବଂ ଅର୍କକ୍ଷେତ୍ର କୋଣାର୍କ ପ୍ରତି ଅରୁଚିକର ମନ୍ତବ୍ୟ ଦେବା ଭାରତୀୟ ଜନତା ପାର୍ଟି ଏବଂ ତାଙ୍କର ନେତାମାନଙ୍କର ନୀଚ ମାନସିକତାର ସ୍ପଷ୍ଟ ଉଦାହରଣ । ବିଦାୟୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ବିଜେପିର ଅନ୍ୟାନ୍ୟ ନେତା ଓଡ଼ିଶାକୁ ଅପମାନିତ କରି ନିଜର ରାଜନୈତିକ ଲାଭ ପାଇଁ ଧର୍ମକୁ ଆୟୁଧ କରିବାର ଯେଉଁ ପ୍ରୟାସ କରୁଛନ୍ତି ତାହା ଓଡ଼ିଶାବାସୀ କେବେ ଗ୍ରହଣ କରିବେ ନାହିଁ ବୋଲି ଆଜି ପ୍ରଦେଶ କଂଗ୍ରେସ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏଆଇସିସି ଗଣମାଧ୍ୟମ ବିଭାଗର ଅଧ୍ୟକ୍ଷ ଶ୍ରୀ ପୱନ ଖେରା କହିଛନ୍ତି । ସମ୍ବିତ ପାତ୍ର ସେହି ବ୍ୟକ୍ତି ଯିଏକି ଆଗରୁ ମୋଦୀଙ୍କୁ ଦେଶର ବାପା କହି ବିବାଦ ସୃଷ୍ଟି କରିଥିଲେ । ସେ ଆହ୍ୱାନ ଦେଇ କହିଛନ୍ତି ଯେ ଯଦି ମୋଦୀଙ୍କର ସତସାହସ ଅଛି ଏବଂ ସମ୍ବିତ ପାତ୍ରଙ୍କ ମତ ସହିତ ସେ ଏକମତ ନୁହଁନ୍ତି ତାହାହେଲେ ଅବିଳମ୍ବେ ତାଙ୍କୁ ଦଳରୁ ବରଖାସ୍ତ କରନ୍ତୁ । ଦେଶରେ ୪୫ ବର୍ଷର ସର୍ବାଧିକ ବେରୋଜଗାରୀ ଓ କେନ୍ଦ୍ର ସରକାରଙ୍କ ଅଧିନସ୍ଥ ବିଭିନ୍ନ ବିଭାଗରେ ୩୦ ଲକ୍ଷରୁ ଉର୍ଦ୍ଧ୍ୱ ସରକାରୀ ପଦବୀ ଖାଲି ପଡ଼ିଛି । ଦରଦାମ ନିୟନ୍ତ୍ରଣ କରିବାରେ ସଂପୂର୍ଣ୍ଣ ବିଫଳ ହୋଇଛି ମୋଦୀ ସରକାର । ପ୍ରଧାନମନ୍ତ୍ରୀ ଚାଷୀଙ୍କ ଆୟକୁ ଦ୍ୱିଗୁଣିତ କରିବା ପାଇଁ ଦେଇଥିବା ପ୍ରତିଶ୍ରୁତି ଆଜି ପ୍ରତାରଣା ପାଲଟିଛି । ପ୍ରତିଟି ବର୍ଗପ୍ରତି ଅନ୍ୟାୟ କରିଥିବା ପ୍ରଧାନମନ୍ତ୍ରୀ ନିଜର ଦୋଷ ତ୍ରୁଟିକୁ ଲୁଚାଇବାପାଇଁ ବକ ଧାର୍ମିକ ସାଜିଛନ୍ତି । ଦେଶରେ ବିଦ୍ୱେଷର ବିଷ ମଞ୍ଜି ବୁଣୁଥିବା ଶକ୍ତିକୁ ଦେଶର ଜନସାଧାରଣ ଏହି ନିର୍ବାଚନରେ ଉଚିତ ଜବାବ ଦେବେ ବୋଲି ଶ୍ରୀ ଖେରା କହିଛନ୍ତି । ରାଜ୍ୟରେ ୨୪ ବର୍ଷଧରି ଶାସନ କରୁଥିବା ନବୀନ ସରକାର ମୋଦୀଙ୍କ ହାତବାରିସି ସାଜିଛନ୍ତି । ସଂସଦରୁ ସଂସଦ ବାହାର ପର୍ଯ୍ୟନ୍ତ ଉଭୟ ଦଳ ଭିତରେ ଥିବା