ଘରୁ ଡାକି ନେଇ ଯୁବକଙ୍କୁ ହତ୍ୟା କରିବା ସହ ଶବକୁ ଜାଳିଦେଲେ ଦୁବୁର୍ତ୍ତ

ବେଗୁନିଆ : ୩/୮(ପ୍ରବାହ ନିଉଜ୍) ଘରୁ ଡାକି ନେଇ ଯୁବକଙ୍କୁ ହତ୍ୟା କରିବା ସହ ଶବକୁ ଜାଳିଦେବା ଭଳି ଲୋମହର୍ଷକାରୀ ଘଟଣା ଆଜି ଖୋର୍ଦ୍ଧା ଜିଲ୍ଲା ବେଗୁନିଆ ଥାନା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି । ସଙ୍ଗଠନ ରେ ନ ସାମିଲ ହେବାରୁ କ୍ରୋଧାନ୍ନିତ ହୋଇ ଖାଲି ମାରିଲେ ନାହିଁ ଯେ, ହତ୍ୟାକାଣ୍ଡ କୁ ଲୁଚାଇବାକୁ ଯାଇ ରାତାରାତି ଶବକୁ ଜଙ୍ଗଲ ମଧ୍ୟରେ ପୋଡିଦେଇଥିବା ଭଳି ଜଘନ୍ୟ ଘଟଣା ସାମ୍ନାକୁ  ଆସିଛି।

ସୂଚନା ମୁତାବକ ଗତ ରବିବାର ଦିନ ବେଗୁନିଆ ଥାନା ଅନ୍ତର୍ଗତ ଡିଙ୍ଗର ଅଭିମାନପୁର ଗାଁର ସତ୍ୟବ୍ରତ ନାୟକଙ୍କୁ ଗାଁରେ କୌଣସି ଏକ ସଙ୍ଗଠନ ପକ୍ଷରୁ ଆୟୋଜିତ ବୈଠକରେ ଯୋଗ ଦେବାକୁ ସେହି ଗ୍ରାମର କିଛି ଯୁବକ ଘରୁ ଡାକିନେଇଥିବା ବେଳେ କୌଣସି ଏକ କାରଣରୁ ସତ୍ୟବ୍ରତ ସଙ୍ଗଠନର ସଦସ୍ୟ ହେବାକୁ ମନା କରିବାରୁ ସେଠାରେ ତାଙ୍କୁ ଠେଲାପେଲା କରିବା ସହ ଖରାପ ବ୍ୟବହାର ପ୍ରଦର୍ଶନ କରିବାରୁ ସେ ଘରକୁ ଫେରି ଆସିଥିଲେ । ତେବେ ପୁନର୍ବାର ରାତିରେ ପୁଣି ବୈଠକ ବସିବାର ଅଛି କହି ସେହି ଗ୍ରାମର ଦୁଇଜଣ  ଯୁବକ ସମନି ନାୟକ ଓ ଟୁଲୁ ବେହେରା ସତ୍ୟବ୍ରତଙ୍କ ଘରକୁ ଆସି ଡାକିଥିଲେ  ଏବଂ ତାଙ୍କୁ  ସଙ୍ଗଠନର ସଦସ୍ୟ ହେବାକୁ ଚାପ ମଧ୍ୟ ପକାଇଥିଲେ । ହେଲେ ପୂର୍ବ ପରି ସତ୍ୟବ୍ରତ ସେମାନଙ୍କ କଥାରେ ରାଜି ନ ହେବାରୁ ମାନବବାଦ ସଙ୍ଗଠନର ମୁଖ୍ୟ ମାନସ ଦାସଙ୍କ ନିର୍ଦ୍ଦେଶରେ ସଙ୍ଗଠନର ଯୁବକମାନେ  ତାଙ୍କୁ ଜୀବନରୁ ମାରିଦେବା ସହ ଖୋର୍ଦ୍ଧା ସଦର ଥାନା ଅଞ୍ଚଳ କରଡ଼ଗଡ଼ିଆ ଗାଁ ନିକଟରେ ଥିବା ପଟାସ ଜଙ୍ଗଲରେ ସତ୍ୟବ୍ରତଙ୍କୁ ପୋଡିଦେଇଥିବା ନେଇ ସତ୍ୟବ୍ରତଙ୍କ ଶଳା ବେଲେଶ୍ୱର ପରିଡ଼ା ବେଗୁନିଆ ଥାନାରେ ଅଭିଯୋଗ କରିଛନ୍ତି ।

ପୋଲିସ ମାମଲାକୁ ଗୁରୁତର ସହ ନେଇ ଏହାର ତଦନ୍ତ ଆରମ୍ଭ କରିଥିବା ବେଳେ ଖୋର୍ଦ୍ଧା ଏସ୍.ଡି.ପି.ଓ ଶୁଶୀଲ ମିଶ୍ରଙ୍କ ସମେତ ବେଗୁନିଆ ଓ ଖୋର୍ଦ୍ଧା ସଦର ଥାନା ଅଧିକାରୀ ଏବଂ ସାଇଣ୍ଟିଫିକ ଟିମ ଅଭିଯୋଗ ଅନୁଯାୟୀ ସତ୍ୟବ୍ରତଙ୍କୁ ପୋଡାଯାଇଥିବା ଘଟଣାସ୍ଥଳରେ ପହଞ୍ଚି ପୋଡ଼ା ପାଉଁଶ ଓ ସନ୍ଦିଗ୍ଧ ଜିନିଷ ଜବତ କରିଥିବା ବେଳେ ବେଗୁନିଆ ପୋଲିସ ୬ଜଣ ସନ୍ଦିଗ୍ଧ ଙ୍କୁ ଅଟକ ରଖି ପଚରା ଉଚରା କରୁଛି  ।