ଟାଟା ଷ୍ଟିଲ ଫାଉଣ୍ଡେସନ୍ ମେରାମଣ୍ଡଳୀର ମାର୍ଗଦର୍ଶନରେ ଯୁବ ଭଲିବଲ ଖେଳାଳିଙ୍କ ଜାତୀୟ ସ୍ତରରେ ଚମକପ୍ରଦ ପ୍ରଦର୍ଶନ
ମେରାମଣ୍ଡଳୀ, ଡିସେମ୍ବର ୨୧, ୨୦୨୨: ଟାଟା ଷ୍ଟିଲ ଫାଉଣ୍ଡେସନ୍ (ଟିଏସ୍ଏଫ୍) ମେରାମଣ୍ଡଳୀର ଭଲିବଲ ପ୍ରଶିକ୍ଷଣ ଓ ମାର୍ଗଦର୍ଶନ କାର୍ଯ୍ୟକ୍ରମ ଅନ୍ତର୍ଗତ ତାଲିମ ହାସଲ କରିଥିବା ୩ ଜଣ ଭଲିବଲ ଖେଳାଳି ୧୬ଡିସେମ୍ବରରୁ ୨୨ ଡିସେମ୍ବର ମଧ୍ୟରେ ମଧ୍ୟପ୍ରଦେଶର ପାନାଠାରେ ଚାଲିଥିବା ୨୫ତମ ଯୁବ ଜାତୀୟ ଭଲିବଲ ଚମ୍ପିୟନ୍ସିପ୍ରେ ଅଂଶଗ୍ରହଣ କରିବା ଟାଟା ଷ୍ଟିଲ ମେରାମଣ୍ଡଳୀ (ଟିଏସ୍ଏମ୍) ପାଇଁ ଅତ୍ୟନ୍ତ ଗୌରବର ବିଷୟ । ଏହାପୂର୍ବରୁ ଭୁବନେଶ୍ୱରର କିଟ୍ ବିଶ୍ୱବିଦ୍ୟାଳୟରେ ଚାଲିଥିବା ୧୫ ଦିନିଆ ଜାତୀୟ ଚୟନ ଶିବିର ମାଧ୍ୟମରେ ସେମାନେ ଉକ୍ତ ପ୍ରତିଯୋଗିତା ନିମନ୍ତେ ମନୋନୀତ ହୋଇଛନ୍ତି । ଏହି ବାଳକମାନଙ୍କ ମଧ୍ୟରେ ହିନ୍ଦୋଳ ବ୍ଲକ୍ ଖଲିବେରଣା ଗ୍ରାମର ଶ୍ରୀ ସନ୍ତୋଷ ବେହେରାଙ୍କ ପୁଅ ସୁବ୍ରତ ବେହେରା ଓ ଶ୍ରୀ ସୁଦାମ ବେହେରାଙ୍କ ପୁତ୍ର ସମ୍ବିତ ବେହେରା ଏବଂ ରଘୁନାଥପୁର ଗ୍ରାମର ସ୍ୱର୍ଗତ ଶ୍ରୀ ରସାନନ୍ଦ ପାତ୍ରଙ୍କ ପୁତ୍ର ବିକାଶ ପାତ୍ର ଅନ୍ତର୍ଭୁକ୍ତ । ୧୨ ଜଣିଆ ଟିମ୍ରୁ ଏହି ୩ ଜଣ ଟିଏସ୍ଏଫ୍ ପ୍ରଶିକ୍ଷଣ କେନ୍ଦ୍ରରେ ତାଲିମ ହାସଲ କରିଛନ୍ତି । ଏହି ୩ ଜଣ ଖେଳାଳି ପୂର୍ବରୁ ମଧ୍ୟ ଜାତୀୟ ଦଳର ପ୍ରତିନିଧିତ୍ୱ କରିଛନ୍ତି ।
ଟାଟା ଷ୍ଟିଲ ପରାମ୍ପରାଗତ ଭାବେ ୧୦୦ ରୁ ଊର୍ଦ୍ଧ୍ୱ ବର୍ଷ ଧରି କ୍ରୀଡ଼ାର ପ୍ରସାର ଓ ପ୍ରୋତ୍ସାହନ ଦିଗରେ କାର୍ଯ୍ୟ କରିଆସୁଛି । ଏହି ପରମ୍ପରାକୁ ବଜାୟ ରଖି ଟାଟା ଷ୍ଟିଲର କର୍ପୋରେଟ୍ ସାମାଜିକ ଦାୟିତ୍ୱ ବିଭାଗ ଟିଏସ୍ଏଫ୍ ପକ୍ଷରୁ ଢେଙ୍କାନାଳ ପାଶ୍ୱର୍ବର୍ତ୍ତୀ ଅଞ୍ଚଳର ଯୁବ ଓ ପ୍ରତିଭାବାନ ଭଲିବଲ ଖେଳାଳିମାନଙ୍କ ମାର୍ଗଦର୍ଶନ ଓ ପ୍ରୋତ୍ସାହନ କରିଆସୁଛି ।
