ଆଜାଦୀ କା ଅମୃତ ମହୋତ୍ସବ ପାଳନ ଅବସରରେ ନାଲକୋ ଦ୍ୱାରା ବଭିନ୍ନ ସରକାରୀ ବିଦ୍ୟାଳୟରେ 300 ସ୍ମାର୍ଟ କ୍ଲାସ୍ରୁମ୍ ଉଦଘାଟିତ
ଭୁବନେଶ୍ୱର, 15.07.2022: ଆଜାଦୀ କା ଅମୃତ ମହୋତ୍ସବ ପାଳନ ଅବସରରେ କେନ୍ଦ୍ର ଖଣି ମନ୍ତ୍ରଣାଳୟ ଅଧୀନସ୍ଥ ନବରତ୍ନ କମ୍ପାନୀ ନାଲକୋ ଦ୍ୱାରା, ମନ୍ତ୍ରଣାଳୟର ଆଇକନିକ୍ ସପ୍ତାହ ଉତ୍ସବ ଅନ୍ତର୍ଗତ, 120 ଟି ସରକାରୀ ବିଦ୍ୟାଳୟରେ 300 ଟି ସ୍ମାର୍ଟ କ୍ଲାସରୁମ୍ ଉଦଘାଟନ କରାଯାଇଅଛି। ହାଇବ୍ରିଡ୍ ମାଧ୍ୟମରେ ଆୟୋଜିତ ଏକ କାର୍ଯ୍ୟକ୍ରମରେ କେନ୍ଦ୍ର ଖଣି ସଚିବ ଶ୍ରୀ ଆଲୋକ ଟଣ୍ଡନ୍, ଆଇଏଏସ୍, ନାଲକୋର ଅଧ୍ୟକ୍ଷ ଶ୍ରୀ ଶ୍ରୀଧର ପାତ୍ରଙ୍କ ଉପସ୍ଥିତିରେ ପ୍ରଥମ ପର୍ଯ୍ୟାୟରେ 91 ଟି ବିଦ୍ୟାଳୟର 240 ଟି ସ୍ମାର୍ଟ୍ କ୍ଲାସରୁମ୍ ଉଦଘାଟନ କରିଛନ୍ତି। ଅବଶିଷ୍ଟ 29 ଟି ବିଦ୍ୟାଳୟରେ 60 ଟି ସ୍ମାର୍ଟ କ୍ଲାସରୁମର ପ୍ରସ୍ତୁତି କାର୍ଯ୍ୟ ଶେଷ ପର୍ଯ୍ୟାୟରେ ଅଛି| ଏହି କାର୍ଯ୍ୟକ୍ରମରେ ମନ୍ତ୍ରଣାଳୟର ବରିଷ୍ଠ ଅଧିକାରୀ, ନାଲକୋର ନିର୍ଦ୍ଦେଶକମଣ୍ଡଳୀ, ସ୍କୁଲଗୁଡ଼ିକର ଛାତ୍ରଛାତ୍ରୀ, ନାଲକୋର ଅନ୍ୟାନ୍ୟ ବରିଷ୍ଠ ଅଧିକାରୀ ଏବଂ କର୍ମଚାରୀ, କୋରାପୁଟ ଏବଂ ଅନୁଗୁଳ ଜିଲ୍ଲା ପ୍ରଶାସନ ଅଧିକାରୀ, ଶିକ୍ଷା ଅଧିକାରୀ, ବିଦ୍ୟାଳୟ କର୍ତ୍ତୃପକ୍ଷ ଏବଂ ଜନ ପ୍ରତିନିଧିମାନେ ଯୋଗ ଦେଇଥିଲେ । ଅନୁଗୁଳସ୍ଥିତ ସରକାରୀ ହାଇସ୍କୁଲ ଏବଂ ସୁନାବେଡ଼ାସ୍ଥିତ ଶ୍ରୀ ଜଗନ୍ନାଥ ବିଦ୍ୟାପୀଠଠାରେ ଉଦଘାଟନୀ ସମାରୋହ ଅନୁଷ୍ଠିତ ହୋଇଥିଲା।
ଅନୁଗୁଳ, ଢେଙ୍କାନାଳ, କୋରାପୁଟ, ନବରଙ୍ଗପୁର ଏବଂ ଖୋର୍ଦ୍ଧା ଜିଲ୍ମାରେ କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ବିଦ୍ୟାଳୟ ଗୁଡ଼ିକର ସ୍ମାର୍ଟକ୍ଲାସରୁମ୍ ଗୁଡ଼ିକୁ ଉଦଘାଟନ କରାଯାଇଛି । ଏହି ପଦକ୍ଷେପ, ଆଧୁନିକ ଶିକ୍ଷା ପଦ୍ଧତି