ଡିସେମ୍ବର ୪ରେ ବର୍ଷର ଦ୍ବିତୀୟ ତଥା ଶେଷ ସୂର୍ଯ୍ୟ ପରାଗ
ଆସନ୍ତା ଡିସେମ୍ବର ମାସ ୪ ତାରିଖରେ ଏ ବର୍ଷର, ଦ୍ବିତୀୟ ତଥା ଶେଷ ସୂର୍ଯ୍ୟ ପରାଗ ସଂଗଠିତ ହେବ । ଗତ ଜୁନ୍ ୧୦ ତାରିଖରେ ଏ ବର୍ଷର ପ୍ରଥମ ସୂର୍ଯ୍ୟ ପରାଗ ସଂଗଠିତ ହୋଇଥିଲା । ତାହା ଏକ ବଳୟ ସୂର୍ଯ୍ୟ ପରାଗ ଥିଲା । ଡିସେମ୍ବର ମାସ ୪ ତାରିଖରେ ପୂର୍ଣ୍ଣସୂର୍ଯ୍ୟ ପରାଗ ଘଟିବ । ପରାଗ ସମୟରେ ପୃଥିବୀ, ଚନ୍ଦ୍ର ଓ ସୂର୍ଯ୍ୟର ଅବସ୍ଥିତି ଅନୁସାରେ ତିନି ପ୍ରକାରର ସୂର୍ଯ୍ୟ ପରାଗ ଘଟିଥାଏ: ଆଂଶିକ, ପୂର୍ଣ୍ଣ ଓ ବଳୟ । ପ୍ରତ୍ୟେକ ପୂର୍ଣ୍ଣ ସୂର୍ଯ୍ୟ ପରାଗ ପୂର୍ବରୁ ଓ ପରେ ଆଂଶିକ ପରାଗ ଦେଖାଯାଏ । କଦବାକ୍ବଚିତ୍ ମିଶ୍ରିତ ଅର୍ଥାତ୍ ଏକା ପରାଗରେ ପୂର୍ଣ୍ଣ ଓ ବଳୟ ପରାଗ ମିଶିକରି ଦେଖାଯାଏ । ଆସନ୍ତା ଡିସେମ୍ବର ୪ ତାରିଖର ପୂର୍ଣ୍ଣ ସୂର୍ଯ୍ୟ ପରାଗଟି ଆଣ୍ଟାର୍କଟିକାର କିଛି ଅଞ୍ଚଳରେ ଦେଖାଯିବ । ଏଥି ସହ ଦକ୍ଷିଣ ଆଫ୍ରିକା, ଦକ୍ଷିଣ ଆଣ୍ଟାର୍କଟିକାର ଅନେକ ଅଞ୍ଚଳରେ ଏହା ଆଂଶିକ ସୂର୍ଯ୍ୟ ପରାଗ ରୂପେ ଦେଖାଯିବ |କିନ୍ତୁ ଭାରତର ତଥା ଓଡିଶାରେ ଏହା ପରାଗ ଦେଖାଯିବ ନାହିଁ ।
ଆମେ ଜାଣିଛେ ସୂର୍ଯ୍ୟ ଚାରିପଟେ ପୃଥିବୀ ଓ ପୃଥିବୀ ଚାରିପଟେ ଚନ୍ଦ୍ର ଏକ ନିର୍ଦ୍ଧିଷ୍ଟ କକ୍ଷ ପଥରେ ବୁଲୁଛନ୍ତି ଓ ବେଳେବେଳେ ପିଣ୍ଡ ତିନୋଟି ଏକ ସରଳ ରେଖାରେ ରହିଥାନ୍ତି ଓ ସେସମୟରେ ସୂର୍ଯ୍ୟ ପରାଗ ଓ ଚନ୍ଦ୍ର ଗ୍ରହଣ ଘଟିଥାଏ । ସୂର୍ଯ୍ୟ ପରାଗ ସମୟରେ ‘ପୃଥିବୀ ଓ ସୂର୍ଯ୍ୟ’ ମଝିରେ ଚନ୍ଦ୍ର ରହିଥାଏ ଓ ଚନ୍ଦ୍ରର ଛାଇ ପଡୁଥିବା ଅଞ୍ଚଳର ଲୋକମାନେ କିଛି ସମୟ ପାଇଁ ସୂର୍ଯ୍ୟକୁ ଦେଖିପାରନ୍ତି ନାହିଁ । ପରାଗ କେବଳ ଅମାବାସ୍ୟା ଦିନହିଁ ଘଟିବା ସମ୍ଭବ ହୋଇଥାଏ ।
ଭାରତୀୟ ସମୟ ପ୍ରାୟ ମଧ୍ୟାହ୍ନ ୧୧ଟାରେ ଆରମ୍ଭ ହୋଇ ଅପରାହ୍ନ ୩:୦୭ ବେଳକୁ ଶେଷ ହେବ ଓ ଏହା ସର୍ବାଧିକ ଘଟିବ ପ୍ରାୟ ଅପରାହ୍ନ ୧.୦୩ ସମୟରେ । ଏଠାରେ ସୂଚାଇଦିଆଯାଇ ପାରେ ଯେ ବିଭିନ୍ନ ସ୍ଥାନରେ ପରାଗର ଆରମ୍ଭ, ଶେଷ ଓ ସର୍ବାଧିକ ଘଟିବାର ସମୟ ସାମାନ୍ୟ ଅଲଗା ହେବ ।
୨୦୨୨ ମସିହାରେ ୨ଟି ସୂର୍ଯ୍ୟ ପରାଗ ଓ ୨ଟି ଚନ୍ଦ୍ର ଗ୍ରହଣ ସଂଗଠିତ ହେବ । ଭାରତରେ ପରବର୍ତ୍ତୀ ସୂର୍ଯ୍ୟ ପରାଗ ଆସନ୍ତା ୨୦୨୨ ମସିହା ଅକ୍ଟୋବର୍ ମାସ ୨୫ ତାରିଖରେ ଓ ଚନ୍ଦ୍ର ଗ୍ରହଣ ନଭେମ୍ବର, ୮ ତାରିଖରେ ଦେଖାଯିବ ।
ଡ: ଶୁଭେନ୍ଦୁ ପଟ୍ଟନାୟକ, ଉପନିର୍ଦ୍ଦେଶକ, ପଠାଣି ସାମନ୍ତ ପ୍ଲାନେଟାରିୟମ, ଭୁବନେଶ୍ବର, ଫୋ : ୯୪୩୭୦୦୩୨୮୨
