ଦଣ୍ଡ ପ୍ରଣାମ ସହିତ ନିଆରା ଶୈଳୀରେ ସ୍ଥାୟୀ ନିଯୁକ୍ତି ଓ ମାସିକ ପ୍ରୋତ୍ସାହନ ଦାବିରେ ଗାଁସାଥୀଙ୍କ ସାମ୍ବାଦିକ ସମ୍ମିଳନୀ
ଭୁବନେଶ୍ୱର, ପ୍ରବାହ ନ୍ୟୁଜ୍ : ପଞ୍ଚାୟତିରାଜ ବିଭାଗ ସମେତ ରାଜ୍ୟ ସରକାରଙ୍କର ବିଭିନ୍ନ ବିଭାଗରେ ଯୋଗ୍ୟତା ଅନୁସାରେ ସ୍ଥାୟୀ ନିଯୁକ୍ତି ଓ ନ୍ୟାୟ ଆଶାୟୀ ସମସ୍ତ ଗାଁସାଥୀ (ମେଟ୍)ଙ୍କୁ ସଠିକ୍ ଚିହ୍ନଟ କରି ମାସିକ ୧୨ ହଜାରରୁ ଊର୍ଦ୍ଧ୍ୱ ପ୍ରୋତ୍ସାହନ ରାଶି ପ୍ରଦାନ ଦାବିରେ ଗାଁସାଥୀ ସଂଘ ତରଫରୁ ଏକ ସ୍ୱତନ୍ତ୍ର ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଅଛି । ଗାଁସାଥୀ (ମେଟ୍) ସଂଘ ମିଳିତ କ୍ରିୟାନୁଷ୍ଠାନ କମିଟି, ଓଡ଼ିଶା ପ୍ରଦେଶର ସଭାପତି ଶ୍ରୀ ଲକ୍ଷ୍ମୀଧର ବିଶ୍ୱାଳଙ୍କ ଅଧ୍ୟକ୍ଷତାରେ ସ୍ଥାନୀୟ ଉତ୍କଳ ସାମ୍ବାଦିକ ଭବନ ପରିସରରେ କିଛି ନିଆରା ଶୈଳୀରେ ଉକ୍ତ କାର୍ଯ୍ୟକ୍ରମ ସମାପିତ ହୋଇଯାଇଛି । ସାରା ଓଡ଼ିଶାରୁ ଆସିଥିବା ଶତାଧିକ ଗାଁସାଥୀ (ମେଟ୍) ସଂଗଠକମାନେ ଓଡ଼ିଶାର ମାନନୀୟ ମୁଖ୍ୟମନ୍ତ୍ରୀ ଓ ପଞ୍ଚାୟତିରାଜ ମନ୍ତ୍ରୀଙ୍କ ଉଦ୍ଦେଶ୍ୟରେ ଅବିଳମ୍ବେ ଗାଁସାଥୀ (ମେଟ୍)ଙ୍କର ସ୍ଥାୟୀ ନିଯୁକ୍ତି ଓ ମାସିକ ପ୍ରୋତ୍ସାହନ ପାଇଁ ହୋଇଥିବା ସରକାରୀ ପ୍ରକ୍ରିୟାକୁ ଚୂଡାନ୍ତ ରୂପଦେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ କରିବା ଲାଗି ସେହି ସାମ୍ବାଦିକ ଭବନରୁ ଥାଇ ମୁଣ୍ଡରେ ଗୋଲାପି ରିବନ୍ ବାନ୍ଧି ଦଣ୍ଡ ପ୍ରଣାମ ସହିତ ଦୃଢ ନିବେଦନ ଜଣାଇଛନ୍ତି । ମାନନୀୟ ମୁଖ୍ୟମନ୍ତ୍ରୀଙ୍କର ପୂର୍ବ ପ୍ରତିଶ୍ରୁତି, ବିଜେପିର ଇସ୍ତାହାର ଲେଖା, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଜୀଙ୍କ ଚିଠି ଓ ବିଜେପିର ଯଶସ୍ୱୀ ରାଜ୍ୟ ସଭାପତି ଶ୍ରୀ ମନମୋହନ ସାମଲଙ୍କ ଚିଠିକୁ ସମ୍ମାନ ଦେଇ ଗାଁସାଥୀ (ମେଟ୍)ଙ୍କ ଚାକିରୀ ପ୍ରଦାନ ପ୍ରସଙ୍ଗରେ ହୋଇଥିବା ଫାଇଲିଂକୁ ତୁରନ୍ତ ଆଗେଇ ନେଇ କ୍ୟାବିନେଟ୍ ନିଷ୍ପତ୍ତି ପରେ ବିଜ୍ଞପ୍ତି ପ୍ରକାଶ ଲାଗି ସଂଘ ଦୃଢ ଦାବି ଜଣାଉଅଛି । ଏହି ବାବଦରେ ବିଭିନ୍ନ ମୋସନ ଜରିଆରେ ୨୯ ମାର୍ଚ୍ଚରେ ଓଡ଼ିଶା ବିଧାନସଭାରେ ସ୍ୱର ଉତ୍ତୋଳନ ପାଇଁ ବିଧାନସଭାର ମାନ୍ୟବର ବିଧାୟକ ଓ ବିଧାୟିକାମାନଙ୍କୁ ସଂଘ ତରଫରୁ ବିନମ୍ର ଅନୁରୋଧ ଜଣାଇ ଦିଆଯାଉଅଛି । ରାଜ୍ୟ ସରକାର ଖୁବ୍ଶୀଘ୍ର ଗାଁସାଥୀ (ମେଟ୍)ଙ୍କର ମାସିକ ଦରମା ପ୍ରାପ୍ତି ଦାବିର ଚୂଡ଼ାନ୍ତ ନିଷ୍ପତ୍ତି ନ ନେଲେ, ରାଜ୍ୟର ହଜାର ହଜାର ଲିଗାଲ୍ ଗାଁସାଥୀ (ମେଟ୍) ମାନେ ଯଦି କିଛି ଚରମ ନିଷ୍ପତ୍ତି ନିଅନ୍ତି, ସେଥିପାଇଁ ନିଶ୍ଚିତ ସରକାର ଦାୟୀ ରହିବେ ବୋଲି ସଂଘର ଉପସ୍ଥିତ ସଂଗଠକମାନେ ନମ୍ରତାର ସହିତ ଗଣମାଧ୍ୟମ ଜରିଆରେ ଜଣାଇଛନ୍ତି । ଆଜିର କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସଂଘର ରାଜ୍ୟ ସାଧାରଣ ସମ୍ପାଦକ ଶ୍ରୀ ବିବେକାନନ୍ଦ ଠାକୁର, ଗାଁସାଥୀ ସଂଗଠକ ପ୍ରତାପ କୁମାର ଦଳେଇ, ନୟନା ନାୟକ, ମଙ୍ଗୁଳୁ ରଣା, ଦୁର୍ଯ୍ୟୋଧନ ହଂସ, ଅନାମ ଚରଣ ରାଉତ, ଅନୀଲ କୁମାର ଜେନା, ସୁରେଶ ସାମଲ, ପ୍ରତାପ ପରିଡ଼ା, ପ୍ରଫୁଲ୍ଲ ସ୍ୱାଇଁ, ଉମେଶ ସାହୁ, ପ୍ରତାପ ପଢ଼ିଆରୀ, ମଙ୍ଗଳସାଇ ଭତ୍ରା, ରାମଚନ୍ଦ୍ର ଏଡିଙ୍ଗ୍, ଦୀନବନ୍ଧୁ ମହାନ୍ତ, ଦେବାନନ୍ଦ ଟାକ୍ରୀ, ବିଚିତ୍ର ମଲ୍ଲିକ, ନିକୁଞ୍ଜ ମହାରଣା, ପ୍ରତିମା ସାହୁ, ସୁରେଖା ପାଇଟାଲ୍, ସୁକାନ୍ତ ରାଉତ, ମୀନାକୁମାରୀ ସିଂହ, ତରୁଣ ନାୟକ, କିଆମଣି ନାୟକ, ସୁନୀତା ଦେଓଗାମ୍, ସାଗର ପଲାଇ, ରାମସ୍ୱାମୀ ପିଡ଼ିକା, ସୋମନାଥ ଶବର, ସଂଜୟ ବାରିକ, ଆନ୍ତା ମୁର୍ମୁ, ରାମଚନ୍ଦ୍ର ବିଶୋଇ, ଶଶଥର ସେଠୀ, ଅଜୟ ସ୍ୱାଇଁ ସଂଜୟ ବାରିକ, ଶ୍ରୀନିବାସ ହାତୀ, ପ୍ରକାଶ ବୁଦ୍ଧିଆ, କରୁଣାକର କିସ୍କୋ ଓ ଶତାଧିକ ସଂଗଠକ ଉପସ୍ଥିତ ଥିଲେ ।
