ସର୍ବଭାରତୀୟ ଖୋର୍ଦ୍ଧାକପ ଟି-୨୦ କ୍ରିକେଟ୍ ପଦର୍ଶନୀ ମ୍ୟାଚରେ ଓଡ଼ିଶା ମହିଳା ରେଡ଼ ବିଜୟୀ


ଖୋର୍ଦ୍ଧା : ୦୭-୦୪-୨୦୨୧: ସ୍ଥାନୀୟ ବିଜେବି ହାଇସ୍କୁଲ ସ୍ଥିତ ମିନି ଷ୍ଟାଡ଼ିୟମରେ ଚାଲିଥିବା ୪ର୍ଥ ସର୍ବଭାରତୀୟ ରାତ୍ରିକାଳୀନ ଖୋର୍ଦ୍ଧା କପ୍ ଟି-୨୦ କ୍ରିକେଟ ଟୁର୍ଣ୍ଣାମେଣ୍ଟ ଆଜି ଓଡ଼ିଶା ମହିଳା ବ୍ଲୁ ଏବଂ ଓଡ଼ିଶା ମହିଳା ରେଡ଼ ମଧ୍ୟରେ ଏକ ପ୍ରଦର୍ଶନୀ ମ୍ୟାଚ ଅନୁଷ୍ଠିତ ହୋଇଯାଇଛି । ଏହି ପଦର୍ଶନୀ ମ୍ୟାଚରେ ଅଲମ୍ପିୟାନ ଦୁତିଚାନ୍ଦ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଓସିଏର ସିଇଓ ସୁବ୍ରତ ବେହେରା ଓ ଓସିଏର ଅପରେସନ ହେଡ଼ ଆର ଶ୍ରୀକାନ୍ତ ପ୍ରମ୍ମୁଖ ଯୋଗଦେଇ ଉଭୟ ପକ୍ଷର ଖେଳାଳୀଙ୍କୁ ଉତ୍ସାହିତ କରିବା ସହିତ ମ୍ୟାଚରେ ବିଜୟ ଲାଭ କରିଥିବା ଖେଳାଳୀଙ୍କ ସମେତ ଉଭୟ ଦଳର ଖେଳାଳୀଙ୍କୁ ସମ୍ମାନୀତ କରିଥିଲେ ।

ପ୍ରଥମେ ଓଡ଼ିଶା ବ୍ଲୁ ଦଳ ଟସ ଜିଣି ବ୍ୟାଟିଂ କରିବାକୁ ନିଷ୍ପତି ନେଇଥିଲେ । ନିର୍ଦ୍ଧାରିତ ୧୫ ଓଭରରେ ୯ଟି ୱିକେଟ୍ ବିନିମୟରେ ଦଳ ମୋଟ ୮୧ରନ୍ କରିଥିଲା । ଦଳ ପକ୍ଷରୁ ଶୁଭ୍ରା ସ୍ୱାଇଁ ୧୪ଟି ବଲରେ ୨୩ ରନ ଓ ମଧୁସ୍ମିତା ବେହେରା ୧୮ଟି ବଲରେ ୨୦ ରନ୍ ସଂଗ୍ରହ କରିଥିଲେ । ଓଡ଼ିଶା ରେଡ଼ ଦଳ ପକ୍ଷରୁ ପ୍ରିୟଙ୍କା ସାହୁ ୩ ଓଭରରେ ୧୨ରନ ଦେଇ ୩ଟି ଉଇକେଟ ଓ ଭବାନୀ ଧାଡ଼ା ୨ ଓଭରରେ ୧୫ରନ ଦେଇଥିବା ବେଳେ ୨ଟି ଉଇକେଟ୍ ନେଇଥିଲେ । ଜବାବରେ ଓଡିଶା ରେଡ଼ ଦଳ ୧୪ ଓଭର ୩ଟି ବଲ ବଦଳରେ ୩ଟି ୱିକେଟ ହରାଇ ୮୪ରନ ସଂଗ୍ରହ କରି ବିଜୟଲାଭ କରିଥିଲେ । ଦଳ ପକ୍ଷରୁ କାଜଲ ଜେନା ୩୭ ବଲ ବଦଳରେ ୩୭ରନ ସଂଗ୍ରହ କରିଥିବା ବେଳେ ରଶ୍ମିତା ଚିନାରା ୩୦ଟି ବଲ ବିନିମୟରେ ୧୮ରନ ସଂଗ୍ରହ କରିଥିଲେ । ଆଜିର ମ୍ୟାଚକୁ ଶାଶ୍ବତୀ ଶତପଥୀ ପରିଚାଳନା କରିଥିବା ବେଳେ ପ୍ରୀତି ରଞ୍ଜନ ବିଜୟସିଂହ ଏଥିରେ ଶାଶ୍ବତୀଙ୍କୁ ପରିଚାଳନା କାର୍ଯ୍ୟ ସମ୍ପାଦନ ରେ ସହଯୋଗ କରିଥିଲେ । ସେହିପରି ଅସିତ ପରିଡ଼ା ସ୍ପୋରବୋର୍ଡ଼ ସରଂଚନାର ଦାୟିତ୍ୱ ନେଇଥିଲେ । ଏହି ଅବସରରେ ଜିଲ୍ଲା କ୍ରିକେଟ ଆସୋସିଏସନ ର ସଭାପତି ତଥା ବେଗୁନିଆ ବିଧାୟକ ରାଜେନ୍ଦ୍ର ସାହୁ, ସମ୍ପାଦକ ତଥା ଓସିଏର କୋଷାଧ୍ୟକ୍ଷ ବିକାଶ ପ୍ରଧାନ ଓ ଖୋର୍ଦ୍ଧା ପୌର ପରିଷଦର ପୂର୍ବତନ ପୌରାଧ୍ୟକ୍ଷା ସଂଯୁକ୍ତା ସାହୁ ପ୍ରମୁଖ ଯୋଗଦେଇ ଦୌଡ଼ରାଣୀ ଦୁତିଚାନ୍ଦଙ୍କୁ ତାମ୍ର ପତ୍ର ଓ ଉପଢୈକନ ଦେଇ ସମ୍ମାନୀତ କରିଥିଲେ ।

ସେହିପରି ଓଡ଼ିଶାର ପ୍ରଥମ ମହିଳା ଅମ୍ପ୍ୟାୟାର ଶାଶ୍ବତୀ ଶତପଥୀ ଓ ଭାରତୀୟ ମହିଳା କ୍ରିକେଟ ଖେଳାଳୀ ରସନାରା ପରବିନ୍‌, ଶୁଶ୍ରୀ ଦିବ୍ୟଦର୍ଶିନୀ, ମଧୁସ୍ମିତା ବେହେରା ଓ ପ୍ରିୟଙ୍କା ସାହୁଙ୍କୁ ସମ୍ମାନୀତ କରାଯାଇଥିଲା ।

Leave a Reply

Your email address will not be published. Required fields are marked *