ବହୁ ପ୍ରତୀକ୍ଷିତ ନେତାଜୀ ଆନ୍ତର୍ଜାତିକ ବସ ଟର୍ମିନାଲର ଶିଳାନ୍ୟାସ

କଟକ, ୨୩ା/୦୧/୨୦୨୧: ନେତାଜୀ ସୁଭାଷ ଚନ୍ଦ୍ର ବୋଷଙ୍କ ୧୨୫ତମ ଜୟନ୍ତୀରେ ଶ୍ରଦ୍ଧାଞ୍ଜଳି ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ନେତାଜୀଙ୍କ ଜନ୍ମଦିନରେ ରାଜ୍ୟବାସୀଙ୍କୁ ଭେଟି  ସ୍ୱରୂପ କଟକ ଖାନନଗରରେ ନେତାଜୀ ବସ୍ ଟର୍ମିନାଲର ଶିଳାନ୍ୟାସ ସହ ନେତାଜୀଙ୍କ ବଳିଦାନର ସ୍ମୃତିଚାରଣ କରିଛନ୍ତି ମୁଖ୍ୟମନ୍ତ୍ରୀ।ଏହା ପୂର୍ବରୁ ମୁଖ୍ୟମନ୍ତ୍ରୀ ନେତାଜୀଙ୍କ ସଂଗ୍ରାହଳୟକୁ ଯାଇଥିଲେ ଏବଂ ସେଠାରେ ନେତାଜୀଙ୍କ ପ୍ରତ୍ତିମୂର୍ତ୍ତିରେ ପୁଷ୍ପମାଲ୍ୟାର୍ପଣ କରିଥିଲେ।

କଟକର ଖାନନଗରରେ ନେତାଜୀଙ୍କ ନାମରେ ଏକ ଅତ୍ୟାଧୁନିକ ବସ୍ ଟର୍ମିନାଲ ନିର୍ମାଣ କରାଯିବ । ଏହି ଅବସରରେ ଅଭିମୁଖେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଟକ ଗସ୍ତ କରିଛନ୍ତି । କଟକରେ ପହଞ୍ଚିବା ପରେ ମୁଖ୍ୟମନ୍ତ୍ରୀ ଖାନ ନଗର ଠାରେ ପ୍ରସ୍ତାବିତ ବସ୍ ଟର୍ମିନାଲର ଶିଳାନ୍ୟାସ କରିଛନ୍ତି । ନେତାଜୀଙ୍କ ନାମରେ ଏହି ନୂତନ ବସ ଟର୍ମିନାଲର ନାମକରଣ କରାଯାଇଛି। ୧୨ ଏକର ପରିମିତ ଜମିରେ ନିର୍ମିତ ହେବାକୁ ଥିବା ଏହି ଅତ୍ୟାଧୁନିକ ଅନ୍ତର୍ଜାତୀୟ ବସ୍ ଟର୍ମିନାଲ ପାଇଁ ୬୫ କୋଟି ବ୍ୟୟ ଅଟକଳ କରାଯାଇଛି ।

ଏହି ଟର୍ମିନାଲରେ ଏକ ସଙ୍ଗରେ ୧୮୦ଟି ବସ୍ ଓ ୨୭୫ କାର ପାର୍କିଂ କରିପାରିବ ।ସ୍ଥାନୀୟ ବସ,  ସାଧାରଣ ଯାତ୍ରୀବାହୀ ବସ୍, ଦୂରଗାମୀ ବସ ଓ ‘ମୋ ବସ’ ପାଇଁ ସ୍ୱତନ୍ତ୍ର ସ୍ଥାନ ବ୍ୟବସ୍ଥା କରାଯାଇଛି । ୪ ଚକିଆ ଯାନ ଓ ଅଟୋ ପାଇଁ ସ୍ୱତନ୍ତ୍ର ସ୍ଥାନ ରଖାଯିବ । ଏଥିସହ ଟର୍ମିନାଲରେ ନେତାଜୀଙ୍କ ଜୀବନୀ ଓ ଆଦର୍ଶ ବିଷୟରେ ଜନସାଧାରଣଙ୍କୁ ଅବଗତ କରାଯିବ ବୋଲି ମୁଖ୍ୟମନ୍ତ୍ରୀ ଅଭିଭାଷଣରେ କହିଛନ୍ତି ।