ଖୋର୍ଦ୍ଧା ସାମନ୍ତରାପୁର ଅଞ୍ଚଳରୁ ପୁଣି ୩ଲକ୍ଷ ଟଙ୍କାର ବ୍ରାଉନସୁଗାର ଜବତ : ଜଣେ ମହିଳା ଗିରଫ

ଖୋର୍ଦ୍ଧା:୯/୬ (ପ୍ରବାହ ନିଉଜ୍) ଖୋର୍ଦ୍ଧା ସାମନ୍ତରାପୁର ସ୍ୱପ୍ନେଶ୍ବର ବସ୍ତି ଅଞ୍ଚଳରୁ ଗତ ୩ ତାରିଖରେ ବ୍ରାଉନସୁଗାର ବ୍ୟବସାୟ ମାମଲାରେ ଟାଉନ ଥାନା ଦୁଇ ଭାଇଙ୍କୁ ଗିରଫ କରିବାର ଏକ ସପ୍ତାହ ନ ପୁରୁଣୁ ପୁଣି ଟାଉନ ଥାନା ପୋଲିସକୁ ମିଳିଛି ଆଉ ଏକ ବଡ଼ ସଫଳତା। କିଛିଦିନ ର ବ୍ୟବଧାନରେ ଟାଉନ ଥାନା ପୋଲିସ ତିନି ଲକ୍ଷ ଟଙ୍କାର ବ୍ରାଉନ ସୁଗାର ସହ ଜଣେ ମହିଳାଙ୍କୁ ଗିରଫ କରିଛି ପୋଲିସ।

ସୂଚନା ଅନୁସାରେ ଖୋର୍ଦ୍ଧା ଟାଉନ ଥାନା ପୋଲିସ ଏକ ବିଶ୍ୱସ୍ତ ସୂତ୍ରରୁ ସାମନ୍ତରାପୁର ଅଞ୍ଚଳରେ ବ୍ରାଉନସୁଗାର କାରବାର ସମ୍ପର୍କରେ ସୂଚନା ପାଇ ତୁରନ୍ତ ସାମନ୍ତରାପୁର ଉଚ୍ଚ ପ୍ରାଥମିକ ବିଦ୍ୟାଳୟ ନିକଟ ସ୍ବପ୍ନେଶ୍ବର ବସ୍ତିରେ ସକାଳ ୮ ଘଟିକା ସମୟରେ ଜଣେ ମହିଳାଙ୍କୁ ବ୍ରାଉନସୁଗାର ବିକ୍ରି କରୁଥିବା ସମୟରେ ଗିରଫ କରିଥିଲେ। ମହିଳା ଜଣକ ହେଉଛନ୍ତି ସେହି ବସ୍ତିର ସ୍ବର୍ଗତ ପରମାନନ୍ଦ ଦଳେଇଙ୍କ ୩୫ ବର୍ଷୀୟ ଝିଅ ଟୁନି ଦଳେଇ । ପୋଲିସ ତାଙ୍କ ନିକଟରୁ ୩୦.୪୧ ଗ୍ରାମ ବ୍ରାଉନ ସୁଗାର ଜବତ କରିଛି, ଯାହାର ଆନୁମାନିକ ମୂଲ୍ୟ ୩ ଲକ୍ଷରୁ ଉର୍ଦ୍ଧ୍ବ ଟଙ୍କା ହେବ ବୋଲି ଜଣାପଡିଛି । ଏବଂ ଏହା ସହିତ ଉକ୍ତ ମହିଳାଙ୍କ ନିକଟରୁ ନଗଦ ଏକଲକ୍ଷ ଆଠଶହ ଅଶୀଟଙ୍କା ଓ ବ୍ରାଉନସୁଗାର ବିକ୍ରିରେ ବ୍ୟବହୃତ ୫୫ଟି ଛୋଟ ରଙ୍ଗୀନ କାଗଜ ମଧ୍ୟ ଜବତ ହୋଇଥିବା ଜଣାପଡିଛି।

ଅଭିଯୁକ୍ତ ମହିଳାଙ୍କ ବିରୋଧରେ ଖୋର୍ଦ୍ଧା ଟାଉନ ଥାନାରେ ଏନଡ଼ିପିଏସ ଆଇନ ଧାରା ୨୧(ଖ)/୨୯ ଅନୁଯାୟୀ କେସ ନମ୍ବର ୨୨୬/୨୧ ରେ ଏକ ମାମଲା ରୁଜ୍ଜୁ କରାଯାଇ ମହିଳାଙ୍କୁ କୋର୍ଟଚାଲାଣ କରାଯାଇଛି ବୋଲି ଟାଉନ ଥାନା ଅଧିକାରୀ ସଞ୍ଜୟ କୁମାର ପଟ୍ଟନାୟକ ସୂଚନା ଦେଇଛନ୍ତି।