ଲଗାତାର ପେଟ୍ରୋଲ ଓ ଡିଜେଲ ଦାମ ବୃଦ୍ଧି ପ୍ରତିବାଦରେ ଖୋର୍ଦ୍ଧା କଂଗ୍ରେସ ପକ୍ଷରୁ ବିକ୍ଷୋଭ

ଖୋର୍ଦ୍ଧା : ୧୫/୦୨/୨୦୨୧ :  କେନ୍ଦ୍ର ସରକାରଙ୍କ ଦ୍ୱାରା ବାରମ୍ବାର ତୈଳଦର ର ଅହେତୁକ ବୃଦ୍ଧି କୁ ନେଇ ସାଧାରଣ ରେ ଜନ ଅସନ୍ତୋଷ ଦେଖାଦେଇଛି । ବିଶେଷ କରି ଏହାର ସିଧାସଳଖ ପ୍ରଭାବ ସାଧାରଣତଃ ମଧ୍ୟବିତ୍ତ ପରିବାର ଉପରେ ପଡ଼ିଛି ।

କେନ୍ଦ୍ର ସରକାରଙ୍କ ଏହି ଲୋକମାରଣା ନୀତି ବିରୁଦ୍ଧରେ ବର୍ତ୍ତମାନ ବିରୋଧୀ କଂଗ୍ରେସ ରାଜରାସ୍ତାକୁ ଓହ୍ଲାଇଛି ।

ଅହେତୁକ ପେଟ୍ରୋଲ ଓ ଡିଜେଲର  ଦରଦାମ ରେ ବୃଦ୍ଧି ପ୍ରତିବାଦରେ ସମଗ୍ର ରାଜ୍ୟରେ କଂଗ୍ରେସ ପକ୍ଷରୁ ବିକ୍ଷୋଭ କରାଯାଉଛି। କଂଗ୍ରେସ ଆଜି ସକାଳ ୭ ଟାରୁ ଦିନ ୧ ଟା ପର୍ଯ୍ୟନ୍ତ ବନ୍ଦ ଡକରା ଦେଇଛି। ସମଗ୍ର ରାଜ୍ୟବାସୀଙ୍କୁ ଏହି ବନ୍ଦକୁ ସମର୍ଥନ କରିବାକୁ ଓଡ଼ିଶା ପ୍ରଦେଶ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ ଅନୁରୋଧ କରିଛନ୍ତି ।

ରାଜ୍ୟରେ ବନ୍ଦ ଡାକରାକୁ ଲକ୍ଷ୍ୟ କରି ରାଜ୍ୟ ସରକାରଙ୍କ ପକ୍ଷରୁ ରାଜ୍ୟର ସମସ୍ତ ସ୍କୁଲ ଆଜି ଓ ଆସନ୍ତା କାଲି
ସରସ୍ଵତୀ ପୂଜା ଦିନରେ ମଧ୍ୟ ବନ୍ଦ ରଖିବାକୁ ନିଷ୍ପତ୍ତି ନିଆଯାଇଛି । ଏହା ସହିତ ସମସ୍ତ ସରକାରୀ କର୍ମଚାରୀ ମାନଙ୍କୁ ସକାଳ ୯ଟା ପୂର୍ବରୁ କାର୍ଯ୍ୟାଳୟରେ ପହଞ୍ଚିବାକୁ କୁହାଯାଇଛି ।

ଏହି ପରିପ୍ରେକ୍ଷୀରେ ଖୋର୍ଦ୍ଧା ଜିଲ୍ଲାର ବିଭିନ୍ନ ବ୍ଲକ ସମେତ ଖୋର୍ଦ୍ଧା ନଗର କଂଗ୍ରେସ ପକ୍ଷରୁ ଆଜି ଖୋର୍ଦ୍ଧା ସହର ର ବିଭିନ୍ନ ଛକ ମାନଙ୍କରେ ଧାରଣା ଦିଆଯାଇଥିଲା । କଂଗ୍ରେସ କର୍ମୀମାନେ ରାଲିରେ ବାହାରି ସହରର ବିଭିନ୍ନ ସ୍ଥାନରେ ଦୋକାନ ବଜାର ଓ ବିଭିନ୍ନ ସରକାରୀ କାର୍ଯ୍ୟାଳୟ ଗୁଡିକୁ ବନ୍ଦ କରିବା ସହିତ ଏହି ବନ୍ଦକୁ ସଫଳ କରିବା ପାଇଁ ଜନ ସାଧାରଣ ଙ୍କୁ ଅନୁରୋଧ କରୁଥିବା ଦେଖିବାକୁ ମିଳିଥିଲା ।

ଏହି ଧାରଣାର ନେତୃତ୍ୱ ନେଇଥିଲେ ଖୋର୍ଦ୍ଧା ନଗର କଂଗ୍ରେସର ସଭାପତି ରଣଜିତ ମହାପାତ୍ର । ଉପରୋକ୍ତ ସଭାରେ ଶ୍ରୀ ମହାପାତ୍ର ତୈଳ ଦର ବୃଦ୍ଧି କୁ ନେଇ ମୋଦି ସରକାରଙ୍କ ଉପରେ ଖୁବ ବର୍ଷି ଥିଲେ ।ସେହିପରି ବେଗୁନିଆ ବୋଲଗଡ ଅଞ୍ଚଳରେ କଂଗ୍ରେସର ବିଧାୟକ ପ୍ରାର୍ଥୀ ପ୍ରଦୀପ ସାହୁ ଓ ଟାଙ୍ଗୀର ଜଙ୍କିଆ-ରାମେଶ୍ୱର ଠାରେ ବିଶ୍ୱଭୂଷଣ ଛୋଟରାୟଙ୍କ ସହିତ ଜଟଣୀ ରେ ଛାମୁଆ ନେତାଙ୍କ ନେତୃତ୍ୱରେ ଧାରଣାମାନ ଦିଆଯାଇଛି

ଧାରଣାରେ ଉପସ୍ଥିତ ଥିବା  ପି.ସି.ସି  ସଭ୍ୟ ଓ ଆଇନଜୀବି ଶିଶିର କୁମାର ପରିଡ଼ା ଓ ପି.ସି.ସି ମୁଖପାତ୍ର ଅମିତ ମହାନ୍ତି ନିଜ ନିଜର ବକ୍ତବ୍ୟ ରଖିବା ସହ କେନ୍ଦ୍ର ସରକାରଙ୍କ ବିଗତ ଦୁଇ ମାସ ମଧ୍ୟରେ ଅହେତୁକ ତୈଳ ଦର ବୃଦ୍ଧି,  ଚାଷୀମାରଣା ନୀତି ଓ ଅତ୍ୟାବଶ୍ୟକ ସାମଗ୍ରୀର ଦରବୃଦ୍ଧି ଉପରେ ରୋକ ଲଗାଇବା ପାଇଁ ଦାବୀ ରଖିବା ସହିତ ପରିଶେଷରେ
ପୂର୍ବତନ ଯୁବ କଂଗ୍ରେସ ସଭାପତି ପ୍ଲାବନ ପଟ୍ଟନାୟକ ଙ୍କ ସହିତ ଶିଲାଦିତ୍ୟ ପଟ୍ଟନାୟକ, ଦିଲ୍ଲୀପ ସେଠୀ, ହେମନ୍ତ ନାୟକ, ହଲିମ ସଦ୍ଦୀକ , ଅମରଜିତ ମହାରଥୀ, ଜୀବନ ବେହେରା ଓ ନାରୀନେତ୍ରୀ ଜୟନ୍ତୀ ରାୟଙ୍କ ସହିତ ଉପସ୍ଥିତ ଥିବା ସମସ୍ତ କର୍ମୀମାନେ  ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦି ଓ ତୈଳମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିରୁଦ୍ଧରେ ନାରାବାଜି କରିଥିଲେ।

ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟି ରେ ରଖି ସହରର ବିଭିନ୍ନ ଛକ ମାନଙ୍କରେ ପୋଲିସ ମୃତୟନ କରାଯାଇଥିଲା ଓ ପ୍ରମୁଖ ଧାରଣା ସ୍ଥଳମାନଙ୍କରେ ଖୋର୍ଦ୍ଧା ଉପଖଣ୍ଡ ଆରକ୍ଷୀ ଅଧୀକ୍ଷକ ଶ୍ରୀ ସୁଶୀଲ କୁମାର ମିଶ୍ର ଓ ଟାଉନ ଥାନାର ଆଇ.ଆଇ.ସି ଶ୍ରୀ ଉମାଶଙ୍କର ସିଂ ଉପସ୍ଥିତ ରହି ପରିସ୍ଥିତିଉପରେ ନଜର ରଖିଥିବାର ଦେଖିବାକୁ ମିଳିଥିଲା ।