ଶସ୍ତା ଲୋକଙ୍କଠାରୁ ସମ୍ମାନ ଆଶା କରିବା ଭୁଲ
ମୁମ୍ବାଇ: ଗୁରୁବାର ଦିନ ୬୮ତମ ଫିଲ୍ମଫେୟାର ପୁରସ୍କାର ପ୍ରଦାନ ଉତ୍ସବ ଅନୁଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମରେ ବିଭିନ୍ନ ଫିଲ୍ମ ଓ କଳକାରଙ୍କୁ ଫିଲ୍ମଫେୟାର ପୁରସ୍କାର ଦିଆଯାଇ ସମ୍ମାନିତ କରାଯାଇଛି। ନିର୍ଦ୍ଦେଶକ ସଞ୍ଜୟ ଲୀଲା ଭଂସାଲୀଙ୍କ ନିର୍ଦ୍ଦେଶିତ ଫିଲ୍ମ ‘ଗଙ୍ଗୁବାଇ କାଠିଆୱାଡ଼ି’ ଓ ହର୍ଷବର୍ଦ୍ଧନ କୁଲକର୍ଣ୍ଣୀଙ୍କ ନିର୍ଦ୍ଦେଶିତ ଫିଲ୍ମ ‘ବଧାଇ ଦୋ’ ଫିଲ୍ମକୁ ଏକାଧିକ ପୁରସ୍କାର ମିଳିଥିବା ଦେଖାଯାଇଛି। ହେଲେ ୨୦୨୨ରେ ନିଜର ସ୍ବତନ୍ତ୍ର ସ୍ଥାନ ତିଆରି କରିଥିବା ଫିଲ୍ମ ଦ କଶ୍ମୀର ଫାଇଲ୍ସକୁ ଗୋଟିଏ ବି ଆୱାର୍ଡ ମିଳିନାହିଁ।
ଫିଲ୍ମଫେୟାର ଆୱାର୍ଡରେ ଫିଲ୍ମ ‘ଦ କଶ୍ମୀର ଫାଇଲ୍ସ’କୁ ୭ଟି ବର୍ଗ ପାଇଁ ମନୋନୀତ କରାଯାଇଥିଲା। ଏହାର ନିର୍ଦ୍ଦେଶକ ବିବେକ ଅଗ୍ନିହୋତ୍ରୀ ଶ୍ରେଷ୍ଠ ନିର୍ଦ୍ଦେଶକ ବର୍ଗରେ ମନୋନୀତ ହୋଇଥିଲେ। ହେଲେ ମନୋନୀତ ହୋଇ ବି ‘ଦ କଶ୍ମୀର ଫାଇଲ୍ସ’ କୌଣସି ବର୍ଗରେ ବି ଆୱାର୍ଡ ହାତେଇ ପାରିନଥିଲା। ଏନେଇ ବରିଷ୍ଠ ଅଭିନେତା ଅନୁପମ ଖେର୍ ଟ୍ବିଟରରେ ଏକ ପୋଷ୍ଟ କରିଛନ୍ତି, ଯାହା ଏବେ ଭାଇରାଲ ହୋଇଛି।
ଫିଲ୍ମଫେୟାରକୁ ଟାର୍ଗେଟ କରି ସେ ଏହି ଟ୍ବିଟ କରିଥିବା ଚର୍ଚ୍ଚା ହେଉଛି। ସେ କରିଥିବା ଟ୍ବିଟରେ ଲେଖାଯାଇଛି ଯେ, ସମ୍ମାନ ଏକ ଦାମୀ ଉପହାର। ଶସ୍ତା ଲୋକଙ୍କଠାରୁ ସମ୍ମାନ ଆଶା ରଖ ନାହିଁ।
ତେବେ ‘ଗଙ୍ଗୁବାଇ କାଠିଆୱାଡ଼ି’ ପାଇଁ ବଲିଉଡ ଅଭିନେତ୍ରୀ ଆଲିଆ ଭଟ୍ଟଙ୍କୁ ଶ୍ରେଷ୍ଠ ଅଭିନେତ୍ରୀ ପୁରସ୍କାର ମିଳିଥିବା ବେଳେ ରାଜକୁମାର ରାଓଙ୍କୁ ‘ବଧାଇ ଦୋ’ ପାଇଁ ଶ୍ରେଷ୍ଠ ଅଭିନେତା ପୁରସ୍କାର ମିଳିଛି। ବରିଷ୍ଠ ଅଭିନେତା ପ୍ରେମ ଚୋପ୍ରାଙ୍କୁ ଜୀବନବ୍ୟାପି ସାଧନା ପୁରସ୍କାର ପ୍ରଦାନ କରାଯାଇଛି। ଫିଲ୍ମ ‘ଝୁଣ୍ଡ’ ପାଇଁ ଅଙ୍କୁଶ ଗେଦମଙ୍କୁ ଶ୍ରେଷ୍ଠ ନବାଗତ ଅଭିନେତା ପୁରସ୍କାର ମିଳିଥିବା ବେଳେ ଶ୍ରେଷ୍ଠ ନବାଗତ ଅଭିନେତ୍ରୀ ପୁରସ୍କାର ଜିତିଛନ୍ତି ଆଣ୍ଡ୍ରେୟା କେଭିଚୁସା।