ସହିତ ପ୍ରେଜେଣ୍ଟେସନ୍ ମାଧ୍ୟରେ ଶିକ୍ଷାଦାନ ପ୍ରକ୍ରିୟାକୁ ସୁଦୃଢ଼ କରାଯାଇପାରିବ ଏବଂ ମୁଖ୍ୟତଃ ଆଦିବାସୀ ଅଧ୍ୟୁସିତ ଆକାଂକ୍ଷୀ ଜିଲ୍ଲାଗୁଡ଼ିକରେ ଶିକ୍ଷାର ଗୁଣାତ୍ମକ ମାନରେ ଉନ୍ନତି ଅଣାଯାଇ ପାରିବ। ନାଲକୋର ଏହି ଫ୍ଲାଗସିପ୍ ଶିକ୍ଷା ପ୍ରକଳ୍ପକୁ କେନ୍ଦ୍ର ସରକାର ଅଧିନସ୍ଥ ଇଡିସିଆଇଏଲ୍ (ଇଣ୍ଡିଆ) ଲିମିଟେଡ୍ ଦ୍ୱାରା କାର୍ଯ୍ୟକ୍ଷମ କରାଯାଇଛି। ଏହି ବିଦ୍ୟାଳୟଗୁଡ଼ିକ ଜିଲ୍ଲା ପ୍ରଶାସନର ସହାୟତାରେ ଟିହ୍ନଟ କରାଯାଇ, ସ୍ମାର୍ଟ କ୍ଲାସରୁମର ଉନ୍ନତିକରଣ ପାଇଁ ଏକୀକୃତ କମ୍ପ୍ୟୁଟର ତଥା ପ୍ରୋଜେକ୍ଟର ସହିତ ଆବଶ୍ୟକୀୟ ଉପକରଣ ଯୋଗାଇ ଦିଆଯାଇଛି | ଏହି ପ୍ରୋଜେକ୍ଟ ମାଧ୍ୟମରେ ଶିକ୍ଷକ ଏବଂ ଛାତ୍ରଛାତ୍ରୀମାନଙ୍କ ପାଇଁ ନିରନ୍ତର ପ୍ରତ୍ୟକ୍ଷ ତାଲିମର ମଧ୍ୟ ବ୍ୟବସ୍ଥା କରାଯାଇଛି | ମୋଟ ପ୍ରକଳ୍ପ ଖର୍ଚ୍ଚ ହେଉଛି 7.65 କୋଟି ଟଙ୍କା |
ତୃଣମୂଳ ସ୍ତରରେ ଗୁଣାତ୍ମକ ଶିକ୍ଷାକୁ ପ୍ରୋତ୍ସାହିତ କରିବାରେ ନାଲକୋର ଉଦ୍ୟମକୁ କେନ୍ଦ୍ର ଖଣି ସଚିବ ଶ୍ରୀ ଆଲୋକ ଟଣ୍ଡନ୍, ଆଇଏଏସ୍, ଉଚ୍ଚ ପ୍ରଶଂସା କରି କହିଛନ୍ତି ଯେ, ନାଲକୋର ଏହି ଉଦ୍ୟମ ଭବିଷ୍ୟତର ଦକ୍ଷ ନାଗରିକ ଗଢ଼ିବାରେ ସାହାଯ୍ୟ କରିବ। ଆଜାଦୀ କା ଅମୃତ ମହୋତ୍ସବର ଏକ ଅଂଶ ଭାବରେ ଶୁଭାରମ୍ଭ କରାଯାଇଥିବା ଏହି କାର୍ଯ୍ୟକ୍ରମରେ ସନ୍ତୋଷ ପ୍ରକାଶ କରି ନାଲକୋର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ଶ୍ରୀ ଶ୍ରୀଧର ପାତ୍ର କହିଛନ୍ତି ଯେ ଯୁବବର୍ଗଙ୍କ ଗୁଣାତ୍ମକ ଶିକ୍ଷା ହିଁ ଦେଶର ଭବିଷ୍ୟତ ପାଇଁ ପ୍ରକୃତ ସମ୍ପଦ। ନାଲକୋର ଏହି ଉଦ୍ୟମର ସଫଳ ରୂପାୟନ ପାଇଁ ସମ୍ପୂର୍ଣ୍ଣ ସହଯୋଗ କରିଥିବାରୁ କେନ୍ଦ୍ର ଖଣି ମନ୍ତ୍ରଣାଳୟ ତଥା ଓଡ଼ିଶା ସରକାରଙ୍କ ସମ୍ବନ୍ଧିତ ଜିଲ୍ଲା ପ୍ରଶାସନକୁ ଶ୍ରୀ ପାତ୍ର କୃତଜ୍ଞତା ଜଣାଇଛନ୍ତି।
