ଗୁରୁଜଙ୍ଗ ମହୋତ୍ସବ ପଡ଼ିଆରେ ଡକାୟତି ଯୋଜନା : ମାଷ୍ଟରମାଇଣ୍ଡ ସମେତ ୫ଡକାୟତ ଗିରଫ

ଖୋର୍ଦ୍ଧା: ୬/୬ (ପ୍ରବାହ ନିଉଜ୍) କରୋନା ମହାମାରୀ ସମୟରେ ସଂକ୍ରମଣ କୁ ନିୟନ୍ତ୍ରଣ କରିବା ପାଇଁ ସରକାରଙ୍କ ପକ୍ଷରୁ ଲକଡାଉନ ଓ ସଟଡାଉନ ଜାରି କରାଯାଇଛି । ଏହାର ସୁଯୋଗ ନେଇ ଅପରାଧିକ ତତ୍ତ୍ୱମାନେ ସେମାନଙ୍କର କାର୍ଯ୍ୟକଳାପ ବୃଦ୍ଧି କରିବାରେ ଲାଗିଥିବା ବେଳେ ପତ୍ୟେକ ଦିନ ବିଭିନ୍ନ ପ୍ରକାରର ଅପରାଧିକ କାର୍ଯ୍ୟ ହେଉଥିବା ଘଟଣା ନଜରକୁ ଆସୁଛି । ଖୋର୍ଦ୍ଧା ଅଞ୍ଚଳରେ ଡକାୟତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ପ୍ରତ୍ୟେକ ଦିନ କେଉଁଠି ନା କେଉଁଠି ଡକାୟତି ଖବର ଶୁଣିବାକୁ ମିଳୁଛି।

ଶନିବାର ବିଳମ୍ବିତ ରାତିରେ ଖୋର୍ଦ୍ଧା ଟାଉନ ଥାନା ଅନ୍ତର୍ଗତ ଗୁରୁଜଙ୍ଗ ମହୋତ୍ସବ ପଡ଼ିଆରେ ପାଞ୍ଚଜଣ ଡକାୟତ ମାରଣାସ୍ତ୍ର ସହ ଡକାୟତି ପାଇଁ ଯୋଜନା କରୁଥିବା ସମୟରେ ଟାଉନ ଥାନା ପୋଲିସ ବିଶ୍ୱସ୍ତସୂତ୍ରରୁ ଖବର ପାଇ ଚଢ଼ାଉ କରିଥିଲା। ଚଢ଼ାଉ ସମୟରେ ପୋଲିସ ପାଞ୍ଚ ଜଣ ଡକାୟତଙ୍କୁ ଗିରଫ କରିବା ସହ ସେମାନଙ୍କ ଠାରୁ ଭୁଜାଲି, ଶାବଳ, ଲୁହା ରଡ଼ ପରି ବିଭିନ୍ନ ମାରଣାସ୍ତ୍ର ଓ ନଗଦ ୪ ହଜାର ଟଙ୍କା ଜବତ କରିଛି।

ଗିରଫ ଅଭିଯୁକ୍ତ ମାନେ ହେଲେ ଗୁରୁଜଙ୍ଗ ଅଞ୍ଚଳର ପୁତୁଲୁ ଓରଫ ସୌମ୍ୟ ରଞ୍ଜନ ପଟ୍ଟନାୟକ(୨୬), ସିପା ଓରଫ ସୁଦୀପ୍ତ ନାୟକ(୩୦), ବଳିଆ ଓରଫ ବଳଭଦ୍ର ବେହେରା(୩୦) ଏବଂ ଜଟଣୀ ରଥୀପୁର ଅଞ୍ଚଳର ଗୁଡୁ ଓରଫ ଶେଖ ଜମୁରୁଦ୍ଦିନ(୨୨) ଓ ଫିରୋଜ ଖାନ(୨୦) ବୋଲି ପୋଲିସ ସୂଚନା ଦେଇଛି।

ତେବେ ସମସ୍ତ ଅଭିଯୁକ୍ତଙ୍କ ବିରୋଧରେ ପୋଲିସ ୨୨୪/୨୧ ରେ ମାମଲା ରୁଜୁକରି କୋର୍ଟଚାଲାଣ କରିଥିବା ବେଳେ ଗିରଫ ହୋଇଥିବା ସୌମ୍ୟରଂଜନ ନାମରେ ପୂର୍ବରୁ ୧୬ଟି ମାମଲା ,ଏବଂ ବଳଭଦ୍ର ନାମରେ ୮ଟି ଅପରାଧିକ ମାମଲା ଥିବାର ଟାଉନ ଥାନା ଅଧିକାରୀ ସଞ୍ଜୟ କୁମାର ପଟ୍ଟନାୟକ ସୂଚନା ଦେଇଛନ୍ତି ।