ଖୋର୍ଦ୍ଧା ଗୋଡିପଡ଼ା ଠାରେଦୁଇ ଟ୍ରକ ମୁହାଁମୁହିଁ ଧକ୍କା: ୪ ଗୁରୁତର

ଖୋର୍ଦ୍ଧା: ୧୯/୦୬(ପ୍ରବାହ ନିଉଜ୍): ଜଙ୍କିଆ ଥାନା ଅନ୍ତର୍ଗତ ୧୬ନମ୍ବର ଜାତୀୟ ରାଜପଥର  ଗୋଡିପଡା ଓଭର ବ୍ରିଜ ଉପରେ  ଶନିବାର ରାତି ପ୍ରାୟ ୮ଟା ସମୟରେ OD07-1777 ନମ୍ବର ବିଶିଷ୍ଟ ଏକ ଆଇରନ୍ ବୋଝେଇ ଟ୍ରକ ଏବଂ OD09-M-3696 ନମ୍ବର ବିଶିଷ୍ଟ ଏକ କୋଇଲା ବୋଝେଇ ଟ୍ରକ ମଧ୍ୟରେ ମୁହାଁମୁହିଁ ଧକ୍କା ହେବା ଦ୍ୱାରା ଦୁର୍ଘଟଣାରେ ଉଭୟ ଟ୍ରକର ୪ ଜଣ ଗୁରୁତର ଆହତ ହୋଇଥିବା ଜଣାପଡ଼ିଛି। ଏ ସମ୍ପର୍କରେ ଜାତୀୟ ରାଜପଥ ସୁରକ୍ଷାରେ ନିୟୋଜିତ ପାଟ୍ରୋଲିଂ ଟିମ ଏବଂ ଜଙ୍କିଆ ପୁଲିସ ଖବର ପାଇବା ପରେ ଘଟଣା ସ୍ଥଳରେ ପହଞ୍ଚି ଟ୍ରକ ମଝିରେ ଚାପି ହୋଇ ରହିଥିବା ଗୁରୁତରଙ୍କ ସମେତ ଅନ୍ୟ ଆହତଙ୍କୁ କ୍ରେନ ଜରିଆରେ ଟ୍ରକ ମଧ୍ୟରୁ ଉଦ୍ଧାର କରି ନିଜ ଗାଡ଼ିରେ ସମସ୍ତ ଆହତମାନଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲା।

ଆହତମାନେ ଗଞ୍ଜାମ ଜିଲ୍ଲା ବ୍ରହ୍ମପୁର ଅଞ୍ଚଳର ହୋଇଥିବା ବେଳେ ସେମାନଙ୍କ ମଧ୍ୟରୁ ଦୁଇଜଣଙ୍କ ନାମ ଶିଶିର ସେଠୀ ଓ ଟୁଲୁ ବିଶୋଇ ବୋଲି ଜଣାପଡିଛି ଏବଂ ଅନ୍ୟ ଦୁଇଜଣଙ୍କ ପରିଚୟ ମିଳିପାରିନାହିଁ । ଆହତଙ୍କ ମଧ୍ୟରୁ ତିନିଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ ସମସ୍ତ ଆହତଙ୍କୁ ଭୁବନେଶ୍ବର ସ୍ଥିତ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି । ଜଙ୍କିଆ ପୁଲିସ ଦୁର୍ଘଟଣାର ତଦନ୍ତ ଜାରି ରଖିଛି।