ଖୋର୍ଦ୍ଧା ପଲ୍ଲା କୋଣାର୍କ ନଗରରେ ବଧୂହତ୍ୟା ଅଭିଯୋଗ

ଖୋର୍ଦ୍ଧା : ୨୩/୦୬(ପ୍ରବାହ ନିଉଜ୍) ଟାଉନ ଥାନା ଅନ୍ତର୍ଗତ ପଲ୍ଲା ଅଞ୍ଚଳର କୋଣାର୍କ ନଗରରୁ  ୨୯ ବର୍ଷୀୟ ବିବାହିତା ମହିଳାଙ୍କ ଶବ ଉଦ୍ଧାର । ମୃତକା ହେଲେ ଖୋର୍ଦ୍ଧା ଜିଲ୍ଲା ଚନ୍ଦକା ଥାନା ଅନ୍ତର୍ଗତ କୁଜିମହଲ ଗ୍ରାମର ସୁନାକର ବେହେରାଙ୍କ ଝିଅ ତିଳୋତ୍ତମା ବେହେରା ଓରଫ ଛବିନା ।

ଗତ ପାଞ୍ଚବର୍ଷ ତଳେ ୨୦୧୬ ମସିହାରେ ବୈଦିକ ରୀତିରେ ଖୋର୍ଦ୍ଧା ପଲ୍ଲା କୋଣାର୍କ ନଗର ଅଞ୍ଚଳର ଶରତ ବେହେରା ଙ୍କ ପୁଅ ସନ୍ତୋଷ ବେହେରା ଓରଫ ଲୋକାଙ୍କୁ ବିବାହ କରିଥିଲେ । କିନ୍ତୁ ଦୀର୍ଘ ପାଞ୍ଚ ବର୍ଷ ବିତିଯାଇଥିଲେ ମଧ୍ୟ ତିଳୋତ୍ତମାଙ୍କର କୌଣସି ସନ୍ତାନସନ୍ତତି ନହେବାରୁ ପରବର୍ତ୍ତୀ ସମୟରେ ଛୋଟଛୋଟ କାରଣକୁ ନେଇ ଶାଶୁ ଘର ଲୋକ ଝିଅକୁ ଅଧିକ ଯୌତୁକ ଦାବିରେ ମାନସିକ ଓ ଶାରୀରିକ ନିର୍ଯ୍ୟାତନା ଦେଇ ଆସୁଥିଲେ ବୋଲି ଅଭିଯୋଗ ଆଣିଥିବା ସହିତ ଗତକାଲି ରାତିରେ ଝିଅ ସହିତ ପାଟିତୁଣ୍ଡ କରିବା ସହିତ ତିଳୋତ୍ତମାଙ୍କୁ ମାରିଦେଇଥିବା ନେଇ ବାପା ଓ ଭାଇ ଅଭିଯୋଗ କରିଛନ୍ତି ।

କିନ୍ତୁ ଏପଟେ ମୃତକା ତିଳୋତ୍ତମାଙ୍କ ଶଶୁର ଶରତଙ୍କ କହିବା ଅନୁଯାୟୀ ସାମାନ୍ୟ ପାଟିତୁଣ୍ଡକୁ ନେଇ ଗତକାଲି ବିଳମ୍ବିତ ରାତିରେ ବାରିପଛ ପଟ ପାଇଖାନା ଘରେ ଦଉଡ଼ି ଦେଇ ଆତ୍ମହତ୍ୟା କରିଛି । ଘଟଣା ସମ୍ପର୍କରେ ଟାଉନ ଥାନା ପୋଲିସ ଖବର ପାଇ ଜିଲ୍ଲା ମୁଖ୍ୟ ଚିକିତ୍ସାଳୟରେ ପହଞ୍ଚି ଶବକୁ ଜବତ କରି ବ୍ଯବଚ୍ଛେଦ ଲାଗି ପଠାଇଥିବା ବେଳେ ଘଟଣା ସ୍ଥଳରେ ସାଇଣ୍ଟିଫିକ ଟିମ ପହଞ୍ଚି ତଦନ୍ତ ଆରମ୍ଭ କରିଛି ।

ଏପଟେ ପୋଲିସ ଖୋର୍ଦ୍ଧା ଟାଉନ ଥାନା କେସ ନମ୍ବର ୨୪୬/୨୧ରେ ଏକ ମାମଲା ରୁଜ୍ଜୁ କରି ମୃତ ତିଳୋତ୍ତମାଙ୍କ ସ୍ୱାମୀ ସନ୍ତୋଷ, ଶଶୁର ଶରତ, ଶାଶୁ ମଞ୍ଜୁଲତାଙ୍କୁ ପୋଲିସ ଅଟକ ରଖିଥିବା ସହିତ ବ୍ୟବହୃତ ଦଉଡ଼ି ଓ ବାଲଟି କୁ ମଧ୍ୟ ଜବତ କରି ତଦନ୍ତ ଜାରି ରଖିଛି ଏବଂ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ପ୍ରକୃତ ଘଟଣା ଜଣାପଡିବ ବୋଲି ଏସ୍.ଡି.ପି.ଓ ଶ୍ରୀ ସୁଶୀଲ କୁମାର ମିଶ୍ର ସୂଚନା ଦେଇଛନ୍ତି ।