ଟିଏସ୍ଏମ୍ କାର୍ଯ୍ୟକ୍ଷେତ୍ର ପାଶ୍ୱର୍ବର୍ତ୍ତୀ ଗ୍ରାମର ୭ଟି ଗ୍ରାମ ପଞ୍ଚାୟତର ୧୫ଟି ପାଶ୍ୱର୍ବର୍ତ୍ତୀ ଗ୍ରାମ ଯଥା ମଙ୍ଗଳପୁର, ନୂଆହତା, ନୂଆଗାଁ, ଶିବପୁର, ପାଇକ ପୁରୁଣାକୋଟ, ଖଡ଼ଗପ୍ରସାଦ, କୁଶପଙ୍ଗା ନିକଟସ୍ଥ ଅଞ୍ଚଳର ଭଲିବଲ ଖେଳାଳିମାନଙ୍କୁ ଏକ ଜାତୀୟ ସ୍ତରୀୟ କୋଚ୍ ଆଶୁତୋଷ ପାତ୍ରଙ୍କୁ ନିଯୁକ୍ତ କରାଯାଇ ଜୁନିୟର, ସବ୍-ଜୁନିୟର ଏବଂ ସିନିୟର ଭଳି ୩ଟି ବର୍ଗରେ ୨୦୧୯ ମସିହା ଜୁନ୍ମାସ ଠାରୁ ପ୍ରଶିକ୍ଷଣ ପ୍ରଦାନ କରାଯାଉଛି । ଟିଏସ୍ଏଫ୍ ପକ୍ଷରୁ ଏହି ଯୁବ ଖେଳାଳିଙ୍କ ଉଚ୍ଚାଭୀଳାଷକୁ ପୁରଣ କରିବା ପାଇଁ ସମସ୍ତ ଆବଶ୍ୟକ ଭିତ୍ତିଭୂମି ଯଥା କୋର୍ଟ, କ୍ରୀଡ଼ା ଉପକରଣ ସହିତ ଅନୁକୂଳ ପରିବେଶ ଯୋଗାଇ ଦିଆଯାଇଛି । ସ୍ଥାନୀୟ ଅଞ୍ଚଳରେ ଭଲିବଲର ଅଗ୍ରଗତିକୁ ଦୃଷ୍ଟିରେ ରଖି ବାଳିକାମାନେ ମଧ୍ୟ ଏହା ପ୍ରତି ଆଗ୍ରହ ପ୍ରକାଶ କରିଛନ୍ତି ।
ପୂର୍ବରୁ, ଆବଶ୍ୟକ ଭିତ୍ତିଭୂମିର ଅଭାବ ଯୋଗୁଁ ସନ୍ଧ୍ୟା ପରେ ଖେଳାଳିମାନଙ୍କୁ ଅଭ୍ୟାସ ସମୟରେ ସମସ୍ୟାର ସମ୍ମୁଖୀନ ହେବାକୁ ପଡୁଥିଲା । ଏହାକୁ ଦୃଷ୍ଟିରେ ରଖି ଟିଏସ୍ଏଫ୍ ପକ୍ଷରୁ ଖଲିବେରଣା ଓ ମଙ୍ଗଳପୁର ଗ୍ରାମରେ ଦୁଇଟି ସୌରଚାଳିତ ଭଲିବଲ କୋର୍ଟର ବ୍ୟବସ୍ଥା କରାଯାଇଛି, ଯାହାଫଳରେ ଖେଳାଳିମାନଙ୍କୁ ରାତ୍ରି ସମୟରେ ଅଭ୍ୟାସ କରିବାରେ ସମସ୍ୟାର ସମ୍ମୁଖୀନ ହେବାକୁ ପଡୁନାହିଁ । ଭଲିବଲ ଧିରେ ଧିରେ ଏହି ସ୍ଥାନୀୟ ଗ୍ରାମୀଣ ଅଞ୍ଚଳର କ୍ରୀଡ଼ା ଦୃଶ୍ୟପଟକୁ ରୂପାନ୍ତରିତ କରିବା ସହିତ ସ୍ଥାନୀୟ କ୍ରୀଡ଼ା ପ୍ରତିଭାଙ୍କ ବିକାଶରେ ସହାୟକ ହେଉଛି ।
ଟିଏସ୍ଏଫ୍କୁ ଏହାର ସହଯୋଗ ପାଇଁ ଧନ୍ୟବାଦ ଜଣାଇ ଖେଳାଳି ସୁବ୍ରତ ବେହେରା କହିଛନ୍ତି ଯେ, “ଓଡ଼ିଶା ପାଇଁ ଜାତୀୟ ସ୍ତରରେ ଖେଳିବା ମୋ ପାଇଁ ଏକ ବଡ଼ ଅଭିଜ୍ଞତା । ମୋର କଠିନ ପରିଶ୍ରମ ଓ ଆମ କୋଚ୍୍ଙ୍କ ମାର୍ଗଦର୍ଶନ ଯୋଗୁଁ ଏହା ସମ୍ଭବପର ହୋଇପାରିଛି । ମୁଁ ଟାଟା ଷ୍ଟିଲ ଓ ଟାଟା ଷ୍ଟିଲ ଫାଉଣ୍ଡେସନ୍କୁ ଏହି ସହାୟତା ପାଇଁ ହୃଦୟରୁ ଧନ୍ୟବାଦ ଜଣାଉଛି ।”
