‘ଆଜାଦ ଯାଆନ୍ତୁ ବା ଥାଆନ୍ତୁ ଫରକ ପଡ଼ିବନି; ଦଳ ଆଗକୁ ବଢ଼ିବ’: କଂଗ୍ରେସ
ନୂଆଦିଲ୍ଲୀ: ନେତୃତ୍ୱ ସଙ୍କଟର ସମ୍ମୁଖୀନ ହୋଇଥିବା କଂଗ୍ରେସ ଦଳ ନିଜର ଭାବମୂର୍ତ୍ତି ରକ୍ଷା ପାଇଁ ଭାରତ ଯୋଡୋ ଯାତ୍ରାର କାର୍ଯ୍ୟକଳାପରେ ସମନ୍ଵୟ ରଖିିବା ପାଇଁ ଦଳୀୟ ନେତାମାନଙ୍କୁ ନିଯୁକ୍ତ କରିଛି। ଏଥିସହ କଂଗ୍ରେସ କହିଛି ଯେ ‘ଆଜାଦ ଯାଆନ୍ତୁ ବା ଥାଆନ୍ତୁ ଫରକ ପଡ଼ିବନି; ଦଳ ଆଗକୁ ବଢ଼ିବ’।
କଂଗ୍ରେସ ଗଣମାଧ୍ୟମ ବିଭାଗର ମୁଖ୍ୟ ପବନ ଖେରା କହିଛନ୍ତି ଯେ ଯେଉଁ ରାଜ୍ୟରୁ ଏହି ‘ଐତିହାସିକ’ ଯାତ୍ରା ଅତିକ୍ରମ କରିବ ସେହି ରାଜ୍ୟଗୁଡ଼ିକରେ ’ଭାରତ ଯୋଡୋ ଯାତ୍ରା’ର ଗଣମାଧ୍ୟମ କାର୍ଯ୍ୟକଳାପକୁ ସମନ୍ଵୟ କରୁଥିବା ଲୋକଙ୍କ ନାମକୁ ଦଳ ଅନୁମୋଦନ କରିଛି। କନ୍ୟାକୁମାରୀରୁ କାଶ୍ମୀରକୁ ଅତିକ୍ରମ କରୁଥିବା କଂଗ୍ରେସର ଭାରତ ଯୋଡୋ ଯାତ୍ରା ସେପ୍ଟେଟର ୭ ରୁ ଆରମ୍ଭ ହେବ। ଏହି ପରିପ୍ରେକ୍ଷୀରେ ଭାରତ ଯୋଡୋ ଯାତ୍ରା ପାଇଁ ରାଜ୍ୟ ଭିତ୍ତିକ ଗଣମାଧ୍ୟମ ଏବଂ ପ୍ରଚାର ପ୍ରଭାରୀ ଏବଂ ସଂଯୋଜକଙ୍କ ପ୍ରଥମ ତାଲିକା ଖେରା ପ୍ରକାଶ କରିଛନ୍ତି।
ଭାରତ ଯୋଡୋ ଯାତ୍ରା ଏକ ଘଟଣା ନୁହେଁ ବରଂ ଲୋକଙ୍କୁ ଏକାଠି କରିବା ପାଇଁ ଏକ ଆନ୍ଦୋଳନ। ସେଥିପାଇଁ ଯାତ୍ରାର ପ୍ରଚାରକୁ ପରିଚାଳନା କରିବା ପାଇଁ ମନୋନୀତ ଲୋକଙ୍କୁ ସେ କହିଛନ୍ତି, ’ଭାରତବାସୀଙ୍କ ମଧ୍ୟରେ ଯାତ୍ରାର ଆତ୍ମାକୁ ପହଞ୍ଚାଇବା ପାଇଁ ଦଳ ଏବଂ ନେତୃତ୍ୱ ଆପଣଙ୍କ ଉପରେ ବହୁତ ଆଶା ଏବଂ ଅପାର ବିଶ୍ୱାସ ରଖିଛି।
ତାଲିକା ଅନୁଯାୟୀ, ଶାମା ମହମ୍ମଦଙ୍କୁ ତାମିଲନାଡୁର ପ୍ରଭାରୀ ଏବଂ ଆନ୍ଧ୍ରପ୍ରଦେଶ ପାଇଁ ଡଲି ଶର୍ମାଙ୍କ ନାମ ମନୋନୀତ କରାଯାଇଛି। ସେହିପରି ଲାବଣ୍ୟ ବାଲାଲ କେରଳ, କର୍ଣ୍ଣାଟକ ପାଇଁ ସ୍ଜରିତା ଲାଇଟଫ୍ଲାଙ୍ଗ, ତେଲେଙ୍ଗାନା ପାଇଁ ଏସ ଭି ରମାନି, ଜମ୍ମୁ କଶ୍ମୀର ପାଇଁ ଅଲକା ଲାମ୍ବା, ମହାରାଷ୍ଟ୍ର ପାଇଁ ଶୋଭା ଓଜା, ରାଜସ୍ଥାନ ପାଇଁ ବିଭାକର ଶାସ୍ତ୍ରୀ, ପଞ୍ଜାବ ପାଇଁ ଅଂଶୁଲ ଅଭିଜିତ ଏବଂ ମଧ୍ୟପ୍ରଦେଶ ପାଇଁ ରାଗିଣୀ ନାୟକ ଦାୟିତ୍ୱରେ ରହିବେ।
ଯେଉଁ ରାଜ୍ୟରୁ ଯାତ୍ରା ଅତିକ୍ରମ କରିବ ସେହି ରାଜ୍ୟଗୁଡ଼ିକରେ ଗଣମାଧ୍ୟମ କାର୍ଯ୍ୟକଳାପ ପାଇଁ ସଂଯୋଜକମାନଙ୍କୁ ମଧ୍ୟ ନିଯୁକ୍ତ କରାଯାଇଛି।
