ଖୋର୍ଦ୍ଧାର ପୂର୍ବତନ ଆଇନଜୀବି ତଥା ଓକିଲ ସଂଘର ପୂର୍ବତନ ସଭାପତି ରବି ବର୍ମାଙ୍କ ଦେହାନ୍ତ

ଖୋର୍ଦ୍ଧା : ୨୭-୦୨-୨୦୨୧ : ଖୋର୍ଦ୍ଧା ଜିଲ୍ଲା ଓକିଲ ସଂଘର ବରିଷ୍ଠ ଆଇନଜୀବି ରବି ନାରାୟଣ ବର୍ମା ତାଙ୍କ ଖୋର୍ଦ୍ଧା ସ୍ଥିତ ବାସଭବନରେ ମୃତ୍ୟୁବରଣ କରିଛନ୍ତି । ମୃତ୍ୟୁ ବେଳକୁ ତାଙ୍କୁ ୯୬ବର୍ଷ ହୋଇଥିଲା।

୧୯୫୧ ମସିହାରୁ ସେ ତାଙ୍କର ଓକିଲାତି ଜୀବନ ଆରମ୍ଭ କରିଥିଲେ । ସେ ଖୋର୍ଦ୍ଧା କେନ୍ଦ୍ର ସମବାୟ ବ୍ୟାଙ୍କରେ ଦୀର୍ଘ ୯ ବର୍ଷ ଧରି ସଭାପତି ଭାବେ କାର୍ଯ୍ୟ କରିବା ସହିତ ବିଜୁବାବୁଙ୍କ ଦ୍ୱାରା ଗଠିତ ଜନତା ଦଳର ଖୋର୍ଦ୍ଧା ଜିଲ୍ଲା ସଭାପତି ଓ କଲେଜ ଠାରୁ ଆରମ୍ଭ କରି ବିଭିନ୍ନ ବ୍ୟାଙ୍କ ସମେତ ଅନେକ ସ୍ବେଛାସେବୀ ଅନୁଷ୍ଠାନ ସହିତ ଜଡିତ ରହି ବହୁ ସମାଜ କଲ୍ୟାଣ କାର୍ଯ୍ୟ ସମ୍ପାଦନା କରିଥିଲେ ।ବିଜେବି ହାଇସ୍କୁଲ ଶତ ବାର୍ଷିକୀ ଅବସରରେ ପୁରାତନ ଛାତ୍ର ସଂସଦ ସଭାପତି ଭାବେ ଦାୟିତ୍ବ ତୁଳାଇଛନ୍ତି। ଉଚ୍ଚ ଶିକ୍ଷାର ବିକାଶ ଲାଗି ସ୍ବାଧିନତା ସଂଗ୍ରାମୀ ପ୍ରାଣନାଥ ପଟ୍ଟନାୟକ ଙ୍କ ସହ ପ୍ରାଣନାଥ ମହାବିଦ୍ୟାଳୟ ଓ ଖୋର୍ଦ୍ଧା ମହିଳା ମହାବିଦ୍ୟାଳୟ ସ୍ଥାପନାରେ ସକ୍ରିୟ ଭୂମିକା,ଏହା ସହିତ ଖୋର୍ଦ୍ଧା ଜିଲ୍ଲା ଦେୱାନୀ ଅଦାଲତ ର ଅତିରିକ୍ତ ସରକାରୀ ଓକିଲ ଭାବେ କାର୍ଯ୍ୟ କରିଥିଲେ ।  ଖୋର୍ଦ୍ଧା ଜିଲ୍ଲା ଗଠନ ତଥା ଖୋର୍ଦ୍ଧାର ସାମଗ୍ରିକ ଉନ୍ନତି କ୍ଷେତ୍ରରେ ତାଙ୍କ ଭୂମିକା ଉଲ୍ଲେଖନୀୟ । ତାଙ୍କ ପରି ଶାନ୍ତ, ମାର୍ଜିତ ଓ ଗୁରୁ ଗାମ୍ଭିର୍ଯ୍ୟ ବ୍ୟକ୍ତି, ସର୍ବୋପରି ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ଅତ୍ୟନ୍ତ ପ୍ରିୟ ସହଯୋଗୀ ଙ୍କ ମୃତ୍ୟୁ ଖବର ପାଇ ସମଗ୍ର ଖୋର୍ଦ୍ଧା ଅଞ୍ଚଳରେ ଶୋକର ଛାୟା ଖେଳିଯାଇଛି ।

ତାଙ୍କ ମୃତ୍ଯୁଖବର ପାଇ ଖୋର୍ଦ୍ଧା ଓକିଲ ସଂଘର ସଦସ୍ୟ, ସ୍ଥାନୀୟ ବୁଦ୍ଧିଜିବୀ, ସମାଜସେବୀ, ରାଜନୈତିକ ବ୍ଯକ୍ତି ବିଶେଷ ପ୍ରମୁଖ ସ୍ବର୍ଗତ ରବି ନାରାୟଣ ବର୍ମାଙ୍କ ବାସଭବନ ରେ ପହଞ୍ଚି ତାଙ୍କ ମରଶରୀରରେ ପୁଷ୍ପମାଲ୍ୟ ଦେଇ ଶ୍ରଦ୍ଧାଞ୍ଜଳୀ ଜଣାଇବା ସହିତ ଶେଷ ଦର୍ଶନ କରି ଗଭୀର ଶୋକ ପ୍ରକାଶ କରିଛନ୍ତି। ସ୍ବର୍ଗତ ବର୍ମାଙ୍କ ଶେଷ ସମୟରେ ତାଙ୍କର ପୁତ୍ର, ପୁତ୍ରବଧୂ, କନ୍ୟା, ଜ୍ବାଇଁ, ନାତି ନାତୁଣୀ, ପୁତୁରା ଓ ସମସ୍ତ ପରିବାର ବର୍ଗ ଉପସ୍ଥିତ ଥିଲେ ।