ମାଓ ଅଧୂଷ୍ୟୁତ ନିୟମଗିରି ଅଞ୍ଚଳରେ ମାଓ ବିରୋଧୀ ପୋଷ୍ଟର

କଲ୍ୟାଣସିଂହପୁର: ୨୬/୮(ପ୍ରବାହ ନିଉଜ) ନିୟମଗିରି ଅଞ୍ଚଳକୁ ମାଓଗଡ କୁହାଯାଉଥିବା ବେଳେ ଆଜି  ଦେଖିବାକୁ ମିଳିଛି ମାଓ ବିରୋଧୀ ପୋଷ୍ଟର।  ମାଓବାଦୀଙ୍କୁ ବିରୋଧ କରି ନିଜର ଅସନ୍ତୋଷ ପ୍ରକାଶ କରିଛନ୍ତି ଡଙ୍ଗରିଆ ଅଧିବାସୀ।  ରାୟଗଡ଼ା ଜିଲ୍ଲା କଲ୍ୟାଣସିଂହ ପୁର ବ୍ଲକ ଅଧୀନ ନିୟମଗିରି ପାହାଡର ପାର୍ସାଲି ଗ୍ରାମରେ ଥିବା ଅଙ୍ଗନବାଡି କେନ୍ଦ୍ର କାନ୍ଥରେ ମାଓବାଦୀ ବିରୋଧୀ ପୋଷ୍ଟର ଲାଗିଥିବା ଦେଖିବାକୁ ମିଳିଛି।

ଉକ୍ତ ପୋଷ୍ଟରରେ ମାଓବାଦୀ  ମାନେ ନୀୟମଗିରି ଅଞ୍ଚଳର ନିରୀହ ଆଦିବାସୀ ମହିଳା ମାନଙ୍କୁ ମାଓ ସଙ୍ଗଠନରେ ସାମିଲ୍ କରି ସେମାନଙ୍କ ସରଳତାର ସୁଯୋଗ ନେଇ ତାଙ୍କ ଇଜ୍ଜତ ସହିତ ଖେଳ ଖେଳୁଥିବା ନେଇ ଉଲ୍ଲେଖ ହୋଇଥିବା ଦେଖିବାକୁ ମିଳିଛି। ବିଗତ କିଛି ବର୍ଷ ମଧ୍ୟରେ ମାଓ ସଙ୍ଗଠନରେ ସାମିଲ କିଛି ନାବାଳିକା ସେଠାରେ ଯୌନ ଅତ୍ୟାଚାରର ଶିକାର ହୋଇଥିବା ବେଳେ ଅନେକ ନାବାଳିକା ମାନେ ଗର୍ଭନଷ୍ଟ କରିଛନ୍ତି। ପଡ଼ୋଶୀ ରାଜ୍ୟ ଛତିଶଗଡ଼ ଅଞ୍ଚଳର ଲକ୍ଷ୍ମୀ ନାମକ ଜଣେ କ୍ୟାଡ଼ର ବିଗତ ଦିନରେ ଗର୍ଭବତୀ ହୋଇଥିଲେ ଏବଂ ଦଳରୁ ତଡା ଖାଇଥିଲେ, ଯାହାର ପରିଣାମ ସ୍ବରୂପ ଲକ୍ଷ୍ମୀଓ ତାର ୧୩ ବର୍ଷର ଝିଅ ଲାଖପଦର ଗ୍ରାମରେ ଅନାଥ ଭାବେ ରହୁଛନ୍ତି। ଏହାସହ ଲାଖପଦର ଗ୍ରାମର ପାରୋ ଶିକ୍କା , ମିଞ୍ଜାଳି ଶିକ୍କା, କୁର୍ସୁମୁହି ଗ୍ରାମର ପଦ୍ମା ଶିକ୍କା ନାମକ ନାବାଳିକା ମାନେ ଏବେ ସମସ୍ତେ ୬ମାସର ଗର୍ଭବତୀ ଅଛନ୍ତି ଓ ସଙ୍ଗଠନରୁ ତଡାଖାଇବା ପରେ ବର୍ତ୍ତମାନ ବିଭିନ୍ନ ଗ୍ରାମରେ ଭିକ୍ଷାମାଗି ଦୁର୍ଦିନରେ ଦିନ କାଟୁଛନ୍ତି।

ସଭ୍ୟ ସମାଜରେ ରହି ମାଓ ସଙ୍ଗଠନର ନେତୃତ୍ୱ ନେଉଥିବା ଲିଙ୍ଗରାଜ ଆଜାଦ ପୁରୁଷ ମାଓ କ୍ୟାଡ଼ର ମାନଙ୍କୁ ଏହି ସବୁ କାର୍ଯ୍ୟରେ ପ୍ରଶୟ ଦେଉଥିବାର ଅଭିଯୋଗ ହେଉଥିବା ବେଳେ ନିୟମଗିରି ନେତା ଲଦ ଶିକ୍କା , ଡ୍ରିଞ୍ଜୁ କୁର୍ସିକା, ସୋମ୍ବାରୁ ଶିକ୍କା ଆଦି ବ୍ୟକ୍ତିଙ୍କର ମାଓବାଦୀ ମାନଙ୍କ ସହ କୌଣସି ସମ୍ପର୍କ ନାହିଁ କୁହା ଯାଉଥିବା ବେଳେ ନିୟମଗିରି ଅଞ୍ଚଳର ଡଙ୍ଗରିଆ ନାବାଳିକା ମାନେ ମାଓ ସଙ୍ଗଠନରେ ସାମିଲ ହେବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ? ଡଙ୍ଗରିଆ ଜନଜାତିକୁ ରକ୍ଷାକରିବା ପାଇଁ ଏହି ଧ୍ବଂସକାରୀ ମାଓବାଦୀ ଓ ଧଳାହାତୀଙ୍କୁ ନିଜ ଅଞ୍ଚଳରେ ପ୍ରବେଶ ପାଇଁ ବାରଣ କରନ୍ତୁ ବୋଲି ସଚେତନ ଡଙ୍ଗରିଆ ଯୁବ ପରିଷଦ,ନିୟମଗିରି ସୁରକ୍ଷା ସମିତି ଦ୍ୱାରା ଜାରି ହୋଇଥିବା ନେଇ ଉକ୍ତ ପୋଷ୍ଟରରେ ଉଲ୍ଲେଖ ରହିଛି। ପ୍ରକୃତରେ ଏହି ପୋଷ୍ଟର କିଏ ଜାରି କରିଛି ଏବଂ ପୋଷ୍ଟରରେ ଉଲ୍ଲେଖ ଥିବା ଘଟଣାରେ କେତେ ସତ୍ୟତା ଅଛି ତାହା ଏବେ ନିୟମଗିରି ବାସୀଙ୍କ ପାଇଁ ବଡ଼ ପ୍ରଶ୍ନବାଚୀ ସୃଷ୍ଟି କରିଛି।