ଯୋଡାରେ ବିର୍ସା ମୁଣ୍ଡାଙ୍କ ୧୪୭ତମ ଜନ୍ମଜୟନ୍ତୀ ପାଳିତ

ଯୋଡା,୧୫ା୧୧: ପ୍ରଥମ ଥର ପାଇଁ ଯୋଡା ଠାରେ ବୀର ବିର୍ସା ମୁଣ୍ଡାଙ୍କ ୧୪୭ତମ ଜନ୍ମ ଜୟନ୍ତୀ ମହାସମାରୋହରେ ମଙ୍ଗଳବାର ଦିନ ପାଳିତ ହୋଇଯାଇଛି । ଟାଟା ଷ୍ଟିଲ କେନ୍ଦ୍ରୀୟ ଖେଳ ପଡିଆ ଠାରେ ଆୟୋଜିତ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ପଦ୍ମଶ୍ରୀ ଡଃ ତୁଳସୀ ମୁଣ୍ଡା ଯୋଗଦେଇଥିବା ବେଳେ ସମ୍ମାନୀତ ଅତିଥି ଭାବେ କେନ୍ଦୁଝର ସଦର ବିଧାୟକ ତଥା ପିଏସି କମିଟି ଅଧ୍ୟକ୍ଷ ମୋହନ  ଚରଣ ମାଝୀ, ଯୋଡା ପୌରାଧ୍ୟକ୍ଷ ଡା. ଜଗଦିଶ ପ୍ରସାଦ ସାହୁ, ଉପାଧ୍ୟକ୍ଷା ସନ୍ଧ୍ୟା ପାତ୍ର, ବିଶିଷ୍ଟ ଶିଳ୍ପପତି ବିନୋଦ ପଟ୍ଟନାୟକ ଯୋଗଦେଇଥିଲେ । ସେହିପରି ବକ୍ତା ଭାବେ ଝାଡଖଣ୍ଡର ଆଦିବାସୀ ଆଇଆଇଏସିଏସ୍ଏସ୍ର ସୁରେଶ ହେସା, ବଡବିଲ ଆଇନଜୀବି ରମେଶ ଲାଗୁରୀ, କେନ୍ଦୁଝର ମୂଳବାସୀ ମହିଳା ସଂଘର ବାସୁମତୀ ଭାରଜା ଏବଂ ସାମ୍ବାଦିକ ଦୀପକ ଶତପଥି ପ୍ରମୁଖ ଉପସ୍ଥିତ ରହି ସେମାନଙ୍କର ବକ୍ତବ୍ୟ ଉପସ୍ଥାପନ କରିଥିଲେ । ଆଦିବାସୀ ସମ୍ପ୍ରଦାୟରଙ୍କ ମଧ୍ୟରେ ଅଶିକ୍ଷା କାରଣକୁ ବାଲ୍ୟ ବିବାହ, ଗୁଣିଗାରେଣି ଉପରେ ବିଶ୍ୱାସ, ନିଶା ସେବନ କରି ପରସ୍ପର ମଧ୍ୟରେ ବାଦବିବାଦ ଯୋଗୁଁ ଏହି ସମ୍ପ୍ରଦାୟର ବିକାଶରେ ଏହା ବାଧକ ସୃଷ୍ଟି କରିଛି ବୋଲି ଅତଥିମାନେ ମତବ୍ୟକ୍ତ କରିଥିଲେ । ତେଣୁ ଆଦିବାସୀମାନେ ଶିକ୍ଷା ଲାଭ କରିବା ଦ୍ୱାରା ଏହି ସବୁ କୁସଂସ୍କାରକୁ ଏଡାଇଦିଆଯାଇପାରିଲେ ଏକ ସୁସ୍ଥ ଆଦିବାସୀ ସମାଜ ଗଠନ ହେବା ସହ ସେମାନଙ୍କର ଆର୍ଥôକ, ମାନଶୀକ ବିକାଶ ଘଟିପାରିବ ବୋଲି ଅତିଥିମାନେ ମତବ୍ୟକ୍ତ କରିଥିଲେ । ବୀର ବିର୍ସା ମୁଣ୍ଡା ୧୮୭୫ରେ ଝାଡଖଣ୍ଡ ରାଜ୍ୟର ଖୁଣ୍ଟି ଜିଲାସ୍ଥିତ ଉଲିହାତୁ ଗ୍ରାମରେ ଜନ୍ମଗ୍ରହଣ     କରିଥିବା ବେଳେ ଇଂରେଜ ସମୟରେ ରାଜା ମାନଙ୍କ ମାଧ୍ୟମରେ ଅତ୍ୟଧିକ ଲଗାନ ଅସୁଲକୁ ସେ ସର୍ବ ପ୍ରଥମେ ବିରୋଧ କରିଥିଲେ ଏବଂ ଏହା ସହିତ ଜଙ୍ଗଲ କାଟି ଚାଷ ଜମିରେ ରୂପାନ୍ତରିତ କରିବାକୁ ସେ ସର୍ବଦା ବିରୋଧ କରିଆସୁଥିଲେ । ଫଳରେ ଇଂରେଜ ସରକାର ତାଙ୍କ ଉପରେ ତୀକ୍ଷ୍ନ ଦୃଷ୍ଟି ରଖିଥିଲା ଏବଂ ତାଙ୍କୁୁ ବିଭିନ୍ନ ସମୟରେ ନିର୍ଯ୍ୟାତନା ଦିଆଯାଉଥିଲା ।

ଫଳରେ ସେ ମାତ୍ର ୨୫ ବର୍ଷ ବୟସରେ ପ୍ରାଣ ତ୍ୟାଗ କରିଥିଲେ । ତାଙ୍କର ଏହି କାର୍ଯ୍ୟାବଳି ଆଦିବାସୀମାନଙ୍କ ମଧ୍ୟରେ ନିଜର ହକ୍ ଦାବି କରିବାକୁ ସାହାସ ଜୁଟାଇପାରିଥିଲା । ତାଙ୍କର ଏହି ମହାନ କାର୍ଯ୍ୟାବଳୀର ଅତିଥିମାନେ ମଞ୍ଚ ଉପରେ ସ୍ମୃତି ଚାରଣ କରିଥିଲେ । ସକାଳ ୯ଟା ସମୟରେ ଯୋଡାସ୍ଥିତ ଆଦିବାସୀ ହୋ ସମାଜ ପକ୍ଷରୁ ବୀର ବିର୍ସା ମୁଣ୍ଡାଙ୍କ ଏକ ପ୍ରତିମୂର୍ତ୍ତି ସ୍ଥାପନ ନିମନ୍ତେ କଳାପାହଡ ଛକ ଠାରେ ଭୂମି ପୂଜନ କାର୍ଯ୍ୟକ୍ରମ କରାଯାଇଥିଲା । ପରେ ପାରମ୍ପରିକ ନୃତ୍ୟ, ବାଦ୍ୟ ସହିତ ଆଦିବାସୀ ସମ୍ପ୍ରଦାୟର ଲୋକେ ଏକ ଶୋଭାଯାତ୍ରାରେ ଯୋଡା ନଗର ପରିକ୍ରମା କରିବା ପରେ ସଭା ସ୍ଥଳରେ ପହଞ୍ଚି ସେଠାରେ ସଭା କାର୍ଯ୍ୟ ଆରମ୍ଭ ହୋଇଥିଲା । ଏହି କାର୍ଯ୍ୟକ୍ରମରେ ଯୋଡା ବ୍ଲକର ୧୯ଟି ପଞ୍ଚାୟତ ଓ ପୌରପାଳିକାର ୧୪ଟି ୱାର୍ଡର ୨ହଜାରରୁ ଉର୍ଦ୍ଧ୍ୱ ଆଦିବାସୀ ସମ୍ପ୍ରଦାୟର ମହିଳା, ପୁରୁଷ ଯୋଗଦେଇ କାର୍ଯ୍ୟକ୍ରମଟିକୁ ସଫଳ କରିଥିଲେ । ଏହି କାର୍ଯ୍ୟକ୍ରମରେ ଆଦିବାସୀ ସମ୍ପ୍ରଦାୟ ପକ୍ଷରୁ ଆଦିବାସୀମାନଙ୍କର ପାରମ୍ପରିକ ବାଦ୍ୟ ମାଦଳର ତାଳେ ତାଳେ ଚିତାକର୍ଷକ ଆଦିବାସୀ ନୃତ୍ୟ ପ୍ରଦର୍ଶନ କରାଯାଇଥିଲା । ଏହି କାର୍ଯ୍ୟକ୍ରମଟିକୁ ଆଦିବାସୀ ହୋ ସମାଜର ସଭାପତି ସଞ୍ଜିବ କୁମାର ମୁଣ୍ଡା (ଛୋଟରାୟ), ଉପସଭାପତି ରାଜେନ ମୁଣ୍ଡା, ସମ୍ପାଦକ ଜେନା ଗାଗରାଇ, ଯୁଗ୍ମ ସମ୍ପାଦକ ଗୋପାଲ ହେମ୍ବ୍ରମ, ମିଥୁନ ମୁଣ୍ଡା, କୁଲଟୁ ମୁଣ୍ଡା, ଦିନେଶ ମୁଣ୍ଡା ପ୍ରମୁଖ ପରିଚାଳନା କରିଥିଲେ ।