ଖୋର୍ଦ୍ଧା ସହରରୁ ପୁଣି ଲକ୍ଷାଧିକ ଟଙ୍କାର ବ୍ରାଉନ ସୁଗାର ଜବତ

ଖୋର୍ଦ୍ଧା :୨୪।୧୧(ପ୍ରବାହ ନିଉଜ୍) ପୋଲିସର କଡ଼ା ଆଭିମୁଖ୍ୟ ସହିତ ବାରମ୍ବାର ଚଢ଼ାଉ ପରେ ମଧ୍ୟ ଖୋର୍ଦ୍ଧା ସହରରୁ ବ୍ରାଉନ ସୁଗାର ବ୍ୟାବସାୟ ଥମିବାର ନାଁ ନେଉନାହିଁ । ଏସ୍.ଟି.ଏଫ୍ ଏବଂ ଖୋର୍ଦ୍ଧା ପୋଲିସ ପାଇଁ ବ୍ରାଉନ ସୁଗାର ବ୍ୟବସାୟ ମୁଣ୍ଡବିନ୍ଧାର କାରଣ ପାଲଟି ଥିବାବେଳେ ଆଜି ପୁଣି ଵିଶେଷ ସୂତ୍ରରୁ ବ୍ରାଉନ ସୁଗାର କାରବାର ଚାଲିଥିବାର ଖବର ପାଇ ଏସ୍ଡିପିଓ ସୁଶୀଲ ମିଶ୍ର ଏବଂ ଟାଉନ ଥାନା ଅଧିକାରୀ ସଞ୍ଜୟ ପଟ୍ଟନାୟକ ଙ୍କ ନିର୍ଦ୍ଦେଶ ରେ ପୋଲିସର ଏକ ଟିମ ସ୍ଥାନୀୟ ବିଡିଏ କଲୋନୀରୁ ତିନିଜଣ ବେପାରୀଙ୍କୁ ଗିରଫ କରିଛି ଖୋର୍ଦ୍ଧା ପୋଲିସ । ଗିରଫ ଆସାମୀ ମାନଙ୍କ ମଧ୍ୟରୁ ସୋମନାଥ ବରାଳ(୨୦) ଓ ଅବିନାଶ ପାତ୍ର(୨୦) ସ୍ଥାନୀୟ ଭାଲିଆବାଡ଼ି ଅଞ୍ଚଳର ହୋଇଥିବା ବେଳେ ଆଉଜଣେ ସାମନ୍ତରାପୁର ଅଞ୍ଚଳର ମହେନ୍ଦ୍ର ବେହେରା(୨୦) ବୋଲି ଜଣାପଡିଛି । ଅଭିଯୁକ୍ତ ମାନଙ୍କ ଠାରୁ ପାଞ୍ଚ ଲକ୍ଷ ଟଙ୍କାର ବ୍ରାଉନ ସୁଗାର ଏବଂ  ବାଜାଜ, ୟମାହା ଓ ହିରୋହଣ୍ଡା ପରି ପାଞ୍ଚ ପାଞ୍ଚଟି ଦାମୀ ବାଇକ ଜବତ ହୋଇଛି, ଯାହାର ଆନୁମାନିକ ମୂଲ୍ୟ ଆଠ ଲକ୍ଷ ଟଙ୍କାରୁ ଉର୍ଦ୍ଧ ବୋଲି ଜଣାପଡି ଥିବାବେଳେ ଅଭିଯୁକ୍ତଙ୍କ ଠାରୁ ତିନୋଟି ଦାମୀ ମୋବାଇଲ ସହିତ ନଗଦ ଏକଲକ୍ଷ ସାତଶହ ଟଙ୍କା ବରାମଦ କରିଛି ପୋଲିସ ।ଏ ନେଇ ଖୋର୍ଦ୍ଧା ଆଦର୍ଶ ଥାନାରେ କେସ ନମ୍ବର ୪୭୭/୨୦୨୧ ରେ ଏକ ମାମଲା ରୁଜ୍ଜୁ କରାଯାଇ ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ନେଇ ସୂଚନା ଦେଇଛି ପୋଲିସ ।