ପିଇବା ପାଣି ପାଇଁ ଭୋଟ ବର୍ଜ୍ଜନ ନିଷ୍ପତି : ନଳୀପୁର ଗ୍ରାମ ପଞ୍ଚାୟତ
ବାଲିଚନ୍ଦ୍ରପୁର : ଗ୍ରୀଷ୍ମପ୍ରବାହ ସାଙ୍ଗକୁ ଅସହ୍ୟ ଗୁଳୁଗୁଳି ସହିତ ଉତ୍କଟ ପାନୀୟ ଜଳ ସମସ୍ୟା, ଘରେ ଘରେ କୁଅ ଶୁଖିଗଲାଣି । ଗାଧୋଇବାତ ପରର କଥା ପିଇବା ପାଣି ମୁନ୍ଦେ ମିଳୁନାହିଁ । ଗାଧୋଇବା ପାଇଁ ବିରୂପା ନଦୀକୁ ଏକ କିଲୋମିଟର ଯିବାକୁ ପଡ଼ୁଥିବା ବେଳେ ପିଇବା ପାଣି ପାଇଁ ୪ କିଲୋମିଟର ବାଟ ଯିବାକୁ ପଡ଼ୁଛି । ସାଇକେଲ ଓ ମଟରସାଇକେଲରେ ବ୍ୟାରେଲ ଯୋଗେ ପିଇବା ପାଣି ଭର୍ତ୍ତି କରି ଆଣି ଲୋକେ ପିଇ ଯିବନ ବଞ୍ଚାଉଛନ୍ତି । ପଂଚାୟତ ପକ୍ଷରୁ ଟ୍ୟାଙ୍କର ଯୋଗେ ନାମକୁ ମାତ୍ର ପାଣି ବଣ୍ଟାଯାଉଛି, ଯାହା ପିଇବା ଉପଯୋଗି ନୁହେଁ । ଏପରିଅବସ୍ଥା ଦୀର୍ଘବର୍ଷ ହେବ ଲାଗିରହିଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ । ଏଥିପାଇଁ ଆଜି ବଡ଼ଚଣା ବ୍ଲକ ଅନ୍ତର୍ଗତ ନଳୀପୁର ଗ୍ରାମ ପଞ୍ଚାୟତର ଜନସାଧାରଣ ଚରମ ପଦକ୍ଷେପ ନେଇ ଚଳିତ ସାଧାରଣ ନିର୍ବାଚନରେ ଭୋଟ ବର୍ଜ୍ଜନ ପାଇଁ ନିଷ୍ପତି ନେଇଛନ୍ତି । ଆଜି ଗୁରୁବାର ପଂଚାୟତର ୮ ଗୋଟି ୱାର୍ଡ଼ର ସଂଖ୍ୟାଲଘୁ ସମ୍ପ୍ରଦାୟର ଶତାଧିକ ଜନସାଧାରଣ ଏକାଠି ହୋଇ ପ୍ରତିବାଦ ସ୍ୱରୂପ ଗଣମାଧ୍ୟମ ସମ୍ମୁଖରେ ପ୍ରତିକ୍ରିୟା ରଖିଛନ୍ତି । ଜନସାଧାରଣଙ୍କ ପକ୍ଷରୁ ଆଗତ ଅଭିଯୋଗ ମୁତାବକ ନଳୀପୁର ପଞ୍ଚାୟତର ୫୩ ନଂ ଜାତୀୟ ରାଜପଥ ଠାରୁ ପଟ୍ଟାମୁଣ୍ଡାଇ କେନାଲ ଚାରିନଙ୍ଗଳର ମଧ୍ୟ ଭାଗରେ ବସବାସ କରୁଥିବା ନଳୀପୁର ପଞ୍ଚାୟତ ଓ ଚାରିନଙ୍ଗଳ ପଞ୍ଚାୟତର ହଜାର ହଜାର ଜନସାଧାରଣ ପାନୀୟ ଜଳ ସମସ୍ୟା ସାଙ୍ଗକୁ ଡ୍ରେନେଜ୍ ସମସ୍ୟାର ସମ୍ମୁଖିନ ହୋଇଆସୁଛନ୍ତି । ଏଥିପାଇଁ ସେମାନେ ରାଜନେତାଙ୍କ ଠାରୁ ଆରମ୍ଭ କରି ପ୍ରଶାସନ ପର୍ଯ୍ୟନ୍ତ ବାରମ୍ବାର ଅଭିଯୋଗ କରିଥିଲେ ମଧ୍ୟ କୌଣସି ସ୍ଥାୟୀ ପ୍ରତିକାର ହୋଇପାରିନାହିଁ । ପଂଚାୟତର ନସିମୁଦ୍ଦିନ ଖାଁ (କାଲୋ)ଙ୍କ ପ୍ରତ୍ୟେକ୍ଷ ତତ୍ୱାବଧାନରେ ସେକ୍ ନୁରୁଜ ଜମା, ଜାହିର ଖାଁ, ସବନମ ପରୱିନ, ଆଲିମ ଖାଁ, ସେକ୍ ଅବୁତାହେର, ସେକ୍ ଅୟାସୁଦ୍ଦିନ୍, ସେକ୍ ଅବଦୁଲ ରନକ୍, ସେକ୍ ମଞ୍ଜୁର ଅଲ୍ଲି, ସରାଜୁଦ୍ଦିନ୍ ଖାଁ, ଆଲେମା ଖାତୁନ୍ ପ୍ରମୁଖଙ୍କ ସମେତ ଶତାଧିକ ଗ୍ରାମବାସୀ ଅଭିଯୋଗ ଆଣି ଏହାର ସ୍ଥାୟୀ ସମାଧାନ ପାଇଁ ଦାବି କରିବା ନିମନ୍ତେ ପ୍ରଶାସନ ଦୃଷ୍ଟି ଆକର୍ଷଣ କରିଛନ୍ତି । ପ୍ରଶାସନ ପକ୍ଷରୁ ଯଦି ସମସ୍ୟା ସମାଧାନର ପ୍ରତିଶୃତି ନମିଳେ ତେବେ ଚଳିତ ସାଧାରଣ ନିର୍ବାଚନରେ ଭୋଟ ବର୍ଜ୍ଜନ କରିବା ସାଙ୍ଗକୁ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ଚେତାବନୀ ଦେଇଛନ୍ତି । ଘଟଣା ନେଇ ବଡ଼ଚଣା ବିଡ଼ିଓ ରବୀନ୍ଦ୍ରନାଥ ପ୍ରଧାନଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇପାରିନାହିଁ ।
