ବନ୍ଧୁକ ଦେଖାଇ ଭୟଭୀତ କରୁଥିବା ବେଳେ ୩ ଦୁର୍ଦ୍ଧାନ୍ତ ଅପରାଧୀ ପୋଲିସ ହାତରେ
ଖୋର୍ଦ୍ଧା : ୨୦/୧୧(ପ୍ରବାହ ନିଉଜ୍) ତିନି ଦୁର୍ଦ୍ଧାନ୍ତ ଅପରାଧୀ
ଖୋର୍ଦ୍ଧା ପୁଲିସର କବ୍ଜାରେ । ଜିଲ୍ଲାର ବିଭିନ୍ନ ଥାନା ଅଞ୍ଚଳରେ ଏମାନେ ଅପରାଧ ଘଟାଇ କୌଶଳକ୍ରମେ ପୁଲିସକୁ ଚକ୍ମା ଦେଇ ଫେରାର ରହିଥିବା ବେଳେ ଏମାନଙ୍କୁ ପଲ୍ଲା କଣ୍ଟା ଛକରୁ କାବୁ କରିଲା ଖୋର୍ଦ୍ଧା ପୋଲିସର ସ୍ପେଶାଲ ସ୍କ୍ୱାର୍ଡ଼।
ଘଟଣା କ୍ରମେ ଶନିବାର ଦିନ ପ୍ରାୟ ବାରଟା ସମୟରେ ଧରା ପଡିଥିବା ସମସ୍ତ ଅଭିଯୁକ୍ତଙ୍କ ସମେତ ଅନ୍ୟଜଣେ ସହଯୋଗୀ ଆଦର୍ଶଥାନା ଅନ୍ତର୍ଗତ କଣ୍ଟାଛକସ୍ଥିତ ନିମାପଡ଼ା ସୁଇଟ୍ ନାମକ ଏକ ମିଠା ଦୋକାନ ଭିତରେ ଜଳଖିଆ କରୁଥିଲେ। ସ୍ପେଶାଲ ସ୍କାଡ୍ ବିଶ୍ବସ୍ତ ସୂତ୍ରରୁ ଖବର ପାଇ ଏସ୍ପି ରାଜକିଶୋର ଦୋରାଙ୍କ ନିର୍ଦ୍ଦେଶକ୍ରମେ ସେମାନଙ୍କୁ ଧରିବା ଲାଗି ଜାଲ ବିଛାଇଥିଲେ। ତେବେ ଜଳଖିଆ ଖାଇସାରି ସେଠାରୁ ଯିବାକୁ ଉଦ୍ୟମ କରୁଥିବା ବେଳେ ନିକଟରେ ଛପି ରହିଥିବା ପୁଲିସର ସ୍ପେଶାଲ ସ୍କାଡ୍ ସେମାନଙ୍କୁ ମାଡ଼ି ବସିଥିଲେ। ଏହି ସମୟରେ ଅପରାଧୀଙ୍କ ମଧ୍ୟରୁ ଜଣେ ନିଜ ପକେଟ୍ରୁ ମାଉଜର ବାହାର କରି ଫାଇରିଙ୍ଗ କରିବାକୁ ଚେଷ୍ଟା କରୁଥିବାବେଳେ ପୁଲିସ ଏହାକୁ ଅଟକାଇବାରେ ସକ୍ଷମ ହୋଇଥିଲା। ତେବେ ପୁଲିସ ୩ଜଣଙ୍କୁ କାବୁ କରିଥିଲାବେଳେ ଅନ୍ୟଜଣେ ସେଠାରୁ ଫେରାର ହୋଇଯାଇଥିଲା। ଘଟଣାସ୍ଥଳରେ ଏସ୍ପି ଶ୍ରୀ ଦୋରା, ଏସଡିପିଓ ସୁଶିଲ ମିଶ୍ର ଓ ବିଭିନ୍ନ ଥାନାର ଅଧିକାରୀ ମାନେ ଘଟଣାସ୍ଥଳରେ ପହଞ୍ଚି ଅପରାଧୀ ମାନଙ୍କୁ ଥାନାକୁ ନେଇଥିବା ବେଳେ ସେମାନଙ୍କ ଠାରୁ ଗୋଟିଏ ମାଉଜର, ତିନୋଟି ଜୀବନ୍ତ ଗୁଳି ଓ ଦୁଇଟି ବାଇକ ଜବତ କରାଯାଇଛି । ଗିରଫ ଅଭିଯୁକ୍ତ ମାନେ ହେଲେ, ନିରାକାରପୁର ଅଞ୍ଚଳର ଇନ୍ଦ୍ରଜିତ ଦାସ ଓରଫ୍ ବୁଢା(୨୬) ଓ ସୁଶାନ୍ତ ବଳିୟାରସିଂ ଓରଫ୍ ସୁଶା(୨୮) ଏବଂ ସଦରଥାନା ଅନ୍ତର୍ଗତ କାଇପଦର ଗାଁର ଭୁବନେଶ୍ବରରେ ରହୁଥିବା ବିଶ୍ବଜିତ ବାରିକ ଓରଫ ମୁନା (୩୦)।
ସୂଚନାଯୋଗ୍ୟ, ଗିରଫ ମୁନା ଗତ ଜୁଲାଇରେ ବାଘମାରୀ ଥାନା ଅଞ୍ଚଳରେ ବ୍ୟବସାୟୀଙ୍କୁ ଫାଇରିଙ୍ଗ କରି ଲୁଟ୍ ଘଟଣାରେ ସମ୍ପୃକ୍ତ ଥିବା ଜଣାପଡ଼ିଥିବା ବେଳେ ଜିଲ୍ଲାର ବିଭିନ୍ନ ଥାନାରେ ତା’ ନାମରେ ବହୁ ଅପରାଧିକ ମାମଲା ରହିଛି। ସେହିପରି ବୁଢା ନିରାକାରପୁର ଅଞ୍ଚଳରୁ ୨ଲକ୍ଷ ଟଙ୍କାରୁ ଉର୍ଦ୍ଧ୍ବ ଏକ ଡକାୟତି ଅଭିଯୋଗରେ ମୁଖ୍ୟ ଅଭିଯୁକ୍ତ ଥିବାବେଳେ ସେ ମଧ୍ୟ ଫେରାର ରହିଥିଲା। ଅନ୍ୟପକ୍ଷରେ ପୁଲିସ ଏ ସମ୍ପର୍କରେ ମୁହଁ ଖୋଲୁନଥିବା ବେଳେ ତଦନ୍ତରେ ବାଧା ଉପୁଜିବା ଆଶଙ୍କାରେ କୌଣସି ମତାମତ ଦେବାକୁ ମନା କରିଛନ୍ତି ଏସ୍ପି ଶ୍ରୀ ଦୋରା ।
