ରାଜ୍ୟ ସରକାରଙ୍କ ବୈମାତୃକ ମନୋଭାବ : ସ୍ଥାୟୀ ନିଯକ୍ତିରୁ ବାଦ୍ ପଡିଛନ୍ତି ଖୋର୍ଦ୍ଧା ଜିଲ୍ଲାର ସ୍ବାସ୍ଥ୍ୟ ଠିକା କର୍ମଚାରୀ

ଖୋର୍ଦ୍ଧା:୧୩/୧୧(ପ୍ରବାହ ନିଉଜ)  ରାଜ୍ୟରୁ ଠିକା ନିଯୁକ୍ତି ପ୍ରକ୍ରିୟାକୁ ଶେଷ କରିବାର ଐତିହାସିକ ନିଷ୍ପତି ଓଡ଼ିଶା ସରକାରଙ୍କ ଦ୍ଵାରା ନିଆଯାଇ ୫୭ହଜାର ଠିକା କର୍ମଚାରୀଙ୍କୁ ସ୍ଥାୟୀ ଭାବେ ନିଯୁକ୍ତ କରାଯାଇଛି। ହେଲେ ସେଥିରୁ ବାଦ୍ ପଡିଛନ୍ତି ଜାତୀୟ ସ୍ବାସ୍ଥ୍ୟ ମିଶନରେ କାର୍ଯ୍ୟରତ ସମସ୍ତ ଠିକା କର୍ମଚାରୀ।

ବନ୍ୟା ହେଉ କି ବାତ୍ୟା ହେଉ, କୋଭିଡ ପରି ମହାମାରୀ ସମୟରେ ମଧ୍ଯ ସବୁଠି ଆଗରେ ରହି ନୀରିବିଛିନ୍ନ ସେବା ଯୋଗାଇ ଆସିଛନ୍ତି ଜାତୀୟ ସ୍ବାସ୍ଥ୍ୟ ମିଶନ ଅନ୍ତର୍ଭୁକ୍ତ ଠିକା ସ୍ୱାସ୍ଥ୍ୟ କର୍ମଚାରୀ।ତୃଣମୂଳ ସ୍ତରରେ ସ୍ବାସ୍ଥ୍ୟ ସେବା ଯୋଗାଉଥିବା ବେଳେ ରାଜ୍ୟ ସରକାରଙ୍କ ଏପରି ବୈମାତୃକ ମନୋଭାବ ସେମାନଙ୍କୁ କେବଳ ଅପମାନିତ କରିନି ବରଂ ସେମାନଙ୍କର ମନୋବଳ ଭାଙ୍ଗି ଯାଇଛି ବୋଲି କହିଛନ୍ତି ଠିକା କର୍ମଚାରୀ ସଂଘର ସଦସ୍ୟ। ଓଡ଼ିଶା ବ୍ୟତୀତ ଦେଶର ଅନ୍ୟ ରାଜ୍ୟ ମାନଙ୍କରେ ପ୍ରଦେଶ ସରକାର ନିଜ ରାଜ୍ୟରେ ଜାତୀୟ ସ୍ବାସ୍ଥ୍ୟ ମିଶନର କର୍ମଚାରୀ ମାନଙ୍କୁ ନିୟମିତ କରିସାରିଥିଲେ ମଧ୍ୟ ଓଡ଼ିଶା ସରକାର ଏ ନେଇ ଦୀର୍ଘଦିନ ଧରି ଟାଳଟୁଳ ନୀତି ଅବଲମ୍ବନ କରି ଆସୁଥିବା ହେତୁ ଠିକା କର୍ମଚାରୀ ମହଲରେ ଅସନ୍ତୋଷ ଦାନା ବାନ୍ଧୁଛି।

ସରକାରଙ୍କ ଏ ପ୍ରକାର ନିଷ୍ପତ୍ତିକୁ ବିରୋଧ କରି ଖୋର୍ଦ୍ଧା ଜିଲ୍ଲାର ସ୍ବାସ୍ଥ୍ୟ ଠିକା କର୍ମଚାରୀ ସଂଘର ସମସ୍ତ ଶ୍ରେଣୀର କର୍ମଚାରୀ ସ୍ଥାନୀୟ ପ୍ରାଣନାଥ ମହାବିଦ୍ୟାଳୟ ପରିସରରେ ଆୟୋଜିତ ବୈଠକରେ ନିଜର ଦାବି ଉତ୍ସ୍ଥାପନ କରିଥିବା ବେଳେ ନ୍ୟାର୍ଯ୍ୟ ଦାବି ପୂରଣ ଲାଗି ସରକାରଙ୍କୁ ଅନୁରୋଧ ନିବେଦନ କରିଛନ୍ତି ।