ସମାଜକୁ ସଠିକ ଦିଗ୍ଦର୍ଶନ ଦେଇଥାଏ ଗଣମାଧ୍ୟମ

ଭୁବନେଶ୍ୱର : ୧୯/୨(ପ୍ରବାହ ନିଉଜ୍) ଅବକ୍ଷୟ ସମାଜକୁ ସଜାଡ଼ିବାରେ ଗଣମାଧ୍ୟମର ଭୂମିକା ଅତ୍ୟନ୍ତ ମହତ୍ତ୍ଵପୂର୍ଣ୍ଣ । ସାମ୍ବାଦିକଙ୍କ ଲେଖନୀମୁନ ଜରିଆରେ ପଥଭ୍ରଷ୍ଟ
ସମାଜକୁ ସଠିକ ଦିଗଦର୍ଶନ ମିଳିଥାଏ । ଜଣେ ସାମ୍ବାଦିକ ତାର କଲମ ମାଧ୍ୟମରେ ଅବହେଳିତ ଏବଂ ନିଷ୍ପେସିତ ମଣିଷଟିକୁ ନ୍ୟାୟ ପ୍ରଦାନ କରିବାରେ ସହାୟକ ହୋଇଥାଏ । ସାମ୍ବାଦିକ ଓ ରାଜନେତା ଉଭୟ ସମାଜର ଜାଗ୍ରତ ପ୍ରହରୀ ଭୂମିକା ଗ୍ରହଣ କରୁଥିବା ବେଳେ ଏମାନଙ୍କ କାର୍ଯ୍ୟଶୈଳୀ ସମାଜ ଉପରେ ପ୍ରଭାବ ପକାଇଥାଏ।

ନିଷ୍ଠାର ସହ ସାମ୍ବାଦିକତାକୁ ବ୍ରତ କରି ନେଇଥିବା ବ୍ୟକ୍ତି କେବେ ହାର ମାନି ନଥାଏ । ନିର୍ଭିକତା ଓ ନିରପେକ୍ଷତା ସମ୍ବାଦପତ୍ର ମାନେ ଅବଲମ୍ବନ କରିବା ଆବଶ୍ୟକ ବୋଲି ସାପ୍ତାହିକ ସମ୍ବାଦପତ୍ର ‘ପ୍ରବାହ’ର ୧୬ତମ ସ୍ୱନକ୍ଷତ୍ର ଉତ୍ସବରେ ନିମନ୍ତ୍ରିତ ଅତିଥିଗଣ ମତ ପ୍ରକାଶ କରିଥିଲେ । ରବିବାର ପୂର୍ବାହ୍ନ ୧୦ ଘଟିକାରେ ଭୁବନେଶ୍ଵର ସ୍ଥିତ ଜୟଦେବ ଭବନଠାରେ ଆୟୋଜିତ ସ୍ୱନକ୍ଷତ୍ର ଉତ୍ସବରେ ମୁଖ୍ୟଅତିଥି ଭାବେ ରାଜ୍ୟ ସରକାରଙ୍କ ମୁଖ୍ୟ ସଚେତକ ତଥା ଜଗତସିଂହପୁର ର ମାନ୍ୟବର ବିଧାୟକ ପ୍ରଶାନ୍ତ ମୁଦୁଲି ଯୋଗ ଦେଇଥିବା ବେଳେ ମୁଖ୍ୟବକ୍ତା ଭାବେ ଖୋର୍ଦ୍ଧା ଆଇନ ମହାବିଦ୍ୟାଳୟର ଅଧ୍ୟକ୍ଷ ଗିରିଶ ରଞ୍ଜନ ସାହୁ, ସମ୍ମାନିତ ଅତିଥି ରୂପେ ଉତ୍କଳ ବିଶ୍ଵବିଦ୍ୟାଳୟ ବାୟୋ ଟେକ୍ନୋଲୋଜି ବିଭାଗର ପୂର୍ବତନ ପ୍ରଧ୍ୟାପକ ଡକ୍ଟର ଗୌରାଙ୍ଗ ଚରଣ ସ୍ଵାଇଁ ଏବଂ ଅନ୍ୟତମ ସମ୍ମାନିତ ଅତିଥି ଭାବରେ ରବି ସାମଲ ପ୍ରମୁଖ ଯୋଗ ଦେଇଥିଲେ।

ସମାଜର ମୁଖ୍ୟ ସ୍ରୋତରେ ସାମିଲ ହୋଇ ନିଜକୁ ଉତ୍ସର୍ଗ କରିଥିବା କିଛି ସ୍ବାସ୍ଥ୍ୟକର୍ମୀ, ପୋଲିସ୍ ଅଧିକାରୀ ଏବଂ ସାମ୍ବାଦିକ ମାନଙ୍କୁ ମୁଖ୍ୟଅତିଥି ବିଧାୟକ ପ୍ରଶାନ୍ତ ମୁଦୁଲି ସମ୍ବର୍ଦ୍ଧିତ କରିଥିଲେ। ପ୍ରବାହର ସମ୍ପାଦକ ଅଭିମନ୍ୟୁ ମହାପାତ୍ର ସ୍ବାଗତ ସମ୍ୱର୍ଦ୍ଧନା କରିଥିବା ବେଳେ ମଞ୍ଚ ପରିଚାଳନା କରିଥିଲେ ବରିଷ୍ଠ ଆଇନଜୀବୀ ତଥା କବି ଚନ୍ଦ୍ର ବିଜୟୀ ମିଶ୍ର ଏବଂ ପରିଶେଷରେ ଧନ୍ୟବାଦ ଅର୍ପଣ କରିଥିଲେ ପ୍ରବାହର ପରିଚାଳନା ସମ୍ପାଦକ ସିଦ୍ଧାର୍ଥ ସ୍ବରୂପ ଦାଶ ।