ଲଦାଖ : ନଦୀରେ ଖସିପଡ଼ିଲା ସେନା ଗାଡ଼ି, ୭ ଯବାନ ମୃତ

ଲେହ : ଲଦାଖରେ ଆଜି ଏକ ଦୁଃଖଦ ଘଟଣା ଘଟିଛି । ଲଦାଖର ଟୁରଟୁକ ସେକ୍ଟରରେ ସେନାର ଏକ ଗାଡ଼ି ଦୁର୍ଘଟଣାଗ୍ରସ୍ତ ହେବାରୁ ୭ ଜଣ ଯବାନ ମୃତ୍ୟୁବରଣ କରିଛନ୍ତି । ଉକ୍ତ ଗାଡ଼ିରେ ଥିବା ଆଉ କେତେକ ଯବାନ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ଗୁରୁତରମାନଙ୍କ ଚିକିତ୍ସା ପାଇଁ ସେମାନଙ୍କୁ ବିମାନ ଯୋଗେ ଓ୍ବେଷ୍ଟର୍ଣ୍ଣ କମାଣ୍ଡ ହସପିଟାଲ ଅଣାଯିବାକୁ ପଦକ୍ଷେପ ନିଆଯାଉଛି ବୋଲି ସେନା ସୁତ୍ରରୁ ପ୍ରକାଶ ।

ମିଳିଥିବା ସୂଚନା ଅନୁସାରେ ୨୬ ଜଣ ଯବାନ ଥିବା ସେନାର ଏକ ଗାଡ଼ି ଟୁରଟୁକ ସେକ୍ଟରର ପର୍ଟାପୁର ବେସକ୍ୟାମ୍ପରୁ ହନିଫ ସବ-ସେକ୍ଟରସ୍ଥିତ ଏକ ଫରଓ୍ବାର୍ଡ ଅଂଚଳକୁ ଯାଉଥିଲା । ବାଟରେ ଗାଡ଼ିଟି ସ୍ୟୋକ ନଦୀରେ ଖସିପଡ଼ିଥିଲା । ଏହା ପରେ ତୁରନ୍ତ ସେମାନଙ୍କୁ ପର୍ଟାପୁରସ୍ଥିତି ଫିଲଡ ହସପିଟାଲକୁ ନିଆଯାଇଥିଲା । ସେଠାରେ ଡାକ୍ତରମାନେ ୭ ଜଣ ଯବାନଙ୍କୁ ମୃତ ଘୋଷଣା କରିଥିଲେ ।  ଅନ୍ୟ ଆହତମାନଙ୍କ ମଧ୍ୟରୁ କେତେକଙ୍କ ଅବସ୍ଥା ଗୁରୁତର ଥିବା ଜଣାଯାଇଛି । ସେମାନଙ୍କୁ ସର୍ବୋତ୍ତମ ଚିକିତ୍ସା ଯୋଗାଇବାକୁ ଓ୍ବେଷ୍ଟର୍ଣ୍ଣ କମାଣ୍ଡ ହସପିଟାଲ ଅଣାଯିବାକୁ ପଦକ୍ଷେପ ନିଆଯାଉଛି ବୋଲି ସେନା ପକ୍ଷରୁ କୁହାଯାଇଛି ।