ନୀଳଗିରିରେ ପଦ୍ମର ବିରାଟ ବିଜୟ

ନୀଳଗିରି : ସମଗ୍ର ରାଜ୍ୟରେ ମୋଦିଙ୍କ ଲହର ଘୂର୍ଣି ବାତ୍ୟାର ରୂପ ନେଇଛି। ପରିବର୍ତ୍ତନର ପ୍ରଚଣ୍ଡ ବାତ୍ୟା ଶଙ୍ଖଦଳକୁ ଧରାଶାୟୀ କରିଥିବା ବେଳେ, ସାରା ରାଜ୍ୟରେ ପଦ୍ମ ଖିଲିଖିଲି ହୋଇ ହସୁଥିବା ଦେଖାଯାଇଛି। ସେହି କ୍ରମରେ ନୀଳଗିରି ବିଧାନସଭାର ବିଜୟୀ ବ୍ୟବଧାନ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଦୁଇ ଦଳରୁ ଦୁଇ ଦୁଇଥର ବିଧାୟକ ସୁକାନ୍ତ ନାୟକ, ପଦ୍ମ ଲହରରେ ତାଙ୍କ ସତ୍ତା ହରାଇଥିବା ଦେଖିବାକୁ ମିଳିଛି। ଚଳିତ ନିର୍ବାଚନରେ ବିଜେପିରୁ ନିର୍ବାଚନ ଲଢୁଥିବା ସନ୍ତୋଷ ଖଟୁଆ ନିର୍ବାଚନ ପୂର୍ବରୁ ବହୁ ପ୍ରତିକୂଳ ପରିସ୍ଥିତିର ସାମ୍ନା କରିଥିଲେ ମଧ୍ୟ ନିର୍ବାଚନ ରଣାଙ୍ଗନରେ ଶାସକ ବିଜେଡି ଦଳର ପ୍ରାର୍ଥୀ ଶ୍ରୀ ନାୟକଙ୍କୁ  ଶ୍ରୀ ଖଟୁଆ ୧୯୮୩୯ ଖଣ୍ଡ ଭୋଟରେ ପରାଜିତ କରି ବିଜୟର ମୁକୁଟ ପିନ୍ଧିଛନ୍ତି। ଶ୍ରୀ ନାୟକ ୬୮୦୮୯ ଭୋଟ ପାଇଥିବା ବେଳେ ଶ୍ରୀ ଖଟୁଆ ୮୭୯୨୮ଖଣ୍ଡ ଭୋଟ ପାଇଛନ୍ତି।ଅନ୍ୟ ପକ୍ଷରେ ରାଜ୍ୟରେ ଜାତୀୟ ବିଜେପି ଦଳ ୮୦ରୁ ଅଧିକ ଆସନ ହାତେଇ ପ୍ରଥମଥର ପାଇଁ, ଏକାକୀ ସରକାର ଗଠନ କରିବାର ନୂତନ ସମ୍ଭାବନା ସୃଷ୍ଟି ହୋଇଥିବା  କୁହାଯାଇଛି। ଯଶଶ୍ଵୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଜୀଙ୍କ ଭବିଷ୍ୟତ ବାଣୀ ଆଗାମୀ ୧୦ତାରିଖରେ ସତ୍ୟ ହେବବୋଲି ,ଅନେକ ରାଜନୈତିକ ସମୀକ୍ଷକ ମତ ପ୍ରକାଶ କରିଛନ୍ତି। ତେବେ ସନ୍ତୋଷ ଖଟୁଆଙ୍କ ସମର୍ଥକ ମାନେ ବିଜୟ ଉତ୍ସବ ପାଳନ କରିବା ସହିତ ଡିଜେ ଓ ବାଣ ଫୁଟାଇ ଏକ ଶୋଭାଯାତ୍ରାରେ ନୀଳଗିରି ସହର ପରିକ୍ରମା କରିଥିଲେ।ସାଂସଦ ପ୍ରତାପ ଚନ୍ଦ୍ର ଷଡ଼ଙ୍ଗୀ,ବିଜୟୀ ବିଧାୟକ ଖଟୁଆଙ୍କ ସହିତ ଶୋଭାଯାତ୍ରାରେ ସାମିଲ ଥାଇ କର୍ମୀ ଓ ନେତା ଙ୍କ ଉତ୍ସାହ କୁ ଦ୍ଵିଗୁଣିତ କରିଥିଲେ।