‘ମୁଁ ବିଜେପିକୁ ସମର୍ଥନ ଦେବି, ରାଜ୍ୟସଭା ନିର୍ବାଚନରେ ବିଜେପିର ବିଜୟ ନିଶ୍ଚିତ….’ ସ୍ୱାଧୀନ ବିଧାୟକ ସାରଦା ପ୍ରଧାନ

ପ୍ରବାହ ନ୍ୟୁଜ୍ : ସେପ୍ଟେମ୍ବର ୩ରେ ହେବାକୁ ଯାଉଛି ରାଜ୍ୟସଭା ନିର୍ବାଚନ । ଯେଉଁଥିରେ କି ଓଡିଶାରେ ଖାଲି ପଡିଥିବା ଗୋଟିଏ ଆସନ ପାଇଁ ମଧ୍ୟ ନିର୍ବାଚନ ହେବ । ତେବେ ମମତା ମହନ୍ତ ରାଜ୍ୟସଭା ସାଂସଦ ପଦରୁ ଇସ୍ତଫା ଦେବା ପରେ, ତାଙ୍କ ସ୍ଥାନରେ ନୂଆକରି କିଏ ରାଜ୍ୟସଭାକୁ ଯିବ ତାକୁ ନେଇ ବଢିଛି ଚର୍ଚ୍ଚା ଆଲୋଚନା । ଆଉ ଏହାରି ଭିତରେ ମାହାଙ୍ଗାର ସ୍ୱାଧୀନ ବିଧାୟକ ସାରଦା ପ୍ରଧାନ ଦେଇଛନ୍ତି ବଡ ବୟାନ । ଏଥର ରାଜ୍ୟସଭା ନିର୍ବାଚନରେ ଭାରତୀୟ ଜନତା ପାର୍ଟିର ବିଜୟ ନିଶ୍ଚିତ । ବିଜୟ ପାଇଁ କାହାର ସମର୍ଥନ ବି ଆବଶ୍ୟକତା ପଡିବ ନାହିଁ ବୋଲି ସେ କହିଛନ୍ତି । ଏଥିସହ ସେ ମଧ୍ୟ ବିଜେପି ପ୍ରାର୍ଥୀଙ୍କୁ ସମର୍ଥନ କରିବେ ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି । ତା ସହ ମାହାଙ୍ଗାର ଏହି ସ୍ୱାଧୀନ ବିଧାୟକ ଆହୁରି ମଧ୍ୟ କହିଛନ୍ତି ଯେ, ଏଥର ରାଜ୍ୟ ରାଜନୀତିର ପରିସ୍ଥିତି ଦେଖି ନିର୍ବାଚନ ଅପ୍ରତିଦ୍ୱନ୍ଦ୍ୱୀ ହେବ ବୋଲି ସେ ଅନୁମାନ କରୁଛନ୍ତି । କାହିଁକି ନା ପୂର୍ବରୁ ବାଚସ୍ପତି ଓ ଉପ-ବାଚସ୍ପତି ନିର୍ବାଚନରେ ମଧ୍ୟ କୌଣସି ବି ବିରୋଧୀ ଦଳ ନିର୍ବାଚନରେ ଅବତୀର୍ଣ୍ଣ ହେଇନଥିଲେ । ତେଣୁ ରାଜ୍ୟସଭା ନିର୍ବାଚନରେ ମଧ୍ୟ ବିଜେପିର ବିଜୟ ସୁନିଶ୍ଚିତ ବୋଲି ସେ କହିଛନ୍ତି ।