ଉଇହୁଙ୍କା ମୂଳରୁ ନବଜାତ ଶିଶୁପୁତ୍ର ଉଦ୍ଧାର

ଖୋର୍ଦ୍ଧା : ୨୪।୧୧(ପ୍ରବାହ ନିଉଜ୍) ସନ୍ତାନଟିଏ କିଏ କେତେ ପୂଜାଲୋଡ଼ା କରୁଥିବା ବେଳେ ଆଜି କିନ୍ତୁ ଅଲୋଡ଼ା ହେଲା ନିଷ୍ପାପ ଶିଶୁପୁତ୍ର । ଅବାଂଛିତ ଗର୍ଭଧାରଣ ପରେ ଆଜି ଅଲୋଡା ହୋଇଯାଇଛି ନିଜ ଗର୍ଭରୁ ଜାତ ସନ୍ତାନ । ଭାଗ୍ୟ ଭରସାରେ ଛାଡ଼ି ଦେଇଗଲା ଦଶମାସ ଗର୍ଭରେ ରଖି ଜନ୍ମ କରିଥିବା ମା । ହେଲେ ଯାହାକୁ ରଖିବେ ଅନନ୍ତ , କି କରି ପାରିବ ବଳବନ୍ତ । ଏମିତି କିଛି ଘଟଣା ଘଟିଛି ଖୋର୍ଦ୍ଧା ଆଦର୍ଶ ଥାନା ଅନ୍ତର୍ଗତ ବରସାହି ଅଞ୍ଚଳରେ । ଛେଳି ଚରାଇବାକୁ ଯାଇଥିବା ବେଳେ ଗାଁ ନିକଟ ଜଙ୍ଗଲର ଏକ ଉଇହୁଙ୍କା ମୂଳରେ ସଦ୍ୟ ନବଜାତ ଶିଶୁପୁତ୍ରକୁ କ୍ରନ୍ଦନ କରୁଥିବା ଦେଖି ସ୍ଥାନୀୟ ସରପଞ୍ଚଙ୍କ ଭଉଣୀ ଗ୍ରାମ ବାସୀଙ୍କ ସହାୟତାରେ ଉଦ୍ଧାର କରି ନବଜାତ ଶିଶୁ ପୁତ୍ରକୁ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି। ଶିଶୁପୁତ୍ରଟି ବର୍ତ୍ତମାନ ସୁସ୍ଥ ଥିବାବେଳେ ଏହି ଶିଶୁଟି କାହାର , କିଏ କେଉଁ ଅବସ୍ଥାରେ ଜଙ୍ଗଲରେ ଶୁଆଇ ଦେଇ ଚାଲି ଯାଇଥିଲେ। ତାହା ସ୍ପଷ୍ଟ ହୋଇ ନାହିଁ। ଘଟଣା ସମ୍ପର୍କରେ ଖୋର୍ଦ୍ଧା ଚାଇଲଡ଼ ଲାଇନ ର ସଦସ୍ୟ ମେଡିକାଲ ରେ ପହଞ୍ଚି ଶିଶୁକୁ ନିଜ ହେପାଜତକୁ ନେଇ ଚିକିତ୍ସା ନିମନ୍ତେ ଚିକିତ୍ସାଳୟର ଶିଶୁ ବିଭାଗ ରେ ଭର୍ତ୍ତି କରିଛନ୍ତି। ଏପଟେ ନବଜାତ ଶିଶୁକୁ ଉଦ୍ଧାର କରିଥିବା ମହିଳା ବିଧିବଦ୍ଧ ଭାବେ ଶିଶୁ ପୁତ୍ରକୁ ପୋଷ୍ୟ ସନ୍ତାନ ରୂପେ ଗ୍ରହଣ କରିବାକୁ ପ୍ରକାଶ କରିଛନ୍ତି ।