କଟକ(ପ୍ରବାହ ନ୍ୟୁଜ୍) : ଚଳିତ ସାଧାରଣ ନିର୍ବାଚନରେ ଶତ ପ୍ରତିଶତ ଭୋଟ ଦାନ ଲକ୍ଷ୍ୟରେ କଟକ ଜିଲ୍ଲା ପ୍ରଶାସନ ପକ୍ଷରୁ ବିଭିନ୍ନ ପ୍ରକାରର ସଚେତନତାମୂଳକ ପଦକ୍ଷେପ ହାତକୁ ନିଆଯାଉଛି । ଏହି କ୍ରମରେ ମତଦାନ ବୃଦ୍ଧି ନିମନ୍ତେ ଭାରତୀୟ ନିର୍ବାଚନ ଆୟୋଗ ଏବଂ ରାଜ୍ୟ ନିର୍ବାଚନ ଅଧିକାରୀଙ୍କ ନିର୍ଦ୍ଦେଶକ୍ରମେ କଟକ ଜିଲ୍ଲା ପ୍ରଶାସନ ପ୍ରୟାସରେ ଅଭିନବ ଶୈଳୀରେ ଭୋଟର ସଚେତନତା କାର୍ଯ୍ୟକ୍ରମ ଆରମ୍ଭ କରାଯାଇ ଏଲପିଜି ସିଲିଣ୍ଡରଗୁଡିକରେ ମତାଧିକାର ସାବ୍ୟସ୍ତ କରିବାର ବାର୍ତା ପ୍ରଚାର କରାଯାଉଛି । ଜିଲ୍ଲାର ସମସ୍ତ ଯୋଗ୍ୟ ଭୋଟର ଆଗେଇ ଆସି ନିଜର ମତ ସାବ୍ୟସ୍ତ କରି ଗଣତାନ୍ତ୍ରିକ ବିଧିବ୍ୟବସ୍ଥାକୁ ମଜବୁତ୍ କରିବା ସହିତ ମତଦାନ କରିବାର ଅତୁଳନୀୟ ଅନୁଭୂତି ସାଉଁଟିବାକୁ ଏହି ବାର୍ତାରେ କୁହାଯାଇଛି । କଟକ ଜିଲ୍ଲାର ସଂସଦୀୟ କ୍ଷେତ୍ର ଅନ୍ତର୍ଗତ ବାରବାଟୀ-କଟକ, ଚୌଦ୍ୱାର-କଟକ, କଟକ ସଦର, ବଡମ୍ବା, ବାଙ୍କୀ ଏବଂ ଆଠଗଡ ବିଧାନସଭା ଆସନ ନିମନ୍ତେ ଆସନ୍ତା ମଇ ୨୫ ତାରିଖରେ ମତଦାନ ପାଇଁ ନିର୍ବାଚନ ତାରିଖ ଚୂଡାନ୍ତ ହୋଇଛି । ଏହି ଏଲପିଜି ସିଲିଣ୍ଡରଗୁଡିକରେ ଭୋଟଦାନ ତାରିଖ ମଇ ୨୫ ତାରିଖକୁ ମନେ ରଖବା ନିମନ୍ତେ ବାର୍ତା ମଧ୍ୟ ଉଲ୍ଲେଖ ରହିଛି । କଟକ ସହରରେ ଅଧିକରୁ ଅଧିକ ସଂଖ୍ୟାରେ ଭୋଟର ମତଦାନ ପ୍ର୍ରକ୍ରିୟାରେ ଅଂଶଗ୍ରହଣ କରିବାକୁ ଜିଲ୍ଲା ପ୍ରଶାସନ ପକ୍ଷରୁ ଅନୁରୋଧ କରାଯାଇଛି ।
