ଦୁର୍ଦ୍ଦିନରେ ଗଣମାଧ୍ୟମ କର୍ମଚାରୀ

ଭୁବନେଶ୍ୱର, (ଅଭିମନ୍ୟୁ ମହାପାତ୍ର): କରୋନା ସଂକ୍ରମଣକୁ ପ୍ରତିହତ କରିବା ପାଇଁ ସାରା ଦେଶରେ ଚାଲିଥିଲା ତାଲା ବନ୍ଦ । ଏବେ ସାମୟିକ ଲକ୍‌ଡାଉନ୍ ଓ ଶଟ୍‌ଡାଉନ ମଧ୍ୟ ଚାଲିଛି । ଏହାର ସିଧାସଳଖ ପ୍ରଭାବ ଦେଖିବାକୁ ମିଳିଛି ଘରୋଇ ଅନୁଷ୍ଠାନ ଉପରେ । ଚାକିରିରେ ଛଟେଇ ଚାଲିଥିବା ବେଳେ ମାସିକ ଦରମାରେ ଟଙ୍କା କଟିବା ପ୍ରକ୍ରିୟା ଆରମ୍ଭ ହୋଇଯାଇଛି । ଆଉ ଶ୍ରମିକ ଅଭାବରୁ କ୍ଷୁଦ୍ର ଓ ମଧ୍ୟମ ଧରଣର ଉଦ୍ୟୋଗ ଉତ୍ପାଦନକ୍ଷମ ହୋଇପାରୁନାହାନ୍ତି । ବିଶେଷ ଭାବେ ଗଣମାଧ୍ୟମ କର୍ମଚାରୀଙ୍କ ଉପରେ ବେଶୀ ପ୍ରଭାବ ପଡ଼ିଛି । କିଛି ମାଲିକ ସିଧା ସଳଖ ୫୦ ଭାଗରୁ ଅଧିକ କର୍ମଚାରୀଙ୍କୁ ଚାକ୍‌ିରିରୁ ବାହାର କରିଦେଇଛନ୍ତି । କାହାର ଜୁ ନାହିଁ ପ୍ରତିବାଦ କରିବାକୁ । କାରଣ ଏହି ସବୁ ସଂସ୍ଥାମାନଙ୍କରେ ଯେଉଁ କର୍ମଚାରୀଙ୍କ ସାହସ ନାହିଁ ମାଲିକଙ୍କ ଅନ୍ୟାୟ ବିରୋଧରେ ସ୍ୱରଉତ୍ତୋଳନ କରିବା ପାଇଁ । ସରକାର ମଧ୍ୟ ମାଲିକମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ଅସହାୟ । ଓଡ଼ିଶାରେ ରହିଥିବା ସଂଘର ମୁଖିଆମାନେ ବିଭିନ୍ନ କେଳେଙ୍କାରୀରେ ଲିପ୍ତ ଥିବା ଅଭିଯୋଗ ହୋଇଛି । ତେଣୁ ମାଲିକ ଓ ସରକାରଙ୍କ ପାଖରେ କର୍ମଚାରୀଙ୍କ ନ୍ୟାୟ ପାଇଁ ଲଢ଼େଇ କରିବାରେ ସେମାନେ ବିଫଳ ।
ଯେଉଁ କର୍ମଚାରୀମାନେ ଚାକିରିରେ ଅଛନ୍ତି, ସେମାନଙ୍କ ଦରମା ୧୦ରୁ ୩୦ ପ୍ରତିଶତ ପର୍ଯ୍ୟନ୍ତ ଦରମା କଟୁଛି । ମାଲିକମାନେ ସିଧା ସଳଖ କହୁଛନ୍ତି, ଏଇ ଦରମାରେ କାମ କରିବ ତ କର ନହେଲେ ଚାକିରି ଛାଡ଼ । ଓଃ କି ଲଜ୍ୟା । ଯେଉଁ କର୍ମଚାରୀଙ୍କ ଛଟେଇ ହୋଇଛନ୍ତି, ସେମାନଙ୍କ କାର୍ଯ୍ୟ ମଧ୍ୟ କାର୍ଯ୍ୟକରୁଥିବା କର୍ମଚାରୀମାନେ କରୁଛନ୍ତି । ଅର୍ଥାତ କାର୍ଯ୍ୟ ଦୁଇଗୁଣ ବଢ଼ିଥିବା ବେଳେ ଦରମା ଅଧା । ଠିକ୍ ଏହି ସମୟରେ ରାଜ୍ୟ ସରକାର କରୋନା ସଂକ୍ରମଣକୁ ଆଖି ଆଗରେ ରଖି ସାମ୍ବାଦିକମାନଙ୍କୁ ଲୋକସେବା ସଦନକୁ ସାମୟିକ ବନ୍ଦ କରିଛନ୍ତି । ଏହା ଆମ ସାମ୍ବାଦିକ ଭାଇମାନଙ୍କୁ ଭାରି ବାଧିଛି । ପ୍ରତ୍ୟେକ ସଂଘର ମୁଣ୍ଡିଆଳମାନେ ଏକାଠି ହୋଇ ଲଢ଼ିବେ ସରକାରଙ୍କ ବିରୋଧରେ । ସେଇଥି ପାଇଁ ତ ଗୋଟାଏ ମଟନ୍ ଓ ଚିଙ୍ଗୁଡ଼ି ଝୋଳ ଆୟୋଜନ ହୋଇଥିଲା । କେମିତି ଲୋକସେବା ସଦନ ଭିତରକୁ ପ୍ରବେଶ କରି ନିଜର ପତିଆରା ଜାହିର କରିବେ । କିନ୍ତୁ ଯେଉଁ କର୍ମଚାରୀମାନେ ଛଟେଇ ହୋଇଛନ୍ତି, ଯେଉଁମାନେ ଅଧା ଦରମାରେ କାମ କରୁଛନ୍ତି ସେମାନଙ୍କ କଥା ଟିକେ କେହି ଚିନ୍ତା କଲେନି । ଅନେକ ସଂଘର ନେତାମାନେ ନିଜ ପତିଆରା ଓ ନିଜସ୍ୱ ବିଭିନ୍ନ ବେପାର ପାଇଁ ସଂଘର ପଦ ପଦବୀକୁ ଢାଲ କରିଛନ୍ତି । ଯାହା ସରକାର ଭଲଭାବରେ ଜାଣିଛନ୍ତି । ଆଉ କିଛି ଗଣମାଧ୍ୟମର ମାଲିକମାନେ ଏହାର ଫାଇଦା ଦେବାକୁ ମଧ୍ୟ ପଛାଉ ନାହାଁନ୍ତି । ଗଣମାଧ୍ୟମ କର୍ମଚାରୀମାନେ ଆଗକୁ କିପରି ବଞ୍ôଚବେ ତାହାନେଇ ଚିନ୍ତାରେ ରହିଥିବା ବେଳେ ନେତାମାନେ ଚିଙ୍ଗୁଡ଼ି ଓ ମଟନ ଖାଇ ସମାଧାନର ବାଟ ଖୋଜୁଛନ୍ତି । କର୍ମଚାରୀମାନେଙ୍କ ଘରେ ଖାଇବାକୁ ନଥିବା ବେଳେ ନେତାମାନେ ପତିଆରା ପାଇଁ ଉଦ୍ୟମ ଜାରି ରଖିଛନ୍ତି । କାରଣ ନେତାମାନଙ୍କ ବିଭିନ୍ନ ଅନ୍ୟାନ୍ୟ ବହୁ କଳାଧଳା ବେପାର ଥିବା ସାଧାରଣରେ ଚର୍ଚ୍ଚା ହେଉଛି ।
ମୋର ଦରକାର ନାହିଁ ଏଭଳି ସଂଘର ସଦସ୍ୟ ହେବା । ଯେଉଁ ସଂଘ ଗଣମାଧ୍ୟମ କର୍ମଚାରୀଙ୍କ ଅପେକ୍ଷା ନିଜ ସ୍ୱାର୍ଥକୁ ଅଧିକ ଗୁରୁତ୍ୱ ଦେବ । ମୋର ଦରକାର ନାହିଁ ଏଭଳି ନେତା ଯିଏ ସଦସ୍ୟ ସ୍ୱାର୍ଥ ଅପେକ୍ଷା ନିଜ ବେପାର କଥା ଚିନ୍ତା କରିବ । ଓଡ଼ିଶାରେ ଏକ ନୂତନ ସଂଘର ଆବଶ୍ୟକତା ରହିଛି ଯିଏ ଗଣମାଧ୍ୟମ କର୍ମଚାରୀଙ୍କ ସହ ରହିବ ।
ସେମାନଙ୍କ ସ୍ୱାର୍ଥ ପାଇଁ ଲଢ଼ିବ । ସେମାନଙ୍କୁ ସୁଖଦୁଃଖରେ ନିଜକୁ ସାମିଲ କରିବ । କେବଳ ସଂଘର ମିଟିଂଦିନ ଭୁରି ଭୋଜନ ଦେଇ ଅନ୍ୟଦିନ ପେଟକଥା ଚିନ୍ତା କରୁନଥିବା ସଂଘ ଆବଶ୍ୟକ ନାହିଁ । ଏସବୁ ପ୍ରତି ସଦସ୍ୟମାନେ ସଚେତନ ହେବା ଆବଶ୍ୟକ ।
କରୋନା ସଂକ୍ରମଣର ପ୍ରଭାବ ପଡିଛି ଗଣମାଧ୍ୟମ କର୍ମଚାରୀଙ୍କ ଜୀବନ ଓ ଜୀବିକା ଉପରେ । ପ୍ରତିଦିନ ସଂକ୍ରମିତଙ୍କ ସଂଖ୍ୟା ବଢୁଥିବା ବେଳେ ଲଢେଇରେ ଏବେ ବଳି ପଡୁଛନ୍ତି ଗଣମାଧ୍ୟମ କର୍ମଚାରୀ । ଅର୍ଥନୀତିଜ୍ଞଙ୍କ ମତରେ ସରକାର ଏହି ସମସ୍ୟାକୁ ଗୁରୁତର ସହ ନେଇ ସମାଧାନର ରାସ୍ତା ବାହାର କରିବା ଦରକାର । ନଚେତ ବେରୋଜଗାରୀ ବଢିବ ।