ଜିଲ୍ଲା ପ୍ରଶାସନ ପକ୍ଷରୁ ଖୋର୍ଦ୍ଧାରେ ଜାତୀୟ କନ୍ୟା ଦିବସ ପାଳିତ

ଖୋର୍ଦ୍ଧା,୨୪/୧(ପ୍ରବାହ ନିଉଜ୍)
ଜିଲ୍ଲା ଶିଶୁ ସୁରକ୍ଷା ୟୁନିଟ୍ ପକ୍ଷରୁ ସ୍ଥାନୀୟ ସଂସ୍କୃତି ଭବନ ପରିସରରେ ରବିବାର ଜାତୀୟ କନ୍ୟା ଦିବସ ପାଳିତ ହୋଇଛି। ଏହି କାର୍ଯ୍ୟକ୍ରମରେ ମୁଖ୍ୟ ଅତିଥିଭାବେ ବିଧାୟକ ଶ୍ରୀ ଜ୍ୟୋତିରିନ୍ଦ୍ର ନାଥ ମିତ୍ର ଯୋଗଦେଇ ଉପସ୍ଥିତ ଥିବା ସମସ୍ତ ବାଳିକା ମାନଙ୍କୁ ଉଦବୋଧନ ଦେଇ କନ୍ୟାକୁ ଘରର ଲକ୍ଷ୍ମୀ ବୋଲି କହିଥିଲେ।

ଅତିରିକ୍ତ ଜିଲ୍ଲାପାଳ ମନୋଜ କୁମାର ପାଢ଼ୀ ଅନ୍ୟତମ ଅତିଥିଭାବେ  ଯୋଗଦେଇ ଶିଶୁକନ୍ୟାର ଯତ୍ନ ସେମାନଙ୍କୁ ଉଚ୍ଚଶିକ୍ଷିତ ଓ ସ୍ୱାବଲମ୍ବୀ କରାଇବା ସହିତ ମହିଳାଙ୍କୁ ସମ୍ମାନ ଓ ସୁରକ୍ଷା ଦେବା ଲାଗି କହିଥିଲେ।
ଆମ ମାନସିକତାରେ ପରିବର୍ତ୍ତନ ଆଣି ପୁଅ-ଝିଅଙ୍କ ମଧ୍ୟରେ ଭେଦଭାବ ନ କରି ସମାନ ନଜରରେ ଦେଖିବା  ଉଚିତ। ବର୍ତ୍ତମାନ ମହିଳାମାନେ ପ୍ରତ୍ୟେକ କ୍ଷେତ୍ରରେ ପୁଅ ମାନଙ୍କ ତୁଳନାରେ ଆଗକୁ ଯାଇ ସମାଜରେ ଉଦାହରଣ ସୃଷ୍ଟି କରିଛନ୍ତି। ରୁଢିବାଦୀ ଚିନ୍ତାଧାରା ରୁ ମୁକ୍ତ ହୋଇ ଝିଅ ଓ ମହିଳାଙ୍କ ପ୍ରତି ହେଉଥିବା ହିଂସା ଓ ଅନ୍ୟାୟ କୁ ବିରୋଧ କରିବା । ସମାଜର ସବୁବର୍ଗର ଲୋକେ ଏଥିପ୍ରତି ସମ୍ବେଦନଶୀଳ ହେବା ଉଚିତ ବୋଲି ଶ୍ରୀ ପାଢ଼ୀ ନିଜ ବକ୍ତବ୍ୟରେ କହିଥିଲେ।

ସେହିପରି ସମ୍ମାନିତ ଅତିଥୀ ଭାବେ ଜିଲ୍ଲା ସୂଚନା ଓ ଲୋକସମ୍ପିକ ଅଧିକାରୀ ଶ୍ରୀ ମାନସ ରଞ୍ଜନ ବିଶ୍ୱାଳ ଯୋଗଦେଇ ଶିଶୁ କନ୍ୟାମାନଙ୍କ ଯତ୍ନ ଏବଂ ସେମାନଙ୍କ ସୁରକ୍ଷା ଉପରେ ଆଲୋକପାତ କରିଥିଲେ।

ଜିଲ୍ଲା ଶିଶୁ ସୁରକ୍ଷା ଅଧିକାରୀଣୀ ବାଣୀଶ୍ରୀ ପଟ୍ଟନାୟକ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେବା ସହ ସ୍ୱାଗତ ଭାଷଣ ଏବଂ ଅତିଥି ପରିଚୟ ପ୍ରଦାନ କରିବା ସହିତ କାର୍ଯ୍ୟକ୍ରମ ପରିଚାଳନା କରିଥିଲେ ।

ଶିଶୁ ସୁରକ୍ଷା ଅଧିକାରୀଣୀ କନ୍ୟା ଭୃଣହତ୍ୟା ଉପରେ ରୋକ ଲଗାଇବା, ଝିଅ ମାନଙ୍କୁ ଅଧାରୁ ପାଠପଢା ବନ୍ଦ କରିବାକୁ ବିରୋଧ କରିବା,  ବାଲ୍ୟବିବାହ ବନ୍ଦ କରିବା ଲାଗି ଅନେକ ପ୍ରକାର ସଚେତନତା କାର୍ଯ୍ୟକ୍ରମ ମାନ ବିଭିନ୍ନ ସମୟରେ କରାଯାଉଛି । ଅସୁରକ୍ଷିତ ପରିସ୍ଥିତିରୁ ଅସହାୟ ଝିଅମାନଙ୍କୁ ଉଦ୍ଧାର କରି ଚାଇଲଡ଼ କେୟାର ଇନଷ୍ଟିଚ୍ୟୁଟରେ ପ୍ରତିପାଳନ କରିବା ସହିତ ସେମାନଙ୍କ ଉଜ୍ଜଳମୟ ଭବିଷ୍ୟତ କାର୍ଯ୍ୟପନ୍ଥା ବିଷୟରେ ଧ୍ୟାନ ଦିଆଯାଉଛି ବୋଲି  କହିଥିଲେ।

ଏହି ଅବସରରେ ବିଭିନ୍ନ କ୍ଷେତ୍ରରେ ପାରଦର୍ଶିତା ଅର୍ଜନ କରିଥିବା ୮ଜଣ  ପ୍ରତିଭାବାନ କିଶୋରୀଙ୍କୁ ସମ୍ମାନିତ କରାଯିବା ସହିତ ପୁରସ୍କୃତ କରାଯାଇଥିଲା ।

ମନସ୍ବନୀ ମହାପାତ୍ର,ସୁକାନ୍ତ କୁମାର ପୃଷ୍ଟି ଏବଂ ଅର୍ଚ୍ଚନା ରାୟଙ୍କ ସମେତ ଜିଲ୍ଲା ଶିଶୁସୁରକ୍ଷା ୟୁନିଟର କର୍ମଚାରୀ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନାରେ ଶିଶୁ ସୁରକ୍ଷା ଅଧିକାରୀଣୀଙ୍କୁ ସହଯୋଗ କରିଥିଲେ।