ଜୁପିଟର ଆନ୍ତର୍ଜାତୀୟ ବିଦ୍ୟାଳୟ ପରିସରରେ ସୀମା ସୁରକ୍ଷା ବାହିନୀ ଦ୍ୱାରା ଗୁରୁଦିବସ ପାଳିତ

ରାୟଗଡ଼ା:୨/୯(ପ୍ରବାହ ନିଉଜ) ଶୁକ୍ରବାର ଦିନ ସୀମା ସୁରକ୍ଷା ବାହିନୀ ଦ୍ୱାରା ଜୁପିଟର ଆନ୍ତର୍ଜାତୀୟ ବିଦ୍ୟାଳୟ ପରିସରରେ ଗୁରୁ ଦିବସ ପାଳିତ ହୋଇଯାଇଛି। ଏହି ଅବସରରେ ସୀମା ସୁରକ୍ଷା ବାହିନୀର ବିଭିନ୍ନ ଅସ୍ତ୍ରଶସ୍ତ୍ର ଓ ଉପକରଣ ପ୍ରଦର୍ଶିତ କରାଯାଇଥିଲା ।

ଉକ୍ତ କାର୍ଯ୍ୟକ୍ରମ ବିଶିଷ୍ଠ ଶିକ୍ଷାବିତ ଡ଼ଃ ସର୍ବପଲ୍ଲୀ ରାଧାକ୍ରିଷ୍ଣନ ତଥା ମା ସରସ୍ବତୀଙ୍କ ତୈଳଚିତ୍ର ସମ୍ମୁଖରେ ପ୍ରଦୀପ ପ୍ରଜ୍ବଳନ ସହ ପ୍ରାରମ୍ଭ ହୋଇଥିଲା। ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟତ୍ରୀ ଓ ଛାତ୍ର ଛାତ୍ରୀ ମାନେ କାର୍ଯ୍ୟକ୍ରମରେ ପ୍ରଦର୍ଶିତ ସମସ୍ତ ଉପକରଣକୁ ନିରୀକ୍ଷଣ କରିବା ସହ ଏହାର ବ୍ୟବହାର ସଂପର୍କରେ ପଚାରି ବୁଝିଥିଲେ। ୯ ଏମ.ଏମ ପିସ୍ତଲ , ହେଲିକ୍ୟାପ୍ଟରରେ ବ୍ୟବହୃତ ହେଲମେଟ ଓ ତାପ ରହିତ ହାତ ଗ୍ଲୋବ ଠାରୁ ଆରମ୍ଭ କରି ପାହାଡ଼ରେ ଚଢିବା ଓ ଓଲ୍ଲାଇବା ପାଇଁ ବ୍ୟବହୃତ ଦଉଡି ଏବଂ ଏ.କେ. ୪୭ ରାଇଫଲ ଇତ୍ୟାଦି ପରି ଯୁଦ୍ଧ ଉପକରଣ ପ୍ରଦର୍ଶିତ ହୋଇଥିଲା।

ନବମ ଶ୍ରେଣୀ ଠାରୁ ନେଇ ଦ୍ୱାଦଶ ଶ୍ରେଣୀର ଛାତ୍ର ଛାତ୍ରୀ ମାନଙ୍କ ପାଇଁ ସୀମା ସୁରକ୍ଷା ବିଷୟରେ ତଥା ଆଦିବାସୀ ଅଧ୍ୟୁଷିତ ଗ୍ରାମ ମାନଙ୍କରେ କରାଯାଉଥିବା ସାମାଜିକ ଅଭିଯାନ ବିଷୟ ସଂପର୍କରେ ଚଳଚିତ୍ର ପ୍ରଦର୍ଶିତ ହୋଇଥିଲା। ଉକ୍ତ କାର୍ଯ୍ୟକ୍ରମରେ ସୀମା ସୁରକ୍ଷା ବାହିନୀ ୯୯ ବାଟାଲିୟନର ଟୁ.ୱାଇ.ସି ଶ୍ରୀ ରବିକାନ୍ତ ଏବଂ ଅଜିତ ପାଲ ସିଂଙ୍କ ସହିତ ଡି.ସି. ଶ୍ରୀ ଉମେଶ ସିଂ ରାଠୋର, ଗୋପାଳ ସିଂ ଓ ଭରତସିଂ ପାଲ ଯୋଗ ଦେଇ ଛାତ୍ରଛାତ୍ରୀ ମାନଙ୍କ ପାଇ ପ୍ରେରଣାର ଉତ୍ସ ସାଜିଥିବା ବେଳେ ଶ୍ରୀ ରବିକାନ୍ତ ଭାରତର ୱାଘା-ଅଟାରୀ ସୀମାରେଖା ଦେଖିବାକୁ ଇଛା ପ୍ରକାଶ କରୁଥିବା ଛାତ୍ରଛାତ୍ରୀ ତଥା ଶିକ୍ଷକ ଶିକ୍ଷୟତ୍ରୀ ମାନଙ୍କୁ ସମସ୍ତ ପ୍ରକାର ସହଯୋଗ କରିବେ ବୋଲି ପ୍ରତିଶ୍ରୁତି ଦେଇଥିଲେ।

ବିଦ୍ୟାଳୟର ଅଧ୍ୟକ୍ଷ ଶ୍ରୀଯୁକ୍ତ ପ୍ରଶାନ୍ତ କୁମାର ପଣ୍ଡା ଗୁରୁଜନ ଓ ପିତା ମାତାଙ୍କୁ ସମ୍ମାନ ଦେଇ ପାଠ ପଢିଲେ ଦେଶ ସେବାରେ ନିଜକୁ ନିୟୋଜିତ କରିପାରିବା ବୋଲି ମତ ରଖିଥିଲେ ଏବଂ ଉକ୍ତ କାର୍ଯ୍ୟକ୍ରମ ଶିକ୍ଷାନଷ୍ଠାନର ବିଦ୍ୟାର୍ଥୀ ମାନଙ୍କ ପାଇଁ ଏକ ପ୍ରେରଣାର ଉତ୍ସ ତଥା ଜୀବନରେ ସମୟାନୁବର୍ତ୍ତିତାର ଏକ ଉଦାହରଣ ବୋଲି ବିଦ୍ୟାଳୟର ପରିଚାଳନା ନିର୍ଦ୍ଦେଶକ ଶ୍ରୀ ଗୋବିନ୍ଦ ପ୍ରସାଦ ରଥ ମତ ଦେଇଛନ୍ତି।

ଏହି ଅବସରରେ ବିଦ୍ୟାଳୟର ଛାତ୍ର ଛାତ୍ରୀ ମାନଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ମଧ୍ଯ ହୋଇଥିଲା । ଉକ୍ତ କ୍ରଯ୍ୟକ୍ରମକୁ ବିଦ୍ୟାଳୟ ର ସମସ୍ତ ଶିକ୍ଷକ ଶିକ୍ଷୟିତ୍ରୀ ସହଯୋଗ କରି ସଫଳ ରୁପ ଦେଇଥିଲେ ।