ଖୋର୍ଦ୍ଧା ଜିଲ୍ଲା ପ୍ରଶାସନର ରୋଗୀ କଲ୍ୟାଣ ସମିତିର ବୈଠକ ଅନୁଷ୍ଠିତ

ଖୋର୍ଦ୍ଧା : ୦୮/୦୨/୨୦୨୧ : ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟର ରୋଗୀ କଲ୍ୟାଣ ସମିତିର ବୈଠକ ଆଜି ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ  ଅନୁଷ୍ଠିତ ହୋଇଯାଇଛି । ବୈଠକରେ ଖୋର୍ଦ୍ଧା ଜିଲ୍ଲାପାଳ ସନତ କୁମାର ମହାନ୍ତି ଅଧ୍ୟକ୍ଷତା କରିଥିଲେ। ଜିଲ୍ଲା ମୁଖ୍ୟ ଚିକିତ୍ସାଳୟର ବିଭିନ୍ନ ପ୍ରସଙ୍ଗକୁ ନେଇ ପ୍ରସ୍ତୁତ ହୋଇଥିବା ଯୋଜନା ଉପରେ ବିଭିନ୍ନ ଆଲୋଚନା କରାଯାଇଥିଲା । ବୈଠକରେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡ଼ଃ  ବିଶ୍ବ ରଞ୍ଜନ ପତି, ଅଧୀକ୍ଷକ ଡ. ବିଶ୍ୱମୋହନ ମିଶ୍ର ରୋଗୀ କଲ୍ୟାଣ ସମିତି ତରଫରୁ ପ୍ରସ୍ତୁତ ହେଉଥିବା ବିଭିନ୍ନ ଜନାହିତକାରୀ ଯୋଜନା ସମ୍ପର୍କରେ ଆଲୋକପାତ କରିଥିଲେ।

