ସ୍ଥାନୀୟ ଲୋକଙ୍କୁ ଅଣଦେଖା, ନର୍ଭେରାମ କମ୍ପାନୀକୁ ପଡ଼ିଲା ମହଙ୍ଗା । ଗ୍ରାମସଭାକୁ ସ୍ଥାନୀୟ ଲୋକଙ୍କ ପ୍ରବଳ ବିରୋଧ । ସ୍ଥଗିତ ରହିଲା ଗ୍ରାମସଭା ।

ଯୋଡ଼ା,୨୦/୭ ସ୍ଥାନୀୟ ଲୋକଙ୍କୁ ଅଣଦେଖା,  ନର୍ଭେରାମ କମ୍ପାନୀକୁ ମହଙ୍ଗା ପଡ଼ିଛି । କମ୍ପାନୀର ଗ୍ରାମସଭାକୁ ସ୍ଥାନୀୟ ଲୋକେ ପ୍ରବଳ ବିରୋଧ କରିବା ପରେ ପ୍ରଶାସନ ପକ୍ଷରୁ ଏହାକୁ ସ୍ଥଗିତ ରଖାଯାଇଛି ।  ଖଣି କମ୍ପାନୀ, ନର୍ଭେରାମ ପାୱାର ଏଣ୍ଡ ଷ୍ଟିଲ ପ୍ରା:ଲି: ର ଏକ ଖଣି ଭଦ୍ରାସାହି ପଞ୍ଚାୟତ, ଟଣ୍ଟୋ ଗ୍ରାମରେ ରହିଥିବା ବେଳେ, କମ୍ପାନୀ ଏକ ନୂତନ ପେଲେଟ୍ ପ୍ଲାଣ୍ଟ ପ୍ରତିଷ୍ଠା ପାଇଁ ଯୋଜନା କରିଛି । ଏହି ପେଲେଟ୍ ପ୍ଲାଣ୍ଟ, ପ୍ରକଳ୍ପ ଟଣ୍ଟୋ ଗ୍ରାମରେ ହେବାକୁ ଥିବାବେଳେ, ୨୭.୨୯ ଏକର ଜଙ୍ଗଲ ଜମିକୁ ଅଣ ଜଙ୍ଗଲରେ ରୂପେ ବ୍ୟବହାର ନିମନ୍ତେ ଆଜି  ଭଦ୍ରାସହି ପଞ୍ଚାୟତ ଟଣ୍ଟୋ ଗ୍ରାମରେ ଗ୍ରାମସଭା ଆୟୋଜନ କରାଯାଇଥିଲା। ତେବେ ଏହି ଗ୍ରାମସଭାକୁ ସ୍ଥାନୀୟ ଲୋକେ ବିରୋଧ କରିବା ସହ ଟେଣ୍ଟ ବାନ୍ଧିବାକୁ ଦେଇନଥିଲେ । ଯାହାଫଳରେ ଗ୍ରାମସଭା ହେବା ନେଇ ଅନିଶ୍ଚିତତା ସୃଷ୍ଟି ହୋଇଥିଲା । ତେବେ ପୋଲିସ୍ ଆଜି ବୁଧୁରାମ ମୁଣ୍ଡା ନାମକ ଜଣେ ଗ୍ରାମବାସୀଙ୍କୁ  କୌଣସି କାରଣ ନଥାଇ ଗାଁରୁ ଉଠାଇ ନେଇଥିବା ତାଙ୍କର ପତ୍ନୀ ଓ ଗ୍ରାମବାସୀ ଅଭିଯୋଗ କରିଛନ୍ତି ।  ଏହା ପରେ ସକାଳ ୧୦ଟାରେ ବ୍ୟାପକ ପୋଲିସ ମୁତୟନ କରାଯାଇ ଟେଣ୍ଟ ବନ୍ଧାଯାଇଥିଲା ବୋଲି ସ୍ଥାନୀୟ ଲୋକେ କହିଛନ୍ତି । ଯେକୌଣସି ମତେ ଗ୍ରାମସଭା ଆରମ୍ଭ କରାଯାଇଥିଲା। ବନ ଅଧିକାରୀ, ବ୍ଲକ୍ ଅଧିକାରୀ ଓ ସ୍ଥାନୀୟ ଲୋକ ପ୍ରତିନିଧିଙ୍କ ଉପସ୍ଥିତି ଓ ପୋଲିସ ଛାଉଣୀରେ ଗ୍ରାମସଭାରେ ଆରମ୍ଭ ହୋଇଥିଲା । ପ୍ରଶାସନର ଅନେକ ଅନୁରୋଧ ପରେ ମାତ୍ର ୩ଜଣ ଗ୍ରାମବାସୀ ସଭାରେ ନିଜର ମତ ଉପସ୍ଥାପନ କରିଥିଲେ, ତାହା ପୁଣି ସମ୍ପୂର୍ଣ୍ଣ ବିରୋଧରେ  । ପ୍ରଶାସନର ବାରମ୍ବାର ଅନୁରୋଧ ପରେବି ଆଉ ଜଣେ ହେଲେବି କେହି ମତାମତ ରଖିବାକୁ ଆସି ନଥିଲେ । ନର୍ଭେରାମ କମ୍ପାନୀ ଦୀର୍ଘ ବର୍ଷ ଧରି ଖଣି କାର୍ଯ୍ୟ ଚଳାଇ ଆସୁଥିବା ବେଳେ, ନିଯୁକ୍ତି ଠାରୁ ଆରମ୍ଭ କରି ପରିବହନ, ଏମିତିକି ସବୁ କ୍ଷେତ୍ରରେ ସ୍ଥାନୀୟ ଲୋକଙ୍କୁ ଅଣଦେଖା କରିଆସୁଥିବା ଗ୍ରାମବାସୀ ଅଭିଯୋଗ କରିଥିଲେ । ପ୍ରଭାବିତ ଲୋକଙ୍କୁ କୌଣସି ସୁବିଧା ସୁଯୋଗ ନଦେଇ ଭଦ୍ରାସାହି ଅଞ୍ଚଳର କିଛି ରାଜନୈତିକ ମୁଷ୍ଟିମେୟ ବ୍ୟକ୍ତିଙ୍କୁ ପରିବହନ କାର୍ଯ୍ୟ ଦେବା ସହ ବାହାର ଲୋକଙ୍କୁ ନିଯୁକ୍ତି ଦେଉଥିବା ନେଇ ସଙ୍ଗୀନ ଅଭିଯୋଗ କରିଛନ୍ତି । ଗ୍ରାମବାସୀଙ୍କୁ ତାଙ୍କର ହକ ନଦେଇ ଓଲଟା ଧମକାଇବା ସହ ମିଛ କେସ ଦେଇଥିବା ଅଭିଯୋଗ ଆଣିଛନ୍ତି ସ୍ଥାନୀୟ ପ୍ରଭାବିତ ଗ୍ରାମବାସୀ ।  ପ୍ରଶାସନ ଓ କମ୍ପାନୀ କର୍ତ୍ତୃପକ୍ଷଙ୍କ ସତ ଚେଷ୍ଟା ପରେବି ଗ୍ରାମସଭା ସଫଳ ହୋଇପାରିନଥିଲା, ଯାହା ଫଳରେ ସଭାରେ କୋରମ୍ ନହେବା ଦର୍ଶାଇ  ପ୍ରଶାସନ ପକ୍ଷରୁ ଉକ୍ତ ଗ୍ରାମସଭାକୁ ସ୍ଥଗିତ ଘୋଷଣା କରାଯାଇଥିଲା।