ଜାତୀୟ ରାଜପଥରେ ଯାତ୍ରୀବାହୀ ବସ୍ ଦୁର୍ଘଟଣାଗ୍ରସ୍ତ : ଜଣେ ମୃତ, ୧୫ରୁ ଉର୍ଦ୍ଧ ଆହତ
ଖୋର୍ଦ୍ଧା :୧୨/୭(ପ୍ରବାହ ନିୟୁଜ୍) ଖୋର୍ଦ୍ଧା ସହର ମଧ୍ୟ ଦେଇ ଯାଇଥିବା ୧୬ନମ୍ବର ଜାତୀୟ ରାଜପଥ ବରୁଣେଇ ଓଭର ବ୍ରିଜ୍ ନିକଟରେ ଟ୍ରକ୍ କୁ ପଛ ପଟରୁ ଧକ୍କା ଦେଇ ଦୁର୍ଘଟଣାଗ୍ରସ୍ତ ହୋଇଛି ଭଞ୍ଜନଗର ଅଭିମୁଖେ ଯାଉଥିବା ଓଁ ଶାନ୍ତି ଟ୍ରାଭେଲ୍ସ ନାମକ ଯାତ୍ରୀବାହୀ ବସ୍।
ପ୍ରତ୍ୟକ୍ଷଦର୍ଶୀ ଙ୍କ ଅନୁସାରେ, ଓଁ ଶାନ୍ତି ଟ୍ରାଭେଲ୍ସ ନାମକ ଯାତ୍ରୀବାହୀ ବସ୍ ଟି ଆଜି ଭୁବେଶ୍ୱରରୁ ଭଞ୍ଜନଗର ଅଭିମୁଖେ ଯାଉଥିବା ବେଳେ ସକାଳ ସାଢେ଼ ୭ଟା ସମୟରେ ବରୁଣେଇ ଓଭର ବ୍ରିଜରୁ ତଳକୁ ଗଡୁଥିବା ବେଳେ ନିକଟରେ ନିୟନ୍ତ୍ରଣ ହରାଇ ଆଗରେ ଯାଉଥିବା ଏକ କଣ୍ଟେନର ବୋଝେଇ ଅଜଣା ଟ୍ରକ୍ କୁ ପଛପଟୁ ଧକ୍କା ଦେଇ ରାସ୍ତା କଡ଼ରେ ଥିବା ଏକ ଅସ୍ଥାୟୀ ଘର ନିକଟରେ ଥିବା ବାଲିଗଦାରେ ପସି ଯାଇଥିଲା। ଏହି ସମୟରେ ବସ୍ ର ଆଗପଟ କାଚ ଭାଙ୍ଗିଯିବା ଦ୍ଵାରା ଗାଡ଼ି ବର୍ନେଟ ରେ ବସିଥିବା ଜଣେ ଯାତ୍ରୀ ଆଗକୁ ଛିଟିକି ପଡ଼ିବା ଫଳରେ ବସ୍ ଚକା ତାଙ୍କ ଉପରେ ଚଢ଼ିଯିବା ରୁ ଘଟଣା ସ୍ଥଳରେ ଉକ୍ତ ଯାତ୍ରୀଙ୍କ ମୃତ୍ୟୁ ହୋଇଥିବା ବେଳେ ବସ୍ ରେ ଯାତ୍ରା କରୁଥିବା ୧୫ରୁ ଉର୍ଦ୍ଧ ଯାତ୍ରୀ ଆହତ ହୋଇଛନ୍ତି।
ଘଟଣା ସମ୍ପର୍କରେ ଖବର ପାଇ ଗୁରୁତର ଥିବା ଯାତ୍ରୀମାନଙ୍କୁ ହାଇୱେ ପାଟ୍ରୋଲିଂ ଭ୍ୟାନ୍ ଯୋଗେ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ଘଟଣା ସ୍ଥଳରେ ଖୋର୍ଦ୍ଧା ଶିଳ୍ପାଞ୍ଚଳ ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