ସଲାସୁତରା ଓଡ଼ିଶାବାସୀଙ୍କ ସାମନାରେ ଉଜାଗର ହୋଇଛି । ଉଭୟ ଦଳ ମିଳିମିଶି ଓଡ଼ିଶାକୁ ଲୁଟ କରିବାପାଇଁ ପଣ କରିଛନ୍ତି । ଓଡ଼ିଶାବାସୀ ଏମାନଙ୍କର ଚାଲ ଚରିତ୍ରକୁ ବୁଝି ଉଭୟଙ୍କୁ ପ୍ରତ୍ୟାଖାନ କରିବା ସହ ସେମାନଙ୍କର ଅଧିକାର ପାଇଁ ଲଢ଼େଇ କରୁଥିବା କଂଗ୍ରେସ ଦଳକୁ ଗ୍ରହଣ କରିବେ ବୋଲି ମୋର ଦୃଢ଼ ଆଶା ବୋଲି ଶ୍ରୀ ଖେରା କହିଥିଲେ ।
ଜନତାଙ୍କ ପ୍ରତି ହୋଇଥିବା ଅନ୍ୟାୟ ବିରୁଦ୍ଧରେ କଂଗ୍ରେସ ନ୍ୟାୟର ଗ୍ୟାରେଟିଂ ଦେଇଛି । କଂଗ୍ରେସର ୫ ନ୍ୟାୟ ଓ ୨୫ ଗ୍ୟାରେଟିଂକୁ ଦେଶବାସୀ ଅକୁଣ୍ଠ ସମର୍ଥନ ଦେଉଛନ୍ତି । ଯୁବ ନ୍ୟାୟରେ ୩୦ଲକ୍ଷ ସରକାରୀ ପଦବୀ ପୂରଣ କରିବା, ପ୍ରଥମ ଚାକିରୀ ସ୍ଥିର ନିଶ୍ଚିତ କରି ବାର୍ଷିକ ଏକଲକ୍ଷ ଟଙ୍କା ପ୍ରଦାନ କରିବା, ନାରୀ ନ୍ୟାୟରେ ପ୍ରତ୍ୟେକ ପରିବାର ମୁଖ୍ୟ ମହିଳମାନଙ୍କୁ ବାର୍ଷିକ ଏକଲକ୍ଷ ଟଙ୍କା ପ୍ରଦାନ, ଶ୍ରମିକ ନ୍ୟାୟରେ ମନରେଗା କାର୍ଯ୍ୟପାଇଁ ଦିନକୁ ସର୍ବନିମ୍ନ ୪୦୦ ଟଙ୍କାର ମଜୁରୀ ଓ ସ୍ୱାସ୍ଥ୍ୟ ବୀମା, କୃଷକ ନ୍ୟାୟରେ ଚାଷୀ କରିଥିବା କୃଷିଋଣ ଛାଡ଼ କରିବା ସହିତ ଏମଏସପିକୁ ଆଇନଗତ ଗ୍ୟାରେଟିଂ ପ୍ରଦାନ କରିବା ଓ ଅନୁସୂଚିତ ଜାତି, ଜନଜାତି, ଓବିସି ଏବଂ ଅତି ପଛୁଆବର୍ଗଙ୍କୁ ଜନସଂଖ୍ୟା ଅନୁପାତରେ ସାମାଜିକ ଭାଗିଦାରୀ ସ୍ଥିର ନିଶ୍ଚିତ କରିବା କଂଗ୍ରେସର ଗ୍ୟାରେଟିଂ । କୋରାପୁଟ ମାନ୍ୟବର ସାଂସଦ ଶ୍ରୀ ସପ୍ତଗିରି ଉଲ୍ଲାକା କହିଥିଲେ ଯେ ଚଳିତ ନିର୍ବାଚନରେ ଉଭୟ ରାଜ୍ୟ ଓ କେନ୍ଦ୍ରରେ କଂଗ୍ରେସ ସରକାର ଗଠନ କରିବାକୁ ଯାଉଛି । ଆଜିର ଏହି ସାମ୍ବାଦିକ ସମ୍ମିଳନୀରେ ଗଣମାଧ୍ୟମ ଓ ଯୋଗାଯୋଗ ବିଭାଗ ଅଧ୍ୟକ୍ଷ ଡ. ବିଶ୍ୱରଞ୍ଜନ ମହାନ୍ତି, ଏଆଇସିସି ମିଡିଆ ସଂଯୋଜକ ପ୍ରଭାତ କୁମାର, ରିତୁ ଚୌଧୁରୀ, ପିସିସି ଗଣମାଧ୍ୟମ ବିଭାଗ ସମ୍ପାଦକ ପ୍ରଶାନ୍ତ ଶତପଥି, ସାମାଜିକ ଗଣମାଧ୍ୟମ ବିଭାଗ ଅଧ୍ୟକ୍ଷ ଅମିୟ ପାଣ୍ଡବ ଓ ମୁଖପାତ୍ର ରଜନୀ କୁମାର ମହାନ୍ତି ପ୍ରମୁଖ ଉପସ୍ଥିତି ଥିଲେ ।