ରାୟଗଡ଼ା ଏଲ.ଆଇ.ସି. ପାଳନ କରୁଛି ୬୬ତମ ପୂର୍ତ୍ତି ଉତ୍ସବ ପାଳନ
ରାୟଗଡ଼ା: ୧/୯(ପ୍ରବାହ ନିଉଜ) ଭାରତୀୟ ଜୀବନ ବୀମା (ଏଲ୍.ଆଇ.ସି) ବିଗତ ୬୬ବର୍ଷ ହେବ ସାରା ଦେଶରେ ବୀମାଭିତ୍ତିକ ସେବା ତାର ହିତାଧିକାରୀଙ୍କୁ ଯୋଗାଇ ଆସିଛି। ଜୀବନ ବୀମା ସଂସ୍ଥା ୬୬ତମ ପୂର୍ତ୍ତି ଉତ୍ସବ ପାଳନ କରୁଥିବା ବେଳେ ଏବେ ୬୭ବର୍ଷରେ ପାଦ ଦେଇଛି। ଏଲ.ଆଇ.ସି. ସପ୍ତାହ ପାଳନ ଅବସରରେ ଭାରତୀୟ ଜୀବନ ବୀମା ରାୟଗଡା ଶାଖା କାର୍ଯ୍ୟାଳୟ ପକ୍ଷରୁ ସେପ୍ଟେମ୍ବର ଏକ ତାରିଖ ଗୁରୁବାର ଦିନ ଏଲ.ଆଇ.ସି ଦିବସର ଶୁଭାରମ୍ଭ ହୋଇ ଯାଇଛି ।
ବରିଷ୍ଠ ଶାଖା ପରିଚାଳକ ସନ୍ତୋଷ କୁମାର ପାତ୍ର ନିଗମର ପତାକା ଉତ୍ତୋଳନ ସହ ସଙ୍ଗୀତ ପରିବେଷଣ ମାଧ୍ୟମରେ ଏହାର ଉଦଘାଟନ କରି ଗତ ଦଶନ୍ଧି ଦଶନ୍ଧି ଧରି ଏଲ.ଆଇ.ସି. କିପରି ରାଷ୍ଟ୍ର ମଙ୍ଗଳ କାର୍ଯ୍ୟମାନ କରି ଉନ୍ନତିର ସେପାନ ମାନ ଚଢି ଆସୁଛି ସେ ସଂପର୍କରେ ଆଲୋକପାତ କରିଥିଲେ । ବିଶିଷ୍ଟ ଉଦ୍ୟୋଗପତି କେ. ମୋହନ ରାଓ, ସୁଖ୍ୟାତ ଚିକିତ୍ସକ ତଥା ସମାଜ ସେବୀ ଡାକ୍ତର ଲକ୍ଷ୍ମୀ ନାରାୟଣ ସାହୁ ଓ ସ୍ୱନାମଧନ୍ୟ ଶିକ୍ଷାବିତ ଏଲ କିଶନ କୁମାର ଏହି କାର୍ଯ୍ୟକ୍ରମରେ ଅତିଥି ଭାବେ ଯୋଗ ଦେଇ ଏଲ.ଆଇ.ସି. ଗ୍ରାହକ ସେବାର ଭୂରିୟସୀ ପ୍ରଶଂସା କରିଥିଲେ ।
ବରିଷ୍ଠ ବ୍ୟବସାୟ ସହଯୋଗୀ ଗୋବିନ୍ଦ ପ୍ରସାଦ ରଥ ଏଲ.ଆଇ.ସି କିଭଳି ତାଙ୍କ ପାଇଁ ଅନ୍ୟତମ ଆତ୍ମୀୟ ତୁଲ୍ୟ ବର୍ଣ୍ଣନା କରିଥିବା ବେଳେ ଅଫିସର ଶ୍ରୀ ଏନ୍ ପି ମୁଖୀ ଶ୍ରୀପି ନାଗଭୂଷଣ ରାଓ ଓ ଶ୍ରୀମତୀ ଆରତି ପାତ୍ର ଏଲ.ଆଇ.ସି. ର ପ୍ରଗତି ବିଷୟରେ ଆଲୋଚନା କରିଥିଲେ। ବରିଷ୍ଠ ଅଫିସର ଭାବେ ଶ୍ରୀ ପି.ଏନ.ବି. ରାଓଙ୍କୁ ସଂସ୍ଥା ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା ।
ସପ୍ତାହ ବ୍ୟାପୀ ପାଳିତ ହେଉଥିବା କାର୍ଯ୍ୟକ୍ରମରେ ସ୍ୱତନ୍ତ୍ର ସେବା କାଉଣ୍ଟର ସହ ବ୍ୟାପକ ଏଜେଣ୍ଟ ଚୟନ ଓ ପଲିସି ବିକ୍ରି ପ୍ରତି ଧ୍ୟାନ ଦିଆଯିବ ବୋଲି ଏଲ୍.ଆଇ.ସି. ପକ୍ଷରୁ ସୂଚନା ଦିଆଯାଇଥିବା ବେଳେ ସମସ୍ତ କର୍ମଚାରୀ ଏବଂ ଏଜେଣ୍ଟ ବର୍ଗଙ୍କୁ ସାମିଲ କରାଯାଇ କାର୍ଯ୍ୟକ୍ରମ ସହ ବୃକ୍ଷରୋପଣ ବି କରାଯିବ ବୋଲି ଏଲ୍.ଆଇ.ସି. ର କର୍ତ୍ତୃପକ୍ଷ ଜଣାଇଛନ୍ତି ।
