ମୁମ୍ବାଇଠୁ ୮ ୱିକେଟ୍ରେ ଜିତିଲା ଆର୍ସିବି
ବେଙ୍ଗାଲୁରୁ: ଚଳିତ ଆଇପିଏଲ୍ରେ ୫ ଥରର ବିଜେତା ମୁମ୍ବାଇ ଇଣ୍ଡିଆନ୍ସ ପରାଜୟରୁ ଅଭିଯାନ ଆରମ୍ଭ କରିଛି। ରବିବାରର ଦ୍ବିତୀୟ ମ୍ୟାଚ୍ରେ ରୋହିତ ଶର୍ମାଙ୍କ ନେତୃତ୍ବାଧୀନ ଏହି ଦଳ ୮ ୱିକେଟ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି)ଠୁ ପରାସ୍ତ ହୋଇଛି। ୧୭୨ ରନ୍ର ବିଜୟ ଲକ୍ଷ୍ୟକୁ ପିଛା କରୁଥିବା ଆର୍ସିବି ୨୨ ବଲ୍ ପୂର୍ବରୁ ୨ ୱିକେଟ୍ ହରାଇ ମ୍ୟାଚ୍ ଜିତି ନେଇଥିଲା। ବିରାଟ କୋହଲି (୮୨* ରନ୍, ୪୯ ବଲ୍, ୬ ଚୌକା, ୫ ଛକା) ଓ ଗ୍ଲେନ୍ ମ୍ୟାକ୍ସୱେଲ ୧୨* (୩ ବଲ୍, ୨ ଛକା) ଅପରାଜିତ ରହି ଦଳକୁ ସହଜ ବିଜୟ ଭେଟି ଦେଇଥିଲେ। ବାଙ୍ଗାଲୋର ଦଳ ଅଧିନାୟକ ଫାଫ୍ ଡୁ’ପ୍ଲେସିସ୍ (୭୩ ରନ୍, ୪୩ ବଲ୍, ୫ ଚୌକା, ୬ ଛକା) ଓ ଦିନେଶ କାର୍ତ୍ତିକ (୦)ଙ୍କୁ କେବଳ ହରାଇଥିଲା। ପ୍ରଥମ ୱିକେଟ୍ରେ କୋହଲି ଓ ଡୁ’ପ୍ଲେସିସ୍ ୧୪୮ ରନ୍ର ଭାଗୀଦାରି ଗଢ଼ି ବିଜୟରେ ପ୍ରମୁଖ ଭୂମିକା ତୁଲାଇଥିଲେ। ଅର୍ସାଦ୍ ଖାନ୍ଙ୍କୁ ୧୭ତମ ଓଭରର ଦ୍ବିତୀୟ ବଲ୍ରେ ଛକା ମାରି ବିଜୟ ମୁଣ୍ଡି ମାରିଥିଲେ କୋହଲି।
ପୂର୍ବରୁ ଆର୍ସିବି ଟସ୍ ଜିତି ମୁମ୍ବାଇକୁ ବ୍ୟାଟିଂ ଆମନ୍ତ୍ରଣ କରିଥିଲା। ପ୍ରଥମେ ବ୍ୟାଟିଂ ପାଇଥିବା ମୁମ୍ବାଇ ୮ ୱିକେଟ୍ ହରାଇ ୧୭୧ ରନ୍ କରିଥିଲା। ପାୱାର ପ୍ଲେ ମଧ୍ୟରେ ୨୯ ରନ୍ରେ ପ୍ରମୁଖ ୩ ବ୍ୟାଟର୍ ଈଶାନ କିଶନ (୧୦), କାମେରୁନ ଗ୍ରିନ୍ (୫) ଓ ରୋହିତ ଶର୍ମା (୧)ଙ୍କ ୱିକେଟ୍ ହରାଇ ସଙ୍କଟରେ ପଡ଼ିଥିଲା। ୮.୫ ଓଭରରେ ଦଳୀୟ ସ୍କୋର୍ ୪୮ ଥିଲା ବେଳେ ସୂର୍ଯ୍ୟକୁମାର ଯାଦବ (୧୫) ପାଭିଲିୟନ ଫେରିଥିଲେ। ତେବେ ଏହାପରେ ନେହାଲ ୱାଧେରା (୨୧, ୧୩ ବଲ୍, ୧ ଚୌକା, ୨ ଛକା)ଙ୍କ ସହ ତିଲକ ବର୍ମା ପଞ୍ଚମ ୱିକେଟ୍ରେ ୫୦ ରନ୍ ଭାଗୀଦାରି ଗଢ଼ି ପାଳି ସମ୍ଭାଳିଥିଲେ। ଅଷ୍ଟମ ୱିକେଟ୍ରେ ଅର୍ଶାଦ ଖାନ୍ (୧୫*, ୯ ବଲ୍, ୧ ଛକା)ଙ୍କ ସହ ତିଲକ (୮୪*, ୪୬ ବଲ୍, ୯ ଚୌକା, ୪ ଛକା) ଅଭିବାଜିତ ୪୮ ରନ୍ ଯୋଡ଼ି ଦଳୀୟ ସ୍କୋର୍ ଦେଢ଼ଶହ ପାର କରିଥିଲେ। ଶେଷରେ ତିଲକଙ୍କ ଅପରାଜିତ ବିସ୍ଫୋରକ ଅର୍ଦ୍ଧଶତକ ବେକାର ଯାଇଥିଲା।
