ଚୋରା ପେଲେଟ ବୋଝେଇ ଟ୍ରକ ଓ ବୋଲେରୋ ସହ ୩ ମୋବାଇଲ ଜବତ
୩ ଖଣିଜ ଚୋର ଗିରଫ
ବଡ଼ବିଲ,(ଧରଣୀଧର ମହାନ୍ତ) ଆଜି ବଡ଼ବିଲ ପୋଲିସ ୩ ଜଣ ଖଣିଜ ଚୋରକୁ ଗିରଫ କରି କୋର୍ଟ ଚାଲାଣ କରିଥିବାବେଳେ, ସେମାନଙ୍କ ନିକଟରୁ ଏକ ପେଲେଟ ବୋଝେଇ ହାଇବା ଟ୍ରକ(ଜେଏଚ୦୫ଡବ୍ଲୁ-୪୦୧୭), ଉକ୍ତ ଟ୍ରକକୁ ସୁରକ୍ଷା ଯୋଗାଇବା କାର୍ଯ୍ୟରେ ନିୟୋଜିତ ଥିବା ଏକ ବୋଲେରୋ(ଓଆର୦୯ଏମ-୭୬୨୨)ସହ ୩ ଟି ମୋବାଇଲ ଫୋନକୁ ମଧ୍ୟ ପୋଲିସ ଜବତ କରିଥିବା ଜଣାଯାଇଛି। ତେବେ ବିଶେଷ ସୂତ୍ରରୁ ଖବର ପାଇ ୨ ତାରିଖ ବିଳମ୍ବିତ ରାତିରେ ପୋଲିସ, ବଡ଼ବିଲ ଥାନା, ଦାମୁହଟିଂ ଅଂଚଳରେ ଚୋରା ପେଲେଟ ବୋଝେଇ ହେଉଥିବା ସମୟରେ ପୋଲିସ ଜବତ କରିଥିଲା। ଚୋରା ପେଲେଟ ପଡୋଶୀ ଝାରଖଣ୍ଡ ରାଜ୍ୟକୁ ଚୋରା ଚାଲାଣ ହେଉଥିବା ତଦନ୍ତରୁ ଜଣାଯାଇଛି। ଗିରଫ ୩ ଜଣ ହେଲେ ପଡୋଶୀ ଝାରଖଣ୍ଡ ରାଜ୍ୟ, ସଢ଼େଇକଳା ଥାନା, ଆଦିତ୍ୟପୁର ଅଂଚଳର ରୋୖନକ କୁମାର, ଯୋଡ଼ା ଥାନା ସହିଦନଗର, ଉଲିହଟିଂ ଅଂଚଳର ପ୍ରଶାନ୍ତ ରାଜ ଓ ମୟୁରଭଞ୍ଜ ଜିଲ୍ଲା, ଜମୁଦା ଥାନା, ମହେଶକୁଦର ଗ୍ରାମର ରାଜୁ ବିନ୍ଧାଣି ଯିଏକି ବର୍ତ୍ତମାନ ଯୋଡ଼ା ଥାନା ବନେଇକଳା ଅଂଚଳରେ ରହୁଛି । ସମୁଦାୟ ୧୭ ଟନ ପେଲେଟ ଜବତ ହୋଇଥିବାବେଳେ, ଜବତ ପେଲେଟର ଆନୁମାନିକ ମୂଲ୍ୟ ୨ ଲକ୍ଷ ଟଙ୍କାରୁ ଅଧିକ ହେବବୋଲି ଜଣାଯାଇଛି। ବଡ଼ବିଲ ଥାନା କେସ ନମ୍ବର ୬୯/୨୩, ଦଫା ୩୭୯, ୧୨୦(ବି), ୩୪ ଆଇପିସି ଧାରାରେ ଗିରଫ ୩ ଚୋରକୁ ଆଜି କୋର୍ଟ ଚାଲାଣ କରାଯାଇଥିବା ବଡ଼ବିଲ ଥାନା ସବଇନିସ୍ପେକ୍ଟର ବିରୋଦାପ୍ରସନ୍ନ ସାହୁ ସୂଚନା ଦେଇଛନ୍ତି।
