ପୁବୁସାହିରୁ ଯୁବକ ନିଖୋଜ ଘଟଣାରେ ଖୋର୍ଦ୍ଧା ପୋଲିସର ନିଷ୍କ୍ରିୟତାକୁ ନେଇ ୫୭ନମ୍ୱର ଜାତୀୟ ରାଜପଥ ଅବରୋଧ

ଖୋର୍ଦ୍ଧା: ୨୪/୮(ପ୍ରବାହ ନିୟୁଜ) ଆଦର୍ଶ ଥାନା ଅନ୍ତର୍ଗତ ପୁବୁସାହି ଗ୍ରାମରୁ ଯୁବକ ନିଖୋଜ ଘଟଣାକୁ ଦୀର୍ଘ ଚାରିଦିନ ବିତି ଯାଇଥିବା ବେଳେ ପରିବାର ଲୋକଙ୍କ ଅଭିଯୋଗ ପରେ ମଧ୍ୟ ପୋଲିସର କାର୍ଯ୍ୟାନୁଷ୍ଠାନକୁ ନେଇ ଉଠିଛି ପ୍ରଶ୍ନବାଚୀ ।

ପ୍ରକାଶ ଥାଉ କି, ପୁବୁସାହି ଗ୍ରାମର ବାସୁଦେବ ପ୍ରଧାନ ନାମକ ବ୍ୟକ୍ତି ସେହି ଅଞ୍ଚଳର ରବି ମୁଦୁଲି ନାମକ ବ୍ୟକ୍ତିଙ୍କ କବାଡିଆ ଗୋଦାମରେ ଦୀର୍ଘ ଦଶବର୍ଷ ଧରି କାମ କରି ଆସୁଥିବା ବେଳେ କୌଣସି କାରଣରୁ ବାସୁଦେବ ଏବଂ ରବି ମୁଦୁଲିଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା ।
ଏଵଂ ସେହଦିନ ରାତିରେ ପରିବାର ଲୋକ ରବିଙ୍କୁ ଯୋଗାଯୋଗ କରିବାରୁ ବାସୁଦେବ ଘରକୁ ଫେରିଲେଣି ବୋଲି ରବି ଫୋନଯୋଗେ କହିଥିବା ବେଳେ ଘଟଣାକୁ ଦୀର୍ଘ ଚାରିଦିନ ବିତି ଯାଇଥିଲେ ସୁଦ୍ଧା ଏ ପର୍ଯ୍ୟନ୍ତ ପୋଲିସ୍ ବାସୁଦେବଙ୍କୁ ଖୋଜି ପାଇବାରେ ବିଫଳ ହୋଇଛି ।

ଏ ନେଇ ବାସୁଦେବଙ୍କ ପରିବାର ଲୋକ ଏବଂ ଗ୍ରାମବାସୀ ଖୋର୍ଦ୍ଧା ଆଦର୍ଶ ଥାନାରେ ଅଭିଯୋଗ କରିବାର ଦୁଇଦିନ ବିତିଯାଇଥିବା ବେଳେ କେବଳ ଆଖି ଦୃଶିଆ ପୋଲିସ୍ ଅଭିଯୁକ୍ତ ରବିଙ୍କୁ ଥାନରେ ଆଣି ଅଟକ ରଖିଥିବା ବେଳେ ଏ ପର୍ଯ୍ୟନ୍ତ ନିଖୋଜ ବାସୁଦେବଙ୍କୁ ଖୋଜି ପାଇବାରେ ସକ୍ଷମ ହୋଇନାହିଁ । ଘଟଣାକୁ ନେଇ ଆଜି ପୂର୍ବାହ୍ନରେ ପୁବୁସାହି ଗ୍ରାମର ସଂଖ୍ୟାଧିକ ମହିଳା ଓ ପୁରୁଷ ଆଦର୍ଶ ଥାନା ଥାନା ଘେରାଉ କରିଥିବା ବେଳେ ବର୍ତ୍ତମାନ ଅପରାହ୍ନରେ ଖୋର୍ଦ୍ଧା ବଲାଙ୍ଗୀର ୫୭ନମ୍ୱର ଜାତୀୟ ରାଜପଥରେ ଟାୟାର ଜାଳି ଶତାଧିକ ଗ୍ରାମବାସୀ ରାସ୍ତା ଅବରୋଧ କରିଥିବା ବେଳେ ନିଖୋଜ ବାସୁଦେବଙ୍କୁ ଖୋଜି ବାହାର କରିବା ପାଇଁ ଅଡି ବସିଛନ୍ତି ।

ରାସ୍ତାର ଉଭୟ ପାର୍ଶ୍ବରେ ଅନେକ ଯାତ୍ରୀବାହୀ ବସ୍ ଓ ଗାଡ଼ି ମୋଟର ଅଟକି ରହିବା ଫଳରେ ଟ୍ରାଫିକ ସମସ୍ୟା ଉପୁଜିଛି। ଘଟଣା ସ୍ଥଳରେ କେବଳ ଖୋର୍ଦ୍ଧା ଆଦର୍ଶ ଥାନା ପୋଲିସ୍ ପହଞ୍ଚି ପରିସ୍ଥିତି ଉପରେ ନଜର ରଖିଥିବା ବେଳେ ଏ ପର୍ଯ୍ୟନ୍ତ ଜିଲ୍ଲା ପୋଲିସ୍ ର କୌଣସି ବରିଷ୍ଟ ଅଧିକାରୀ ପହଞ୍ଚି ନଥିବାରୁ ଜନ ସାଧାରଣଙ୍କ ମଧ୍ୟରେ ଅସନ୍ତୋଷ ଦେଖା ଯାଇଥିବା ସହିତ ଘଟଣା ସ୍ଥଳରେ ପରିସ୍ଥିତି ଉତ୍ତେଜନା ପୂର୍ଣ୍ଣ ରହିଛି। 

ପ୍ରକାଶ ଥାଉ କି ବିଗତ ଦିନରେ ଏହି ପୁବୁସାହି ଅଞ୍ଚଳରୁ ଗାଇ ଚରେଇବାକୁ ଯାଇ ରାଜା ନାମକ ଜଣେ ଯୁବକ ନିଖୋଜ ଘଟଣାକୁ ନେଇ ଉକ୍ତ ପୁବୁସାହି ଗ୍ରାମର ଶହଶହ ମହିଳା ଓ ପୁରୁଷ ଖୋର୍ଦ୍ଧା ଜିଲ୍ଲା ଆରକ୍ଷୀ ଅଧିକ୍ଷକଙ୍କ କାର୍ଯ୍ୟାଳୟ ଘେରାଉ କରିଥିଲେ ଏବଂ ଘଟଣାକୁ ନେଇ ତତ୍କାଳୀନ ଆରକ୍ଷୀ ଅଧିକ୍ଷକଙ୍କ ତୁରନ୍ତ କାର୍ଯ୍ୟାନୁଷ୍ଠାନର ପ୍ରତିଶୁତି ପରେ ମଧ୍ୟ ଘଟଣାକୁ ଏକବର୍ଷରୁ ଉର୍ଦ୍ଧ ସମୟ ବିତିଯାଇଛି। କିନ୍ତୁ ନିଖୋଜ ଥିବା ରାଜାର ଘଟଣାରେ ପୋଲିସର ନିଷ୍କ୍ରିୟତା ଏବଂ ଏବେ ବାସୁଦେବଙ୍କ ନିଖୋଜ ଘଟଣାରେ ପୋଲିସର ପାରିବା ପଣିଆକୁ ନେଇ ପୋଲିସ୍ ର ଭୂମିକା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।