ଓଡିଶା ଖଣି ନିଗମ ପକ୍ଷରୁ ଖଣି ପାରିପାର୍ଶ୍ବିକ ଅଞ୍ଚଳ ବିକାଶକୁ ଗୁରୁତ୍ୱ 

ଛାତ୍ର ଛାତ୍ରୀଙ୍କ ଯାତାୟାତ ପାଇଁ ବସ ସେବା ଆଣିଛି ଶିକ୍ଷାର ଗୁଣାତ୍ମକ ପରିବର୍ତନ 

ଯୋଡା୧୭/୨(ନିପ୍ର) କେନ୍ଦୁଝର ଜିଲ୍ଲା ବଡବିଲ ସ୍ଥିତ ଓଡିଶା ଖଣି ନିଗମ ପକ୍ଷରୁ ଖଣି ପାରିପାର୍ଶ୍ବିକ  ଗ୍ରାମ  ଗୁଡିକରେ ଶିକ୍ଷାର ବିକାଶ ନିମନ୍ତେ ବିଭିନ୍ନ ସ୍କୁଲ କଲେଜ ଯାଉଥିବା ଛାତ୍ର ଛାତ୍ରୀଙ୍କ ଉଦ୍ଦେଶ୍ୟରେ ସ୍କୁଲ ବସ ସେବା ପ୍ରଚଳନ କରିଥିବା ଜଣାପଡିଛି । ଓଡିଶା ଖଣି ନିଗମ ଅଧିନରେ ପରିଚାଳିତ ହେଉଥିବା ଗୁଆଲି,ଜିଲିଂ,ଦୁବୁନା, ଖଣ୍ଡବନ୍ଧ, ତିରିଂପାହାଡ଼, ରୋଇଡା-ସି,ଏସ ବି ବି କେ ଓ ଖଣ୍ଡବନ୍ଧ ଲୁହାପଥର ଖଣି  ଏବଂ ତାର ପାରିପାର୍ଶ୍ବିକ ଅଞ୍ଚଳ ଗୁଡିକ ପାହାଡି, ପାର୍ବତ୍ୟ ଓ  ଦୁର୍ଗମ୍ୟ ଅଞ୍ଚଳ ହୋଇଥିବାରୁ ଓ ସାଧାରଣ ଯାତାୟାତର ସୁବିଧାନଥିବାରୁ ସମ୍ପୃକ୍ତ ଅଞ୍ଚଳ ମାନଙ୍କରୁ ସହରର ମୁଖ୍ୟାଳୟ ଭାବେ ଯୋଡା,ବଡବିଲ,ବାମେବାରୀରେ ଥିବା ସ୍କୁଲ ଓ କଲେଜ ଗୁଡିକୁ  ଅଧ୍ୟୟନ ନିମନ୍ତେ ଆସୁଥିବା ଛାତ୍ରଛାତ୍ରୀ ମାନେ ଯାତାୟାତରେ ବହୁ ଅସୁବିଧାର ସମ୍ମୁଖୀନ ହୋଇଥାନ୍ତି । ବେଳେବେଳେ ସେମାନେ ଠିକ୍ ସମୟରେ ସ୍କୁଲ ପହଞ୍ଚି ନପାରିବାରୁ  ଶିକ୍ଷା ଗ୍ରହଣରେ ବ୍ୟାଘାତ ସୃଷ୍ଟି ହେବା ଦେଖାଯାଇଛି। ବାରମ୍ବାର ଏ ପରିସ୍ଥିତି ଉପୁଜିବାରୁ ଅଧିକାଂଶ ପିଲାଙ୍କ ଅଧ୍ୟୟନ ପ୍ରତି ବିମୁଖ ହୋଇ ସେମାନଙ୍କ ବହି ବସ୍ତାନୀରେ ସବୁଦିନ ପାଇଁ ଡୋରୀ ବନ୍ଧା ହୋଇଯାଇଥିବା କୁହାଯାଇଛି ।  ଏ ସମସ୍ତ ସମସ୍ୟାକୁ ଦୃଷ୍ଟିରେ ରଖି  ଓଏମସି, ବଡ଼ବିଲ ଆଞ୍ଚଳିକ କାର୍ୟ୍ୟାଳୟ ତରଫରୁ  ୧୫ ଟି ୩୨ ସିଟ ବିଶିଷ୍ଟ ସ୍କୁଲ ବସ ଛାତ୍ରଛାତ୍ରୀ ମାନଙ୍କୁ ଯୋଗାଇ ଦେବା ଫଳରେ ପିଲାମାନେ ସହଜରେ ଓ ନିୟମିତ ବିଦ୍ୟାଳୟକୁ ଆସିପାରୁଥିବା ଜଣାପଡିଛି । ଯୋଡା ମହିଳା ମହାବିଦ୍ୟାଳୟର ଅଧ୍ୟକ୍ଷା ଡ.