ଶ୍ରେଷ୍ଠ କର୍ମଚାରୀ ପୁରସ୍କାର ଦେଇ ଚାକିରିରୁ ବିଦା କରିଦେଲା ଗୁଗୁଲ୍

ହାଇଦ୍ରାବାଦ : ବିଶ୍ବର ପ୍ରମୁଖ ଟେକନଲୋଜୀ କମ୍ପାନିମାନେ ଏବେ ହଜାର ହଜାର କର୍ମଚାରୀଙ୍କୁ ଛଟେଇ କରିଚାଲିଛନ୍ତି । ବିନା କୌଣସି କାରଣ ଦର୍ଶାଇ ଛଟେଇ କରାଯିବାରୁ ପେସାଦାରମାନେ ଭୀଷଣ ମାନସିକ ଚାପରେ ଅଛନ୍ତି ।  ଏପରି ଏକ ଘଟଣା ଘଟିଛି ହାଇଦ୍ରାବାଦର ଜଣ ପୂର୍ବତନ ଗୁଗୁଲ କର୍ମଚାରୀଙ୍କ କ୍ଷେତ୍ରରେ । ତାଙ୍କୁ ସର୍ବଶ୍ରେଷ୍ଠ ପ୍ରଦର୍ଶନ ପାଇଁ ପୁରସ୍କାର ଦିଆଯାଇଥିଲା । କିନ୍ତୁ ହଠାତ ତାଙ୍କୁ ଚାକିରିରୁ ଛଟେଇ କରିଦିଆଗଲା । ଏହାକୁ ନେଇ ସେ ଗଭୀର ମାନସିତ ଆଘାତ ପାଇଛନ୍ତି ଓ ନିଜର ଦୁଃଖ କାହାଣୀ ସେ ସୋସିଆଲ ମିଡିଆ ସାଇଟ୍ ଲିଙ୍କଡଇନରେ ଲେଖିଛନ୍ତି ।

ହର୍ଷ ବିଜୟଭର୍ଗୀୟ ନାମକ ଏହି କର୍ମଚାରୀ ଲେଖିଛନ୍ତି ଯେ ଗତ ଶନିବାରଦିନ ତାଙ୍କୁ ଗୁଗୁଲରୁ ଏକ ଇ-ମେଲ ଆସିଥିଲା । ସେଥିରେ ଛଟେଇ ନୋଟିସ ଦିଆଯାଇଥିଲା । ଏ ସଂପର୍କରେ ସେ ଲେଖିଛନ୍ତି ଯେ ଯେତେବେଳେ ସେ ମେଲ ପଢି ଜାଣିଲେ ଯେ ଛଟେଇ ହୋଇଥିବା ୧୨ ହଜାର କର୍ମଚାରୀଙ୍କ ମଧ୍ୟରୁ ସେ ଅଛନ୍ତି, ସେ ବାକଶୂନ୍ୟ ହୋଇଯାଇଥିଲେ । ପ୍ରଶ୍ନ କରିଛନ୍ତି ଯେ ମାସର ଶ୍ରେଷ୍ଠ କର୍ମଚାରୀଭାବେ ସମ୍ମାନିତ ହେବା ପରେ ବି ତାଙ୍କୁ କାହିଁକି ଛଟେଇ କରାଗଲା ? ଛଟେଇ ହେବା ଦ୍ବାରା ତାଙ୍କ ପରିବାରର ଆର୍ଥିକ ଅବସ୍ଥା ଉପରେ ଗୁରୁତର ପ୍ରଭାବ ପଡ଼ିବ । ସବୁଦିନେ ଘରୁ ଅଫିସ ଯିବା ତାଙ୍କର ଅଭ୍ୟାସ ହୋଇଯାଇଥିଲା, କିନ୍ତୁ ଏବେ ସେ ଘରେ ଅଛନ୍ତି ।

ଠିକ ଏହିପରି ସମାନ ପ୍ରଶ୍ନ ଛଟେଇ ହୋଇଥିବା ୧୨ ହଜାର କର୍ମଚାରୀମଧ୍ୟ ପଚାରୁଥିବେ । କିନ୍ତୁ କମ୍ପାନି ପକ୍ଷରୁ କୌଣସି ଉତ୍ତର ଦିଆଯାଉ ନାହିଁ ବୋଲି ସେ ଲେଖିଛନ୍ତି।