ବିଶେଷ କରି ମୁଖ୍ୟ ଚିକିତ୍ସାଳୟ ପରିସରରେ ପୋଲିସ ଆଉଟ ପୋଷ୍ଟ ନିର୍ମାଣ କରାଯିବ। ରୋଗୀଙ୍କ ସେବାଲାଗି ଘରୋଇ ଆମ୍ବୁଲାନ୍ସକୁ ନେଇ ଲାଗି ରହିଥିବା ବିବାଦ ଉପରେ ବିହିତ ପଦକ୍ଷେପ ନେବା ସହିତ ବିନା ଫିଟନେସ ଓ ଇନ୍ସୁରାନସ ନଥିବା ଆମ୍ବୁଲାନ୍ସ ଗୁଡିକ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଯଥାଶୀଘ୍ର ମୁଖ୍ୟ ଚିକିତ୍ସାଳୟର ସୀମା ନିର୍ଦ୍ଧାରଣ କରି ଚାରିପଟ ପାଚେରି ନିର୍ମାଣ କରାଯିବ । ଚିକିତ୍ସାଳୟ ପରିସର ମଧ୍ୟକୁ ପ୍ରବେଶ ଓ ପ୍ରସ୍ଥାନ ନିମନ୍ତେ ଦୁଇଟି ଗେଟ ବ୍ୟବସ୍ଥା ରହିବା ସହିତ ପ୍ରବେଶ ଓ ପ୍ରସ୍ଥାନ ପଥରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯିବ। ମେଡିକାଲ ପରିସରରୁ ଗୋରୁମୁକ୍ତ ହେବା ସହିତ ବର୍ଜ୍ୟବସ୍ତୁ ପରିଚାଳନା ଏବଂ ବର୍ଜ୍ୟଜଳ ନିଷ୍କାସନ ପାଇଁ ବ୍ୟବସ୍ଥା କରାଯିବ। ଚିକିତ୍ସାଳୟ ପରିସରରେ ଏକ ଔଷଧୀୟ ଉଦ୍ୟାନ, ଭିତ୍ତିଭୂମିର ବିକାଶ, ଆନୁସଙ୍ଗିକ ଉନ୍ନତି ନିମନ୍ତେ ଧ୍ୟାନ ଦିଆଯିବ । ଚିକିତ୍ସାଳୟକୁ ଆସୁଥିବା ଦୁଇ ଓ ଚାରିଚକିଆ ଯାନ ପାର୍କିଂ ପାଇଁ ପରିସର ମଧ୍ୟରେ ସ୍ଥାନ ଚିହ୍ନଟ ହେବ ।ଏଥିଲାଗି ଅତିଶୀଘ୍ର ଟେଣ୍ଡର ପ୍ରକ୍ରିୟା ମଧ୍ୟ କରାଯିବ । ରୋଗୀଙ୍କ ସମ୍ପର୍କୀୟଙ୍କ ଲାଗି   ସମସ୍ତ ପ୍ରକାର ସୁବିଧା ସୁଯୋଗ ଥିବା ପ୍ରତୀକ୍ଷାଳୟ ବ୍ୟବସ୍ଥା କରାଯିବ। ଯୋଜନାରେ ଉପଲବ୍ଧ ନଥିବା ଔଷଧର ବ୍ୟବସ୍ଥା ଏବଂ ଜନଔଷଧି ଯୋଜନାର କାର୍ଯ୍ୟକାରିତା ଉପରେ ସ୍ଥାନୀୟ ସାଂସଦ ପ୍ରତିନିଧି ତଥା ରାଜ୍ୟ ବିଜେପିର କାର୍ଯ୍ୟକାରିଣୀ ସଦସ୍ୟ ନିକୁଞ୍ଜ କିଶୋର ପଟ୍ଟନାୟକ ବୈଠକରେ ପ୍ରସ୍ତାବ ରଖିଥିଲେ। ଜିଲ୍ଲା ମୁଖ୍ୟ ଚିକିତ୍ସାଳୟ ପାଇଁ ୨୦୨୦-୨୧ ଆର୍ଥିକ ବର୍ଷରେ ରୋଗୀ କଲ୍ୟାଣ ସମିତି ପାଇଁ ୯ଲକ୍ଷ ୬୯ହଜାର ଟଙ୍କା ମିଳିଥିଲା। ସେଥି ମଧ୍ୟରୁ ଅଦ୍ୟାବିଧି ବିଭିନ୍ନ ଯୋଜନାରେ  ୪ଲକ୍ଷ ୨୭ହଜାର ଟଙ୍କା ଖର୍ଚ୍ଚ ହୋଇଛି। ସେହିପରି ନିଦାନ ନିରୂପଣ ପାଇଁ ମିଳିଥିବା ଆର୍ଥିକ ଅନୁଦାନର ୨୧ଲକ୍ଷ ୨୮ହଜାର ଟଙ୍କା ମଧ୍ୟରୁ ମାତ୍ର ୬ଲକ୍ଷ ୮୦ହଜାର ଟଙ୍କା ଏ ପର୍ଯ୍ୟନ୍ତ ଖର୍ଚ୍ଚ ହୋଇଥିବା ନେଇ ବୈଠକରେ ଉପସ୍ଥାପନ କରିଥିଲେ ।

ବୈଠକରେ ଜିଲ୍ଲା ପରିଷଦ ଅଧ୍ୟକ୍ଷ ପ୍ରଫୁଲ ଦଳାଇ, ଡିପିଏମ ଗୀତାଞ୍ଜଳି ଦାଶଙ୍କ ସମେତ ବିଧାୟକଙ୍କ ପ୍ରତିନିଧି ଏବଂ ଅନ୍ୟ ସ୍ବାସ୍ଥ୍ୟ ବିଭାଗୀୟ ଅଧିକାରୀମାନେ ଏହି ଆଲୋଚନା ଚକ୍ରରେ ଅଂଶ ଗ୍ରହଣ କରିଥିଲେ ।