ସଚେତନତା ଧର୍ମୀ ଚଳଚ୍ଚିତ୍ର “ଆସକ୍ତ’ର ସ୍କ୍ରିନିଙ୍ଗ୍ ଅନୁଷ୍ଠିତ
ଭୁବନେଶ୍ୱର, ତା ୨୭ା୪ା୨୦୨୪ : ନିଶା ସେବନ ଆଧୁନିକ ସମାଜର ବିପର୍ଯ୍ୟୟର କାରଣ ମଧ୍ୟରୁ ଅନ୍ୟତମ । ଏହା ଏକ ସାମାଜିକ ବ୍ୟାଧି । ଏହା ସମାଜରେ ଅପରାଧ ବୃଦ୍ଧି ଘଟାଇବା ସହ ଜାତୀୟ ପ୍ରଗତିରେ ବାଧା ଉପୁଜାଏ, ଯୁବ ଓ ଛାତ୍ର ସମାଜର ଭବିଷ୍ୟତକୁ ଅନ୍ଧକାର ଭିତରକୁ ଠେଲିଦିଏ । ଏଥିପାଇଁ ଏହାର ସଚେତନତା କରାଇବା ନିହାତି ଜରୁରୀ । ସାମାଜିକ ଅନୁଷ୍ଠାନ \”କର ଫାଉଣ୍ଡେସନ୍\’ ତରଫରୁ ବିଭିନ୍ନ ସମୟରେ ନିଶା ସେବନ ବିରୁଦ୍ଧରେ ସଚେତନତା କାର୍ଯ୍ୟକ୍ରମ ସଚେତନତା ପଦଯାତ୍ରା ମାଧ୍ୟମରେ ଓ ଭିଡ଼ିଓ ମାଧ୍ୟମରେ ଜାରି ରହିଛି । ଯେହେତୁ ଚଳଚ୍ଚିତ୍ରଟି ଲୋକମାନଙ୍କ ପାଖରେ ପହଞ୍ôଚବାର ଏକ ଉତ୍ତମ ମାଧ୍ୟମ, ତେଣୁ ଜଣାଶୁଣା ଅଭିନେତା ତଥା କର ଫାଉଣ୍ଡେସନ୍ର ଅଧ୍ୟକ୍ଷ ଚନ୍ଦନ କରଙ୍କ ଉଦ୍ୟମ ଓ ଏଫ.ଏମ୍.ଡି. ଫିଲ୍ମସ୍ ଦ୍ୱାରା ଏକ ସଚେତନତାମୂଳକ ଚଳଚ୍ଚିତ୍ର \”ଆସକ୍ତ\’ ନିର୍ମାଣ କରାଯାଇଛି । ଆଜି ଏହାର ସ୍ପେସିଆଲ୍ ସ୍କ୍ରିନିଙ୍ଗ୍ ଭୁବନେଶ୍ୱରସ୍ଥିତ ଜୟଦେବ ଭବନ ପରିସରରେ ଅନୁଷ୍ଠିତ ହୋଇଯାଇଛି । ଏଥିରେ ବିଭିନ୍ନ କଲେଜର ଛାତ୍ରଛାତ୍ରୀ, ସାମାଜିକ ଅନୁଷ୍ଠାନ, ସାମାଜିକ କର୍ମୀ ପ୍ରମୁଖ ଯୋଗଦେବା ସହ ଏହି ଚଳଚ୍ଚିତ୍ରର ଭୂୟସୀ ପ୍ରଶଂସା କରିଥିଲେ ଓ ଏହା ଓଡ଼ିଶାର ସବୁ ଜାଗାରେ ପ୍ରଦର୍ଶିତ ହେବା ଉଚିତ୍ ବୋଲି କହିଥିଲେ ।
ଏହି ଚଳଚ୍ଚିତ୍ରରେ ଅଭିନେତା ଚନ୍ଦନ କର, ଜ୍ଞାନ ବାରିକ, ସୁରଭି ପ୍ରିୟଦର୍ଶନୀ, ଦୀପକ ମହାରଣା, ମାନସ ମିଶ୍ର, କୁସୁମ ତ୍ରିପାଠୀ ପ୍ରମୁଖ ନିଖୁଣ ଅଭିନୟ କରିଛନ୍ତି । ଚଳଚ୍ଚିତ୍ରଟିର ନିର୍ଦ୍ଦେଶନା ଦେଇଛନ୍ତି ରାକେଶ ସାମଲ ଓ କ୍ରିଏଟିଭ୍ ଦାୟିତ୍ୱ ତୁଲାଇଛନ୍ତି ସାଇ ପ୍ରସାଦ ପଣ୍ଡା । ପୂର୍ବତନ ବିଧାୟକ ଦିଲ୍ଲୀପ ଶ୍ରୀଚନ୍ଦନ, ସାମାଜିକ କର୍ମୀ ନିରୋଜା ଲକ୍ଷ୍ମୀ ମହାପାତ୍ର, ବିନ୍ଦୁଜା ଉପାଧ୍ୟାୟ ଓ ମଧୁସ୍ମିତା ଦାସ ଏହି ଚଳଚ୍ଚିତ୍ରଟିକୁ ଭୂୟସୀ ପ୍ରଶଂସା କରିବା ସହ ସାମ୍ପ୍ରତିକ ସମୟରେ ଏହା ଜରୁରୀ ବୋଲି କହିବା ସହ ନିର୍ମାତା ଟିମ୍କୁ ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧନା ପ୍ରଦାନ କରିଥିଲେ ।
