ଜିଏସଟି ପରିଷଦ ବୈଠକ : କୌଣସି ସାମଗ୍ରୀ ଉପରେ ଟିକସ ବୃଦ୍ଧି କରାଯାଇନାହିଁ

ନୂଆଦିଲ୍ଲୀ :  ଜିଏସଟି ପରିଷଦର ୪୮ତମ ବୈଠକ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ଶେଷ ହୋଇଛି । ବୈଠକରେ କେତେକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଛି । ତେବେ କୌଣସି ସାମଗ୍ରୀ ଉପରେ ଟିକସ ବୃଦ୍ଧି କରାଯାଇନାହିଁ .

ପାନ ମସଲା ଓ ଗୁଟଖା ଉପରେ ହେଉଥିବା ଜିଏସଟି ଠକେଇକୁ ରୋକିବା ପ୍ରସଙ୍ଗରେ କୌଣସି ସହମତି ହୋଇପାରିନାହିଁ ।

ବୈଠକରେ ନିଆଯାଇଥିବା ନିଷ୍ପତ୍ତି ଅନୁସାରେ ୩ଟି ପ୍ରକାରର ଜିଏସଟି କାର୍ଯ୍ୟକୁ ଆଉ ଅପରାଧ ଭାବେ ଗଣନା କରାଯିବ ନାହିଁ । ଏହି ୩ ପ୍ରକାରର କାର୍ଯ୍ୟ ହେଲା-ନିଜର କର୍ତ୍ତବ୍ୟ କରିବାରେ କୌଣସି ଜିଏସଟି ଅଧିକାରୀଙ୍କୁ ଅଟକାଇବା ବା ପ୍ରତିବନ୍ଧକ ସୃଷ୍ଟି କରିବା, ତଥ୍ୟ ପ୍ରମାଣକୁ ଜାଣିଶୁଣି ଲୁଚାଇାବକୁ ଉଦ୍ୟମ କରିବା ଓ ସୂଚନା ଦେବାରେ ବିଫଳତା । ପୁଣି ଅପରାଧିକ କାର୍ଯ୍ୟାନୁଷ୍ଠାନର ସର୍ବନିମ୍ନ ସୀମାକୁ ୨ କୋଟିକୁ ବୃଦ୍ଧି କରାଯାଇଛି ବୋଲି ରାଜସ୍ବ ସଚିବ ସଂଜୟ ମାଲହୋତ୍ରା କହିଛନ୍ତି ।

ଆଜିର ବୈଠକର ଏଜେଣ୍ଡାରେ ମୋଟ ୧୫ଟି ପ୍ରସଙ୍ଗ ଥିବାବେଳେ କେବଳ ୮ଟି ପ୍ରସଙ୍ଗ ଉପରେ ଆଲୋଚନା ହୋଇଥିଲା ।

ଅନଲାଇନ ଗେମିଂ ଓ କ୍ୟାସିନୋ ଉପରେ ଜିଏସଟି ଲାଗୁ ଓ ଏକ ଜିଏସଟି ଟ୍ରିବୁନାଲ ଗଠନ ସଂପର୍କରେ କୌଣସି ଆଲୋଚନା ହୋଇନଥିଲା । ସେହିପରି ପାନ ମସଲା ଓ ଗୁଟଖା ଉପରେ ଜିଏସଟି ଠକେଇକୁ ରୋକିବା ସଂପର୍କରେ ଆଲୋଚନା ହୋଇନଥିଲା । ସମୟ ଅଭାବରୁ ଏସବୁ ପ୍ରସଙ୍ଗ ସ୍ଥଗିତ ରହିଛି ବୋଲି ସୀତାରମଣ କହିଛନ୍ତି ।