ମୃଦୁଳା ମହାନ୍ତି କହନ୍ତି ୧୯୮୭ ମସିହାରେ  ଯୋଡା ମହିଳା ମହାବିଦ୍ୟାଳୟ ପ୍ରତିଷ୍ଠିତ ହୋଇଥିବା ବେଳେ  ବିଭିନ୍ନ ଅଞ୍ଚଳରୁ ଶତାଧିକ ଛାତ୍ରୀ ଅଧ୍ୟୟନ କରିବା ପାଇଁ ଏହି ମହାବିଦ୍ୟାଳୟକୁ ଆସିଥାନ୍ତି । ପୂର୍ବେ ଯାତାୟାତ ପାଇଁ କୌଣସି ବିଶେଷ ସୁବିଧା ନଥିଲା ପିଲାମାନେ ଘରୋଇ ବସ ଯୋଗେ ଆସି ବସଷ୍ଟାଣ୍ଡରେ ଓହ୍ଲାଇ କଲେଜ ଆସୁଥିଲେ । ଅଧିକାଂଶ ସମୟରେ ଠିକ୍ ସମୟରେ  ପହଞ୍ଚି ନପାରିବାରୁ ଶିକ୍ଷାଲାଭରେ ଅନେକ ବ୍ୟାଘାତ ସୃଷ୍ଟି ହେଉଥିଲା । ଅଭିଭାବକ ମାନେ ନିଜ ନିଜ ପିଲାମାନଙ୍କ ସୁରକ୍ଷା ପ୍ରତି ମଧ୍ୟ ଖୁବ୍ ଚିନ୍ତିତ ରହୁଥିଲେ । ବର୍ତ୍ତମାନ ତାହା ଆଉ ନାହଁ, ଓଏମସି ଏବେ ବସ ସେବା ଯୋଗାଇ ଦେଇଥିବାରୁ ପିଲାମାନଙ୍କ ପାଇଁ  ଯାତାୟାତ ସୁଗମ ହୋଇପାରିଛି । ଏହା ସେମାନଙ୍କ ଅଧ୍ୟୟନରେ ନିଶ୍ଚିତ ଭାବେ ଭଲ ପ୍ରତିଫଳିତ ହେବ ବୋଲି ବିଶ୍ୱାସ ରଖିବା ସହିତ ଓଏମସି କତ୍ତୃପକ୍ଷଙ୍କୁ ଉଚ୍ଚ  ପ୍ରଶଂସା କରିଥିବା ଜଣାପଡିଛି । ବାଂଶପାଣି ଗ୍ରାମର ଛାତ୍ରୀ ମେଘା ଗୋପ କୁହନ୍ତି ଏହି ବସ ସେବା ଯୋଗୁ ଆମ ଗ୍ରାମର ଅନେକ ଝିଅ ଉଚ୍ଚଶିକ୍ଷା ଗ୍ରହଣ କରିବାକୁ ଆଗ୍ରହୀ ହେଉଛନ୍ତି ଏବଂ ଆମର   ପାଠ ପଢ଼ାରେ ଉନ୍ନତି ଘଟିଛି ଓ ଆମର ଆତ୍ମ ବିଶ୍ୱାସ ଵୃଦ୍ଧି ପାଇଛି । ଏ ଅଂଚଳର ପ୍ରକୃତ ସମସ୍ୟାକୁ ଅଧୟନ କରି ଓଡିଶା ଖଣି ନିଗମ ନିଜର ସି ଏସ ଆର କାର୍ୟ୍ୟକ୍ରମ ମାଧ୍ୟମରେ ଖଣି ପ୍ରଶ୍ଵାବର୍ତ୍ତୀ ଲୋକଙ୍କ ଜୀବନରେ ଗୁଣାତ୍ମକ ପରିବର୍ତନ ଆଣିବା ପାଇଁ ସର୍ବଦା ଚେଷ୍ଟା କରୁଛି ବୋଲି ବୁଦ୍ଧିଜୀବୀ ମାନେ ମତ ଦେଇଛନ୍ତି.