ଟାଙ୍ଗୀ ପୋଲିସ୍ ର ଚଢାଉ । ୪୦ ଲିଟରରୁ ଉର୍ଦ୍ଧ ଦେଶୀ ମଦ ଜବତ ।

ଟାଙ୍ଗୀ: ୧୯/୮(ପ୍ରବାହ ନିଉଜ) ଦିନକୁ ଦିନ ବଢିବାରେ ଲାଗିଛି ନିଶାଡ଼ିଙ୍କର ଉତ୍ପାତ । ଗାଁ ଛକ ଠାରୁ ଆରମ୍ଭ କରି ବଜାର ରାସ୍ତା ଘାଟ ପର୍ଯ୍ୟନ୍ତ ଏବଂ ଚା ଦୋକାନ ଠାରୁ ଆରମ୍ଭ କରି ପାନ ଦୋକାନ ପର୍ଯ୍ୟନ୍ତ ଯୁଆଡେ ଦେଖିବ ନିଶାଡି ମାନେ ମଦ୍ୟପାନ କରି ଝଗଡା କରି ଉତ୍ପାତ ହେବା ସହିତ ଖରାପ ଭାଷାରେ ଗାଳି ଗୁଲଜ କରୁଛନ୍ତି । ଏହି ସବୁ ଖବରକୁ ନଜର କରି ଚୋରା ମଦ ବ୍ୟବସାୟ କରୁଥିବା ଅଭିଯୁକ୍ତ ଏବଂ ନିଶାଡି ମାନଙ୍କୁ ସାବାଡ କରିବା ଲାଗି ଅଣ୍ଟା ଭିଡିଛି ଟାଙ୍ଗୀ ପୋଲିସ୍ ।

ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ କାଳୁପଡାଘାଟ ନିକଟସ୍ଥ ଜରିପଡା ପଞ୍ଚାୟତର ଦଧିବାମନପୁର ଗ୍ରାମରେ ଟାଙ୍ଗୀ ପୋଲିସ୍ କରିଛି ଚଢାଉ । ୪୦ ଲିଟର ଦେଶୀ ମଦ ଜବତ କରିବା ସହିତ ଜଣେ ଅଭିଯୁକ୍ତକୁ ଗିରଫ କରିଛି ଟାଙ୍ଗୀ ପୋଲିସ୍ । ଗିରଫ ଅଭିଯୁକ୍ତର ନାମ ସୁରେନ୍ଦ୍ର ବେହେରା ଓରଫ କାଙ୍ଗା ଆନୁମାନିକ ବୟସ ୫୫ ବର୍ଷ । ସୂଚନା ମୁତାବକ ଟାଙ୍ଗୀ ଅବକାରୀ ବିଭାଗର ଅବହେଳା ଯୋଗୁଁ କାଳୁପଡାଘାଟ , ସୋରଣ , ଚଣ୍ଡେଶ୍ୱର , କୁହୁଡ଼ି , ଟାଙ୍ଗୀ , ଭୂଷଣ୍ଡପୁର ଆଦି ଅଞ୍ଚଳରେ ନିଶା କାରବାର ବୃଦ୍ଧି ପାଇବା ସହିତ ନିଶାଡିଙ୍କର ଉତ୍ପାତ ବଢିଚାଲିଥିଲା । କିନ୍ତୁ ଟାଙ୍ଗୀ ଅବକାରୀ ବିଭାଗ ନାମକୁ ମାତ୍ର ଲୋକ ଦେଖାଣିଆ ପେଟ୍ରୋଲିଂ କରି ସେତିକିରେ କାମ ସାରିଦେଉଥିଲା । ଫଳରେ ବେକାର ଯୁବକମାନେ ନିଶା ବ୍ୟବସାୟକୁ ରୋଜଗାରର ଭଲ ରାସ୍ତା ଭାବି ବ୍ୟବସାୟ କରି ଚାଲିଥିଲେ ।

କିନ୍ତୁ ଅଳ୍ପ କିଛି ଦିନ ହେବ ଟାଙ୍ଗୀ ଥାନାରେ ନୂତନ ଆଇ ଆଇ ସି ଭାବେ ଯୋଗ ଦେଇଥିବା ଦିଗ୍ ବିଜୟ ବିଶ୍ଵାଳ ଲୋକ ପ୍ରିୟତା ବଢାଇବା ସହିତ ନିଶା ମାଫିଆ ଏବଂ ପଥର ଖଣି ମାଫିଆଙ୍କ ନିଦ ହଜାଇ ଦେଇଛନ୍ତି । କିନ୍ତୁ ପୋଲିସ୍ ଡାଳେ ଡାଳେ ଗଲେ ନିଶା ମାଫିଆ ପତ୍ରେ ପତ୍ରେ ଯାଉଛନ୍ତି । କିଏ ଲ୍ୟାଟିନ୍ ଭିତରେ ରଖି ମଦ କାରବାର କରୁଛିତ କିଏ ଠାକୁରଙ୍କ ଘରେ ରଖି ବିକୁଛି ଏହିପରି ଭାବରେ ନିଶା ମାଫିଆ ମାନେ ମଦ ରଖିବାର ତରିକା ବାଛି ନେଇଛନ୍ତି । କିନ୍ତୁ ଏସବୁ ଭିତରେ ଜରିପଡା ଅଞ୍ଚଳର କାଙ୍ଗା ବେହେରାକୁ ଗିରଫ କରିବା ସହିତ ୪୦ ଲିଟର ଦେଶୀ ମଦ ଜବତ କରି କାଙ୍ଗାକୁ କେଶ୍ ନମ୍ବର ୪୩୫/୨୨ ରେ ମାମଲା ରୁଜୁ କରି କୋର୍ଟ ଚାଲାଣ କରିଛି ଟାଙ୍ଗୀ ଥାନା ପୋଲିସ୍ ।

ଏହି ଖବର କୁ ମିଡିଆ ଗ୍ରୁପ୍ ମାଧ୍ୟମରେ ଜଣାଇଛନ୍ତି ଟାଙ୍ଗୀ ଥାନା IIC ଦିଗ୍ ବିଜୟ ବିଶ୍ଵାଳ । ଏହିଭଳି ଆଖି ଦୃଷ୍ଟିଆ ପଦକ୍ଷେପକୁ ଅଞ୍ଚଳବାସୀ ଟାଙ୍ଗୀ ପୋଲିସ୍ ପ୍ରଶାସନ କୁ ଧନ୍ୟବାଦ ଜଣାଇଛନ୍ତି ଏବଂ ଆଗକୁ ଏହିପରି ଚଢାଉ ଜାରି ରହିବ ବୋଲି ଟାଙ୍ଗୀ ଥାନା ଅଧିକାରୀ ଦିଗ୍ ବିଜୟ ବିଶ୍ଵାଳ ସୂଚନା ଦେଇଛନ୍ତି ।