ଜେଏସ୍ଡବ୍ଲ୍ୟୁ ପକ୍ଷରୁ ମେଗା ସ୍ୱାସ୍ଥ୍ୟଶିବିରମାଗଣାରେ ସେବା ପାଇଲେ ଶତାଧିକ
ବଡ଼ବିଲ: ଜନସାଧାରଣଙ୍କୁ ସ୍ୱାସ୍ଥ୍ୟସେବା ଯୋଗାଇଦେବା ନିମନ୍ତେ ଜେଏସ୍ଡବ୍ଲ୍ୟୁ ଏବ ମୁମ୍ବାଇ ସ୍ଥିତ ଜଗନ୍ନାଥ କ୍ୟାନ୍ସର ଏଡ୍ ଫାଉଣ୍ଡେଶନ (ଜେସିଏଏଫ୍) ପକ୍ଷରୁ କେନ୍ଦୁଝର ଜିଲା ଖଣି ଅଞ୍ଚଳରେ ୨ ଦିନିଆ ମାଗଣା ସ୍ୱାସ୍ଥ୍ୟ ଶିବିର ଆୟୋଜିିତ ହୋଇଥିଲା ।
ଜେଏସ୍ଡବ୍ଲ୍ୟୁ ପକ୍ଷରୁ ଶନିବାର ନୂଆଗାଁରେ ଏବଂ ରବିବାର ଜଜାଙ୍ଗରେ ଦୁଇଟି ସ୍ୱାସ୍ଥ୍ୟ ଶିବିର ଆୟୋଜିତ ହୋଇଥିଲା । ଏଥିରେ ୨୭ରୁ ଅଧିକ ଗ୍ରାମର ୫୫୦ରୁ ଊର୍ଦ୍ଧ୍ୱ ରୋଗୀ ମାଗଣାରେ ସ୍ୱାସ୍ଥ୍ୟ ସେବା ପାଇଥିଲେ ।
ଲୋକଙ୍କ ମଧ୍ୟରେ ସ୍ୱାସ୍ଥ୍ୟ ସଚେତନତା ବାଣ୍ଟିବା ସହ କୌଣସି ରୋଗର ଶୀଘ୍ର ନିଦାନ ଏବଂ ନିରାକରଣ କରାଯିବା ଉଦ୍ଦେଶ୍ୟରେ ଏହି ସ୍ୱାସ୍ଥ୍ୟ ଶିବିର ଅନୁଷ୍ଠିତ ହୋଇଥିଲା । ଏଥିରେ ଡାକ୍ତର ବିଶେଷଜ୍ଞମାନେ ଲୋକଙ୍କ ସ୍ୱାସ୍ଥ୍ୟାବସ୍ଥା ଯାଞ୍ଚ ସହ ମାଗଣା ପରାମର୍ଶ, ନମୁନା ପରୀକ୍ଷଣ, ଡାଇବେଟିସ୍ ଟେଷ୍ଟ ଆଦି କରାଇଥିଲେ । ଏଥିସହ ସୁସ୍ଥ ରହିବା ନିମନ୍ତେ ଆବଶ୍ୟକ ଜୀବନଶୈଳୀ ଆପଣାଇବାକୁ ସେମାନଙ୍କୁ ପରାମର୍ଶ ଦିଆଯାଇଥିଲା ।
ସୂଚନାଯୋଗ୍ୟ ଯେ, ଜଗନ୍ନାଥ କ୍ୟାନ୍ସର ସହାୟତା ଫାଉଣ୍ଡେଶନ ସହଯୋଗରେ ଜେଏସ୍ଡବ୍ଲ୍ୟୁ ଏହି ଶିବିରରେ କ୍ୟାନ୍ସର ପରୀକ୍ଷଣ ସେବା ମଧ୍ୟ ଯୋଗାଇଛି । କ୍ୟାନ୍ସର ସ୍ପେଶାଲିଷ୍ଟ ଡା. ଦିଲୀପ କୁମାର କର ରୋଗୀଙ୍କ ଏହି ପରୀକ୍ଷା କରାଇଥିଲେ । ଡା. କର ଏବେ ଭୁବନେଶ୍ୱର ସ୍ଥିତ ଉତ୍କଳ ହସ୍ପିଟାଲରେ କାର୍ଯ୍ୟରତ ।
ଏହା ସହ ୩ ଜେନେରାଲ ଫିଜିସିଆନ୍, ଜଣେ ସ୍ତ୍ରୀ ଓ ପ୍ରସୂତି ରୋଗ ବିଶେଷଜ୍ଞ, ଜଣେ ଅସ୍ଥି ଶଲ୍ୟ ଡାକ୍ତରଙ୍କ ଏକ ଟିମ୍ରେ କ୍ୟାମ୍ପ୍ରେ ଲୋକଙ୍କ ସ୍ୱାସ୍ଥ୍ୟ ତଥା ରୋଗର ନିରୀକ୍ଷଣ କରିଥିଲେ ।
ସ୍ୱାସ୍ଥ୍ୟ ସେବା ପାଇଁ ବାହାରକୁ ଯାଇପାରୁ ନ ଥିବା ସ୍ଥାନୀୟ ଅଞ୍ଚଳର ଲୋକଙ୍କ ଲାଗି ଏଭଳି ମାଗଣା ସ୍ୱାସ୍ଥ୍ୟ ଶିବିର ବେଶ୍ ଉପଯୋଗୀ ହେବ ବୋଲି ଡା. କର କହିଥିଲେ । ଏହି କ୍ୟାମ୍ପ୍ ଉଚିତ୍ ଜୀବନଶୈଳୀ, ରୋଗରୁ ଦୂରେଇ ରହିବା ସହ ସ୍ୱାସ୍ଥ୍ୟ ସଚେତନତା ବାଣ୍ଟିବାରେ ବେଶ୍ ସହାୟକ ହୋଇଥିବା ସେ ପ୍ରକାଶ କରିଥିଲେ ।
ଜେଏସ୍ଡବ୍ଲ୍ୟୁ ଫାଉଣ୍ଡେଶନ ଓଡ଼ିଶାର ବିଭିନ୍ନ ସ୍ଥାନରେ ଥିବା ଏହାର ବ୍ୟବସାୟିକ ଅଞ୍ଚଳରେ ଚଳିତ ବର୍ଷ ଆରମ୍ଭରୁ ଜେସିଏଏଫ୍ ସହଯୋଗରେ ଏପରି ମେଗା ସ୍ୱାସ୍ଥ୍ୟ ଶିବିର ଏବଂ କ୍ୟାନ୍ସର ନିରାକରଣ କ୍ୟାମ୍ପ୍ ଆୟୋଜନ କରୁଛି । ଏହି ହେଲ୍ଥ କ୍ୟାମ୍ପ୍ରେ ଜେଏସ୍ଡବ୍ଲ୍ୟୁ ଅଧିକାରୀମାନେ ଉପସ୍ଥିତ ଥିଲେ । ଆଗକୁ ମଧ୍ୟ ଜେଏସ୍ଡବ୍ଲ୍ୟୁ ଏପରି ଶିବିର ଆୟୋଜନ କରିବ ।
