ଭୋକେସ୍ନାଲ୍ ଟ୍ରେନର ମହାସଂଘର ଗଣଶିକ୍ଷା ମନ୍ତ୍ରୀଙ୍କ ସହ ଆଲୋଚନା
ଭୁବନେଶ୍ୱର, ତା ୨୧ା୬ : ଅଲ ଓଡ଼ିଶା ଭୋକେସ୍ନାଲ୍ ଟ୍ରେନର ମହାସଂଘ ତରଫରୁ ସେମାନଙ୍କର ନିଯୁକ୍ତି ସମ୍ବନ୍ଧୀୟ ସମସ୍ୟା ଓ ଦୀର୍ଘଦିନର ତିନି ଦଫା ସମ୍ବଳିତ ଦାବି ନେଇ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ସହିତ ସାକ୍ଷାତ ଆଲୋଚନା କରିଥିଲେ । ସଂଘର ରାଜ୍ୟ ସଭାପତି ସୁନୀଲ୍ ଦେବତା ଓ ସମ୍ପାଦକ ସେକ ବେଲାଲ୍ ଉଦ୍ଦିନ୍ଙ୍କ ସହ ୩୦ ଗୋଟି ଜିଲ୍ଲାର ସଂଘର କର୍ମକର୍ତ୍ତମାନେ ମାନ୍ୟବର ମନ୍ତ୍ରୀ ଶ୍ରୀ ଗଣ୍ଡଙ୍କ ସହିତ ରାଜ୍ୟ ଅତିଥି ଭବନରେ ଆଲୋଚନାରେ ଭାଗ ନେଇଥିଲେ । ସଂଘ ତରଫରୁ ନୂତନ କରି ଦାୟିତ୍ୱ ନେଇଥିବା ମାନ୍ୟବର ମନ୍ତ୍ରୀଙ୍କୁ ଫୁଲତୋଡ଼ା ଦେଇ ଶୁଭେଚ୍ଛା ଓ ଅଭିନନ୍ଦନ ଜଣାଇବା ସହିତ ସଂଘର ବହୁ ପୁରୁଣା ଦାବି ଓ ସମସ୍ୟାଗୁଡ଼ିକୁ ମାନ୍ୟବର ମନ୍ତ୍ରୀଙ୍କ ପାଖରେ ଉପସ୍ଥାପନା କରିଥିଲେ । ମୁଖ୍ୟତଃ ୩ ଦଫା ଦାବି ଗୁଡ଼ିକ (୧) ସମାନ କାମକୁ ସମାନ ଦରମା (୨) ସରକାରଙ୍କ ଅଧିନରେ ଭୋକେସ୍ନାଲ୍ ଟ୍ରେନର ନିଯୁକ୍ତି ଏବଂ (୩) ଛଟେଇ ହୋଇଥିବା କର୍ମଚାରୀଙ୍କୁ ପୁନଃ ନିଯୁକ୍ତି । ଏହାରି ଉପରେ ବିଶେଷକରି ଆଲୋଚନା ହୋଇଥିଲା ଏବଂ ମାନ୍ୟବର ମନ୍ତ୍ରୀ ଏ ସମସ୍ତ ବିଷୟରେ ପୁର୍ନବାର ସଂଘର କର୍ମକର୍ତ୍ତାଙ୍କୁ ଡାକି ସରକାରଙ୍କ ସହିତ ମିଶି ଆଲୋଚନା କରିବେ ବୋଲି ପ୍ରତିଶ୍ରୁତି ଦେଇଛନ୍ତି । ଏଠାରେ ଉଲ୍ଲେଖନୀୟଯେ, ରାଜ୍ୟରେ କାର୍ଯ୍ୟରତ ୨୧୨୨ଜଣ ଭୋକେସ୍ନାଲ୍ ଟ୍ରେନରମାନେ ବିଭିନ୍ନ ଆଉଟ୍ସୋର୍ସିଂ କମ୍ପାନୀମାନଙ୍କ ଦ୍ୱାରା ନିଯୁକ୍ତି ପାଇଛନ୍ତି । ଏହି କମ୍ପାନୀମାନେ ମନଇଛା ନିଯୁକ୍ତି, ମନଇଛା ଛଟେଇ ଏବଂ ଏପରିକି କୌଣସି ଅଭିଜ୍ଞତା ନଥିବା ଲୋକଙ୍କୁ ନିଯୁକ୍ତି ଦେଇ ଭୋକେସ୍ନାଲ୍ ପାଠ୍ୟକ୍ରମରେ ଘୋର ବିଭ୍ରାଟ୍ ସୃଷ୍ଟି କରିଆସୁଛନ୍ତି । ଭୋକେସ୍ନାଲ୍ ଟ୍ରେନର ମହାସଂଘ ଦ୍ୱାରା ଏ ସମସ୍ତ ବିଷୟରେ ପାଟି ଫିଟାଇଲେ କମ୍ପାନୀମାନେ ମନଇଛା ଛଟେଇ, ଦରମା କାଟିବାର ଧମକ ଦେଇ ଚୁପ୍ କରାଇ ଦେଉଛନ୍ତି । ଏପରିକି କୌଣସି ଟ୍ରେନର ର ମୃତ୍ୟୁ ହେଲେ ମଧ୍ୟ ସେମାନଙ୍କ ପରିବାରକୁ କୌଣସି ଆର୍ଥିକ ସହାୟତା କମ୍ପାନୀମାନଙ୍କ ତରଫରୁ ଦିଆଯାଉନାହିଁ କି ସେମାନଙ୍କ ପରିବାରରୁ କାହାକୁ ନିଯୁକ୍ତି ଦିଆଯାଉନାହିଁ । କମ୍ପାନୀମାନଙ୍କ ଦ୍ୱାରା କୌଣସି ନିର୍ଦ୍ଦିଷ୍ଟ ଚାକିରି ସର୍ତ୍ତାବଳୀ ନଥିବାରୁ ଟ୍ରେନର ମହାସଂଘର କର୍ମକର୍ତ୍ତାମାନେ ବାରମ୍ବାର ବର୍ଷବର୍ଷ ଧରି ହଇରାଣ ହେଉଥିବାରୁ ମାନ୍ୟବର ମନ୍ତ୍ରୀ ଶ୍ରୀ ନିତ୍ୟାନନ୍ଦ ଗଣ୍ଡ ସେମାନଙ୍କ କଥା ବିଚାର କରିବେ ଏବଂ ଭବିଷ୍ୟତକୁ ଏମାନଙ୍କ ପାଇଁ ସୁଫଳ ଆଣିବେ ବୋଲି ପ୍ରତିଶ୍ରୁତି ଦେଇଛନ୍ତି ।
