ସ୍ନାନ ପୂର୍ଣ୍ଣିମାରେ ପୂର୍ଣବିଗ୍ରହ ଚତୁର୍ଦ୍ଧା ମୂର୍ତ୍ତିଙ୍କ ନିରାଡ଼ମ୍ବର ସ୍ନାନଯାତ୍ରା

ଖୋର୍ଦ୍ଧା : ୨୪/୦୬(ପ୍ରବାହ ନିଉଜ୍) ଭକ୍ତ ଓ ଭଗବାନଙ୍କ ଭାବଭକ୍ତିର ପବିତ୍ର ସମ୍ପର୍କ ଭିତରେ ଜଗତର ନାଥ ମହାପ୍ରଭୁ ଜଗନ୍ନାଥଙ୍କ ସ୍ନାନ ପୁର୍ଣିମା ଦିନ ଅପେକ୍ଷାରତ ଶ୍ରଦ୍ଧାଳୁ ସାହାଣମେଲା ରେ ଚତୁର୍ଦ୍ଧାମୂର୍ତ୍ତିଙ୍କୁ ସ୍ଵଚକ୍ଷୁରେ ଦର୍ଶନର ଅନେକ ଆଶା ବାନ୍ଧିଥାନ୍ତି । କିନ୍ତୁ ଗତବର୍ଷ ପରି ମଧ୍ୟ ଏ ବର୍ଷ କରୋନା ମହାମାରୀ ଭଳି ମାରାତ୍ମକ ବ୍ୟାଧିକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ପକ୍ଷରୁ ଜାରି ହୋଇଥିବା ନିୟମକୁ ପାଳନ କରି ଶ୍ରୀଜୀଉଙ୍କ ସ୍ନାନଯାତ୍ରାର ସମସ୍ତ କାର୍ଯ୍ୟ ଭକ୍ତଙ୍କ ବିନା ସମ୍ପନ୍ନ ହୋଇଯାଇଛି ।

ଖୋର୍ଦ୍ଧା ଉପକଣ୍ଠ ଜାଗୁଳାଇପାଟଣା ସ୍ଥିତ ମହାପ୍ରଭୁଙ୍କ ପୂର୍ଣ୍ଣବିଗ୍ରହ ଶ୍ରୀ ଶ୍ରୀ ଅନନ୍ତ ପୁରୁଷୋତ୍ତମ ଦେବଙ୍କ ପୀଠରେ ଚତୁର୍ଦ୍ଧା ମୂର୍ତ୍ତିଙ୍କର ପବିତ୍ର ସ୍ନାନଯାତ୍ରା ମଧ୍ୟ କୋଭିଡ ନିୟମ ଅନୁଯାୟୀ ବିନା ଭକ୍ତରେ ସମସ୍ତ ନୀତିକାନ୍ତିରେ ପାଳିତ ହୋଇଯାଇଛି। ୧୦୮ଗରା ସୁଭାସିତ ଜଳରେ ଚତୁର୍ଦ୍ଧାମୂର୍ତ୍ତି (ପୂର୍ଣ୍ଣ ବିଗ୍ରହ)ସ୍ନାନ ହେବା ପରେ ଗଜାନନ ବେଶରେ ଦର୍ଶନ ଦେଇଛନ୍ତି। ଆଜି ଭୋର ୪ଟାରେ ଦ୍ବାରଖୋଲା ହେବା ପରେ ମହାପ୍ରଭୁଙ୍କ ସମସ୍ତ ନୀତିକାନ୍ତି ସହ ସକାଳ ୭ଟା ରେ ଗୋପାଳ ବଲ୍ଲଭ ଭୋଗ ଲାଗି ହୋଇଥିଲା। ଦିନ ୧୦ଟାରେ ଶ୍ରୀଜୀଉଙ୍କ ପହଣ୍ଡି କାର୍ଯ୍ୟ ଆରମ୍ଭ ହୋଇଥିଲା ଓ ସାଢେ ୧୦ଟାରେ ଚତୁର୍ଦ୍ଧା ବିଗ୍ରହ ସ୍ନାନ ମଣ୍ଡପରେ ବିଜେ କରିଥିଲେ।

ପ୍ରଥମେ ଶ୍ରୀ ସୁଦର୍ଶନ, ଶ୍ରୀ ବଳଭଦ୍ର, ଦେବୀ ସୁଭଦ୍ରାଙ୍କ ପରେ ସର୍ବଶେଷରେ ଶ୍ରୀଜଗନ୍ନାଥ ମହାପ୍ରଭୁ ଧାଡି ପହଣ୍ଡିରେ ଆସି ବିଜେ କରିଥିଲେ। ପରେ ମଣ୍ଡପରେ ଅନ୍ଯ ନୀତିକାନ୍ତି କରାଯାଇଥିଲା। କାରୁଣ୍ୟ କୁଣ୍ଡ ରୁ ଜଳ ଆସିବା ପରେ ଚତୁର୍ଦ୍ଧା ବିଗ୍ରହ ଅଭିମନ୍ତ୍ରିତ ସୁଭାସିତ ଜଳରେ ସ୍ନାନ କରିଥିଲେ। ବେଶ ଲାଗି ପରେ ମଙ୍ଗଳ ଆଳତୀ ହୋଇ ଅନ୍ଯାନ୍ଯ ନୀତି ସମ୍ପନ୍ନ ହୋଇଥିଲା। ଆଜି ସନ୍ଧ୍ଯା ୬ଟା ବେଳେ ଚତୁର୍ଦ୍ଧା ବିଗ୍ରହ ପହଣ୍ଡି ହୋଇ ଅଣସର ଗୃହ ରେ ପ୍ରବେଶ କରିବେ ବୋଲି ମନ୍ଦିରର ମୁଖ୍ଯ ପୂଜକ ମହନ୍ତ କମଳ ଲୋଚନ ମହାରାଜ ସୂଚନା ଦେଇଛନ୍ତି। ମନ୍ଦିର ପରିଚାଳନା କମିଟିର ସଦସ୍ୟ ମାନଙ୍କ ଉପସ୍ଥିତିରେ ସ୍ବଳ୍ପ ସଂଖ୍ଯକ ସେବାୟତଙ୍କୁ ନେଇ ମହାପ୍ରଭୁଙ୍କ ସମସ୍ତ ନୀତି ସମ୍ପନ୍ନ ହୋଇଥିଲା ।

Leave a Reply

Your email address will not be published. Required fields are marked *