ସଫଳ ହେଲା ଭରତଙ୍କ ସ୍ୱପ୍ନ, ଟାଟା ଷ୍ଟିଲ ଫାଉଣ୍ଡେସନ ସହଯୋଗରେ ଟାଙ୍ଗରା ଭୂଇଁ ପାଲଟିଲା ଫଳ ଉଦ୍ୟାନ
ବ୍ରହ୍ମପୁର : ଗଞ୍ଜାମ ଜିଲ୍ଲା ଛତ୍ରପୁର ଅନ୍ତର୍ଗତ ବିପିଲିଙ୍ଗି ଗ୍ରାମର ଚାଷୀ ଭରତ ରେଡ୍ଡୀଙ୍କ ସ୍ୱପ୍ନ ପୂରଣ ହୋଇଛି । ଟାଟା ଷ୍ଟିଲ ଫାଉଣ୍ଡେସନର (ଟିଏସ୍ଏଫ୍) ସହଯୋଗ ଓ ନିଜର କଠିନ ପରିଶ୍ରମ ଦ୍ୱାରା ସେ ପ୍ରାୟ ଦେଢ଼ ଏକରରୁ ଊର୍ଦ୍ଧ୍ୱ ଜମିରେ ଫଳାଇ ପାରିଛନ୍ତି ସୁନାର ଫସଲ । ଦିନେ ଟାଙ୍ଗରା ହୋଇ ପଡିରହିଥିବା ଏହି ଜମିରେ ଏବେ ଦେଖିବାକୁ ମିଳୁଛି ମନଲୋଭା ପିଜୁଳି ଆଉ ଲେମ୍ବୁ ଗଛ । ଏହି ଜମି ଏବେ ଫଳ ଉଦ୍ୟାନରେ ପରିଣତ ହୋଇଛି ।
ତେବେ ଭରତଙ୍କ ପାଇଁ ଏସବୁ ଏତେ ସହଜ ନଥିଲା । ଜମିରେ କେଉଁ କିସମର ଗଛ ଲଗାଇଲେ ଭଲ ହେବ ଓ ଚାରା କେଉଁଠୁ ଆସିବ ଆଦି ବିଭିନ୍ନ ପ୍ରକାର ଚିନ୍ତା କରୁଥିଲେ ସେ । ଆଉ ଠିକ୍ ସେହି ସମୟରେ ସହଯୋଗର ହାତ ବଢ଼ାଇଥିଲା ଟାଟା ଷ୍ଟିଲ ଫାଉଣ୍ଡେସନ । ଉନ୍ନତ କିସମର ପିଜୁଳି ଆଉ ଲେମ୍ବୁ ଚାରା ଯୋଗାଇଦେବା ସହ ଏହାର ଚାଷ ପଦ୍ଧତି ସମ୍ପର୍କରେ ଟିଏସ୍ଏଫ୍ ଭରତଙ୍କୁ ପ୍ରଶିକ୍ଷଣ ମଧ୍ଯ ଦେଇଥିଲା । ଟିଏସ୍ଏଫ୍ ପକ୍ଷରୁ ଭରତଙ୍କୁ ଯୋଗାଇ ଦିଆଯାଇଥିଲା ତାଇୱାନ ପିଙ୍କ୍ କିସମର ପିଜୁଳି ଚାରା ଓ ଜୈବ ଉର୍ବରକ । ପ୍ରତିକୂଳ ଜଳବାୟୁରେ ମଧ୍ଯ ଭଲଭାବେ ବଢୁଥିବା ଏହି ଚାରାର ବିଶେଷତ୍ୱ ହେଲା ଯେ ଚାରା ରୋପଣର ମାତ୍ର ଏଗାର ମାସରେ ଏହା ପାକଳ ଫଳ ଧରିଥାଏ ।
ବାସ୍, ଆଉ ତା’ପରେ ଜମିରେ ୧୧୦୦ ପିଜୁଳି ଗଛ ଓ ୧୫୦ ଲେମ୍ବୁ ଗଛ ଲଗାଇ ମାତ୍ର ମାସ କେଇଟାରେ ଏହି ଟାଙ୍ଗରା ଭୁଇଁକୁ ଏକ ସୁନ୍ଦର ସବୁଜ ଫଳ ବଗିଚାରେ ପରିଣତ କରିଦେଇଥିଲେ ସେ । ଚଳିତ ବର୍ଷ ଏହି ବଗିଚାରୁ ତିନି ଶହ କେଜିରୁ ଉର୍ଦ୍ଧ୍ୱ ପିଜୁଳି ଉତ୍ପାଦନ ହୋଇ ସାରିଥିବା ବେଳେ ଆଗାମୀ କିଛିଦିନରେ ଲେମ୍ବୁ ମଧ୍ଯ ତୋଳାଯିବା ପାଇଁ ପ୍ରସ୍ତୁତ ହୋଇଯିବ । ସ୍ଥାନୀୟ ବଜାରରେ ପିଜୁଳି କେଜି ପିଛା ୭୦ ଟଙ୍କାରେ ବିକ୍ରିକରି ସେ ଏହି ବର୍ଷ ୨୨,୦୦୦ ଟଙ୍କା ଆୟ କରିପାରିଛନ୍ତି ବୋଲି କହିଛନ୍ତି ଭରତ ।
ନିଜ ପରିବାରର ଆୟ ବୃଦ୍ଧି କରି ଆର୍ôଥକ ସ୍ୱାବଲମ୍ବୀ ହୋଇପାରିଥିବାରୁ ଟାଟା ଷ୍ଟିଲ ଫାଉଣ୍ଡେସନକୁ ସେ ଧନ୍ୟବାଦ ଦେଇଛନ୍ତି ।
ଗଞ୍ଜାମ ଜିଲ୍ଲାର ଚାଷୀ ମାନଙ୍କୁ ସଶକ୍ତ କରିବାରେ ମହତ୍ତ୍ୱପୂର୍ଣ୍ଣ ଭୂମିକା ନିର୍ବାହ କରିଆସିଥିବା ଟିଏସ୍ଏଫ୍, ସ୍ଥାନୀୟ ଲୋକଙ୍କ ଦୀର୍ଘସ୍ଥାୟୀ ଅଭିବୃଦ୍ଧି ତଥା ଦୀର୍ଘମିଆଦୀ ଲାଭ ପାଇଁ ଏପରି ବିଭିନ୍ନ କାର୍ଯ୍ୟକ୍ରମମାନ ହାତକୁ ନେଇଛି । ଅଞ୍ଚଳର କୃଷକ ସମ୍ପ୍ରଦାୟ ଏବଂ କୃଷିର ଉନ୍ନତି ପାଇଁ ଫାଉଣ୍ଡେସନ ପକ୍ଷରୁ ଅନେକ ଅଭିନବ କାର୍ଯ୍ୟକ୍ରମ ଜରିଆରେ ସହଭାଗିତା ଜାରି ରହିଛି ।
