ସିନେ ପ୍ରଯୋଜକ ଜ୍ଞାନରଂଜନଙ୍କ ବିୟୋଗରେ ଶୋକସଭା
ଭୁବନେଶ୍ୱର, ପ୍ରବାହ ନ୍ୟୁଜ୍ : ଓଡ଼ିଆ ଚଳଚ୍ଚିତ୍ର ପ୍ରଯୋଜକ ତଥା ଦର୍ଶନ ମ୍ୟୁଜିକର ପ୍ରତିଷ୍ଠାତା ଜ୍ଞାନରଂଜନ ପ୍ରିୟଦର୍ଶନଙ୍କର ଅକାଳ ବିୟୋଗ ଘଟିଛି । ହୃଦଘାତରେ ଆକ୍ରାନ୍ତ ହୋଇ ଗତକାଲି ରାତ୍ରିରେ ମାତ୍ର ୪୮ ବର୍ଷ ବୟସରେ ସେ ଶେଷନିଃଶ୍ୱାସ ତ୍ୟାଗ କରିଛନ୍ତି । ତାଙ୍କର ଏକମାତ୍ର ପୁତ୍ର ଲଣ୍ଡନରେ ଉଚ୍ଚଶିକ୍ଷା ଗ୍ରହଣ କରୁଛନ୍ତି । ଜ୍ଞାନରଞ୍ଜନଙ୍କ ପ୍ରଯୋଜିତ ଚଳଚ୍ଚିତ୍ର ‘ମୋତେ ବୋହୂକରି ନେଇ ଯା’ ଦର୍ଶକଙ୍କ ଦ୍ୱାରା ବେଶ୍ ଆଦୃତ ହୋଇଥିଲା ଏବଂ ବିଦେଶରେ ଏହାର ସମସ୍ତ ସୁଟିଂ ଶେଷ ହୋଇଥିଲା। ‘ଦର୍ଶନ’ମ୍ୟୁଜିକ୍ ମାଧ୍ୟମରେ ସେ ଅନେକ କଣ୍ଠଶିଳ୍ପୀଙ୍କ ପାଇଁ ପରିଚୟ ସୃଷ୍ଟି କରିଥିଲେ ।
ଜ୍ଞାନରଞ୍ଜନଙ୍କ ପରଲୋକରେ ସିନେକ୍ରିଟିକ୍ ଆସୋସିଏସନ୍ ଏବଂ ‘ସଂସ୍କୃତି ଓ ସଂସ୍କୃତି’ ପକ୍ଷରୁ ବୁଦ୍ଧ ମନ୍ଦିର ଠାରେ ଏକ ଶୋକସଭା ଅନୁଷ୍ଠିତ ହୋଇଯାଇଛି। ଏଥିରେ ସଭାପତି ପ୍ରଦୋଷ ପଟ୍ଟନାୟକ, ସମ୍ପାଦକ ଦିଲ୍ଲୀପ ହାଲି, ପ୍ରଯୋଜକ ଲୁଟୁ ମହାନ୍ତି, ରବୀନ୍ଦ୍ର ବିଶ୍ୱାଳ, ଡ. ତନ୍ମୟ ସ୍ୱାଇଁ, ଡ. ରଜନୀରଂଜନ, କେ.ସି. ସ୍ୱାଇଁ, ମଣ୍ଟୁ ସିଂ, ସମୀର ରାଉତ ପ୍ରମୁଖ ଯୋଗଦେଇ ତାଙ୍କର ଗୁଣାବଳୀ ଆଲୋଚନା କରିଥିଲେ । ପରଲୋକଗତ ଆତ୍ମାର ସଦ୍ଗତି ପାଇଁ ଏକ ମିନିଟ୍ ନିରବ ପ୍ରାର୍ଥନା କରାଯାଇଥିଲା।
