ଇଟା ଭାଟି ନା ସାପ ଅଣ୍ଡା ଖଣି !

ଯାଜପୁର ଜିଲ୍ଲା ମଙ୍ଗଳପୁର ଥାନା ଅନ୍ତର୍ଗତ ଠାକୁର ପାଟଣା ଗ୍ରାମର ଦିବ୍ୟରଞ୍ଜନ ବେହେରାଙ୍କ ଘର ବାଡ଼ିରେ ଅନେକ ବର୍ଷ ଧରି ଏକ ଇଟା ଭାଟି ଥିଲା । ଘର କାମ ପାଇଁ ଇଟା ଦରକାର ହେବାରୁ ବହୁ ଦିନ ଧରି ଅବ୍ୟବହୃତ ସେଇ ପୁରୁଣା ଇଟା ଭାଟିରୁ ଇଟା ବାହାର କରିବା ପାଇଁ ଲୋକ ଠିକ ହେଲେ । ଇଟା ଗଦା ଭାଙ୍ଗି ଇଟା ବାହାର କରିବା ବେଳେ କିଛି ଧଳା ରଙ୍ଗର ଅଣ୍ଡା ଦେଖାଗଲା । କେଉଁ ଅଣ୍ଡା ବୋଲି ଜାଣି ନପାରି ଗାଁ ଲୋକେ ସେଇ ଅଣ୍ଡାରୁ କିଛି ଅଣ୍ଡାକୁ ଫୁଟେଇବା ପରେ ତା ଭିତରେ ସାପ ଛୁଆ ଭଳି ପଦାର୍ଥ ଦେଖିବାକୁ ପାଇଲେ । ଭୟଭୀତ ହୋଇ ଅଣ୍ଡାଗୁଡିକୁ କିଛି ନଷ୍ଟ କଲେ ମଧ୍ୟ ଇଟା ଗଦା ଭିତରୁ ଅଧିକରୁ ଅଧିକ ଅଣ୍ଡା ଅଲଗା ଅଲଗା ଜାଗାରୁ ମିଳିବାକୁ ଲାଗିଲା । ଏମିତିକି ଅନେକ ଅଣ୍ଡାରୁ କେବଳ ଗୋଟିଏ କଣା ଥିବା ଦେଖା।ଯାଉଥିଲା କିନ୍ତୁ, ସାପ ଛୁଆଙ୍କର ଚିହ୍ନ ବର୍ଣ୍ଣ ନି ନଥିଲା । ଅର୍ଥାତ ଅଜଣା ସାପ ଛୁଆ ମାନେ ଅଣ୍ଡାରୁ ବାହାରି କେଉଁ ଆଡେ ପଳେଇଥିଲେ ।

ଅଧିକ ଭୟଭୀତ ହୋଇ ଗାଁ ଲୋକେ ସ୍ନେକ ହେଲ୍ପ ଲାଇନ କୁ ସାହାଯ୍ୟ ପାଇଁ ଅନୁରୋଧ କରିଥିଲେ । ଯାଜପୁର ରୁ ସ୍ନେକ ହେଲ୍ପ ଲାଇନ ସଦସ୍ୟ ପ୍ରମୋଦ କୁମାର ସାହୁ ଏବଂ ଚିତ୍ତ ରଞ୍ଜନ ପଣ୍ଡା ଘଟଣା ସ୍ଥଳରେ ପହଞ୍ଚିଲା ବେଳକୁ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଦେଖିବାକୁ ପାଇଥିଲେ । ତେବେ ଏଇ କାମ ସକାଳୁ ଚାଲିଥିଲା । ଏଣୁ ଭଲ ଅଣ୍ଡାଗୁଡିକ ଅନେକ ସମୟ ଖରାରେ ରହିଯାଇଥିଲା । ତେବେ ସ୍ନେକ ହେଲ୍ପ ଲାଇନ ସଦସ୍ୟଙ୍କ ସାମ୍ନାରେ ମଧ୍ୟ ଇଟା ଭାଟିରୁ ଅନେକ ପରିତ୍ୟକ୍ତ ଅଣ୍ଡା ଖୋଳ ବାହାରିଥିଲା । ପ୍ରମୋଦ ପ୍ରାୟ 55 ଟି ଗୋଟିଏ କଣା ଥିବା ପରିତ୍ୟକ୍ତ ଅଣ୍ଡା ଖୋଳ ଗଣି ପାରିଥିଲେ । ଅନେକ ପୁରୁଣା ଅଣ୍ଡା ଖୋଳ ଭାଙ୍ଗି ଛୋଟ ଛୋଟ ଖୋଳପା ହୋଇଯାଥିଲା, ଯାହା ପ୍ରାୟ 100 ବା 150 ରୁ ଅଧିକ ଅଣ୍ଡା ରୁ ବାହାରିଥିବ ଅନୁମାନ । ଲୋକମାନେ 8 ଟି ଅଣ୍ଡାକୁ ଫୁଟେଇ ଦେଇ ଥିବାରୁ ତା ଭିତରେ ଥିବା ଭ୍ରୁଣ ଗୁଡିକ ମରି ଯାଇଥିଲେ । ଆଉ ମାତ୍ର 12 ଅଣ୍ଡା ସୁସ୍ଥ ଅବସ୍ଥାରେ ରେ ଥିଲେ, କିନ୍ତୁ ଖରାରେ ଦୀର୍ଘ ସମୟ ରହିବାରୁ ତା ଭିତରେ କଣ ହେଇଥିବ ତାହା ଏବେଠାରୁ କହି ହେବନାହିଁ । ଖରା ଅଧିକ ହେବାରୁ କାମ ବନ୍ଦ ରଖାଯାଇଥିଲା । କିନ୍ତୁ, ମାଟି ଲେଭେଲ ରୁ ତକକୁ ଖୋଲି ଇଟା ଭାଟି ତିଆରି କରାଯାଇଥାଏ । ତେଣୁ ମାଟି ତଳେ ଥିବା ଇଟା ଭିତରରେ ଅଧିକ ଅଣ୍ଡା ବା ପରିତ୍ୟକ୍ତ ଖୋଳ ରହିବାର ମଧ୍ୟ ସମ୍ଭାବନା ଅଛି ।

ସ୍ନେକ ହେଲ୍ପ ଲାଇନ ସଦସ୍ୟ ପ୍ରମୋଦ ସାହୁ ଅଣ୍ଡା ଖୋଳ ଗୁଡିକ ଅନେକ ପୁରୁଣା ଏବଂ ପ୍ରାୟ 2-3 ବର୍ଷରୁ ଅଧିକ ସମୟ ପୂର୍ବର ହୋଇଥାଇପାରେ ବୋଲି ଗାଁ ଲୋକଙ୍କୁ ବୁଝେଇଥିଲେ । ଯେଉଁ କେତୋଟି ଅଣ୍ଡା ଭଲ ଅବସ୍ଥାରେ ଅଛି, ତାକୁ ସ୍ନେକ ହେଲ୍ପ ଲାଇନ ତରଫରୁ ଯତ୍ନ ନିଆଯିବ, ଯଦି ଛୁଆ ଫୁଟେ ତେବେ ସବୁ ଛୁଆଙ୍କୁ ପୁଣି ଉପଯୁକ୍ତ ପ୍ରାକୃତିକ ଆବାସ ସ୍ଥଳୀରେ ଛାଡି ଦିଆଯିବ ବୋଲି ସ୍ନେକ ହେଲ୍ପ ଲାଇନ ସଦସ୍ୟ ପ୍ରମୋଦ ସାହୁ କହିଛନ୍ତି । ତେବେ, ଗାଁ ଲୋକ ଙ୍କ ଦ୍ଵାରା ଅନେକ ଭଲ ଅଣ୍ଡା ନଷ୍ଟ ମଧ୍ୟ ହୋଇଯାଇଛି, ଏବଂ ଏଇ ଅଣ୍ଡା ଗୁଡିକ ମଧ୍ୟ ଖରାରେ ଦୀର୍ଘ ସମୟ ରହିବା ଅଣ୍ଡା ଭିତରେ ଥିବା ଭୃଣ ପାଇଁ ଉଚିତ ନୁହେଁ । ତେବେ କେଉଁ ସାପର ଅଣ୍ଡା ଏବେଠାରୁ କହିବା ସମ୍ଭବ ନୁହେଁ । ତେବେ ନାଗ ସାପ ମାନେ ନିଜର ଅଣ୍ଡାକୁ ଫୁଟିବା ପର୍ଯ୍ୟନ୍ତ ଜଗିକି ରହିଥାନ୍ତି । ଯଦିଓ ସେଇ ଜାଗାରେ 2-3 ଟି ବଡ ନାଗ ସାପ ର ଛିଣ୍ଡା କାତି ଦେଖିବାକୁ ପାଇଲୁ, ହେଲେ ଆମକୁ ଏଇ ଜାଗାରେ କୌଣସି ନାଗ ସାପ ଦେଖିବାକୁ ମିଳିନଥିଲା ବୋଲି ପ୍ରମୋଦ କହିଥିଲେ ।